Sálmmaid girji 12

₂Gájo mu, Hearrá!

Dat geat ballet dus leat jávkan,

oskkáldas olbmot eai leat šat.

₃Juohkehaš gielista lagamuččas,

sárdnu litna baksamiiguin

ja guoktilaš mielain.

₄Vare Hearrá duššadivččii

buot litna baksamiid,

juohke njuokčama

mii sárdnu stuorra sániid!

₅Sii dadjet:

“Njuovčča addá midjiide vuoimmi,

baksamat leat min beali.

Gii dalle lea min hearrá?”

₆“Vártnuheamit sordojuvvojit

ja váivvášat šuhkket,

danne mun čuožžilan”,

cealká Hearrá.

“Mun beasttán su

gii badjelgehččojuvvo.”

₇Hearrá sánit leat buhtis sánit,

dego silba, eananstáččus

ráidnejuvvon,

čieža geardái čilgejuvvon.

₈Hearrá, don várjalat min,

don gáhttet min agálaš áigái

dán soga vuostá.

₉Ipmilmeahttumat leat juohke sajis,

ja billašupmi oažžu fámu.