Apostaliid dagut 28

₁Go mii leimmet gáddjon, de oaččuimet diehtit ahte sullo namma lei Malta. ₂Suolohasat ledje midjiide hui ustitlaččat. Sii cahkkehedje dola ja bivde min buohkaid dollagáddái, danin go lei čoaskkis ja lei arvigoahtán. ₃Go Paulus čohkkii risselána ja lei bidjamin dan dollii, de gearpmaš njoamui rissiin báhkkasa geažil ja čuolastii su gihtii. ₄Go suolohasat oidne gearbmaša heaŋgámin su gieđas, de sii dadje guhtet guoibmáseaset: “Dát olmmái lea vissásit sorbmejeaddji. Son gal gáddjui mearas, muhto mávssaheami nissonipmil ii diktán su eallit.” ₅Muhto Paulus šluvgilii gearbmaša dollii, iige sutnje boahtán mihkkege vahágiid, ₆vaikko suolohasat vurde ahte Paulusa giehta bohtana dahje son fáhkkestaga gahččá jábmin. Go sii ledje vuordán guhká ja oidne ahte Paulusii ii dáhpáhuvvan mihkkege baháid, de sii bohte nuppi oaivilii ja dadje: “Son lea muhtun ipmil.”

₇Dan báikki lahka ledje gárdimat maid oamastii Publius, sullo alimus virgeolmmái. Son válddii min lusas ja attii midjiide ustitlaččat orrunsaji golmma beaivái. ₈Publiusa áhčči veallái seaŋggabuorrin; su goaluhii ja son lei luhčasis. Paulus manai su lusa, rohkadalai, bijai gieđaid su ala ja buoridii su. ₉Das maŋŋá bohte maiddái sullo eará buohccit, ja sii buorránedje. ₁₀Sii gudnejahtte dasto min máŋgga láhkái, ja go mii vulggiimet, de sii adde midjiide buot maid dárbbašeimmet.

₁₁Golmma mánu geažes mii borjáneimmet doppe skiippas mii lei leamaš sullos dálvvi. Skiipa lei aleksandrialaš, ja dan ovdastávnnis lei Jumežiid govva. ₁₂Mii olliimet Syrakusai ja oruimet doppe golbma beaivvi. ₁₃Das mii de borjáneimmet ja buvtteheimmet Regiumii. Go leimmet orron doppe beaivvi, de šattai lullebiegga, ja mii joavddaimet guovtti beaivvis Puteolii. ₁₄Doppe mii deaivvaimet vieljaid, ja sii bovdejedje min orrot lusaset vahkkui.

De mii bođiimet Romai. ₁₅Vieljat geat ásse doppe, ledje juo gullan midjiide ságaid ja bohte min ovddal gitta Forum Appii ja Tres Tabernae rádjái. Go Paulus oinnii sin, de son giittii Ipmila ja arvvosmuvai. ₁₆Go dasto leimmet ollen Romai, de Paulus oaččui lobi ássat sierranassii dainna soalddáhiin gii lei su fáktan.

₁₇Golbma beaivvi maŋŋil Paulus rávkkai lusas juvddálaččaid oaivámuččaid. Go sii ledje čoagganan, de son celkkii: “Vieljat! Mun in leat dahkan maidege min álbmoga dahje áhčiideamet vieruid vuostá, ja dattetge mun váldojuvvojin gitta Jerusalemis ja addojuvvojin romalaččaid gihtii. ₁₈Go romalaččat ledje gažadan mu, de sii livčče dáhtton luoitit mu luovus, danne go mun in lean dahkan maidege mas livččen ánssášan jápmima, ₁₉muhto juvddálaččat eai dan suovvan. Dalle mun bággehallen guoddalit iežan ášši keaisára ovdii, in dattetge danin go mus livččii mihkkege váidámušaid iežan álbmoga vuostá. ₂₀Mun lean rávkan din deike vai beasan deaivvadit ja sárdnut dinguin. Mun lean oainnat láhkkiin Israela doaivvu dihte.”

₂₁Juvddálaččat vástidedje: “Mii eat leat ožžon Judeas makkárge reivve du birra, iige ovttage vieljas gii lea fitnan dáppe, leat leamaš mihkkege baháid muitalit du birra, ii almmolaččat iige guovttá gaskan. ₂₂Muhto mii hálidit gullat dus alddát maid don oaivvildat, danin go mii leat ožžon diehtit ahte olbmot juohke báikkis vuostálastet dán sierrasearvvi.”

₂₃Go sii ledje šiehttan Paulusiin deaivvadit nuppes, de mearrebeaivvi bohte vel eanebut su orrunvissui. Árra iđida rájes gitta eahkedii son duođaštii sidjiide Ipmila riikka birra ja čilgii dan. Mosesa láhkii ja profehtaide čujuhemiin son oččodii sin oskut Jesusii. ₂₄Muhtumat sis osko su sániide, muhto earrásat eai oskon. ₂₅Sii eai boahtán ovttaide, ja go sii earránadde, de Paulus dajai dušše dáid sániid: “Dat lei riekta maid Bassi Vuoigŋa sártnui profehta Jesaja bokte din áhčiide: ₂₆Mana dán álbmoga lusa ja cealkke: Dii gullabehtet muhto ehpet ipmir, dii oaidnibehtet muhto ehpet ádde. ₂₇Dasgo dán álbmoga váibmu lea buššon. Illá sii gullet beljiiguin, ja čalmmiid sii leat čárven, nu ahte eai oainne čalmmiiguin eaige gula beljiiguin eaige ádde váimmuin eaige jorgal nu ahte mun beasan buoridit sin. ₂₈Dihtet nappo: Ipmil lea vuolggahan beastinságas báhkiniidda, ja sii maiddái gullet dan!” ₂₉Go son lei dan dadjan, de juvddálaččat vulge ja nákkáhalle garrasit guhtet guimmiineaset go manne.

₃₀Paulus orui olles guokte jagi iežas láigoviesus ja válddii vuostá buohkaid geat bohte su ságaide. ₃₁Son sárdnidii Ipmila riikka ja oahpahii roahkkatvuođain olbmuid dovdat Hearrá Jesus Kristusa, iige oktage su cakkadan.