Apostaliid dagut 27

₁Go lei mearriduvvon ahte mii vuolgit borjjastemiin Italiai, de Paulus ja muhtun eará fáŋggat addojuvvojedje Juliusa, keaisárlaš soahteveaga čuohtásaoaivámučča, háldui. ₂Mii lávkiimet adramyttionlaš skiipii mii galggai borjjastit Asia hápmaniidda, ja vulggiimet. Min mielde lei makedonialaš Aristarkos, Tessalonika olmmoš. ₃Nuppi beaivvi mii olliimet Sidonii, ja Julius gii meannudii Paulusiin ustitlaččat, divttii su galledit ustibiiddis ja oažžut maid dárbbašii.

₄Go mii vulggiimet doppe, de mii borjjasteimmet vuostebiekka dihte Kyprosa mieđabeale, ₅de rastá ábi Kilikia ja Pamfylia meaddel ja bođiimet Myrai Lykias. ₆Doppe čuohtásaoaivámuš gávnnai aleksandrialaš skiippa mii lei vuolgimin Italiai, ja bijai min dasa.

₇Máŋga beaivvi mii borjjasteimmet hui hihtásit ja illá joavddaimet Knidosa buohta. Go biegga hehttii min beassamis dan guvlui gosa áigguimet, de mii doalaimet Salmone njárgga meaddel Kreta mieđabeallái. ₈Illá mii beasaimet sullo gáddeguora ja bođiimet dasto báikái man namma lea “Buorit hápmanat”. Dat lea lahka Lasea gávpoga.

₉Mii leimmet mátkkoštan juo guhká ja lei juo maŋŋil fástobeaivvi, ja šaddagođii váralaš borjjastit. Danne Paulus neavvui earáid: ₁₀“Olbmát, mun oainnán ahte min borjjasteapmi šaddá lihkuhisvuohtan gálvvuide ja skiipii ja heakkavárran midjiide.” ₁₁Čuohtásaoaivámuš jáhkii eambbo skiippa stivrejeaddjái ja eaiggádii go dasa maid Paulus dajai. ₁₂Ja go hápman ii heiven dálveorrunsadjin, de eanas dáhtto borjjastit ovddos ja geahččalit ollet Foiniksii ja orrut doppe dálvvi. Foiniks lea Kreta hápman mii lea máttaoarjjás ja davveoarjjás.

₁₃Go de biekkastii máttil, de sii gádde sáhttit dahkat nugo áigo, gesse áŋkoriid ja borjjastedje aiddo Kreta gáddeguora. ₁₄Muhto ii guhká das maŋŋil, de šattai garra riđđubiegga mii gohčoduvvo nuortadavádahkan. ₁₅Skiipa rievddai iige báitán biekka vuostá, ja mii vuolláneimmet ja divttiimet skiippa rievdat. ₁₆Mii bođiimet muhtun sulloža vuollái man namma lei Kauda, ja illá oaččuimet skiipafatnasa háldoseamet. ₁₇Go fanas lei gessojuvvon bajás, de mearraolbmát ripme giessat oara fatnasa birra. Go sii balle skiippa rievdamis Syrteluovtta sáttonjuoraid njeaiga, de sii luite borjasiid, ja nu skiipa rievddadii. ₁₈Go riđđudálki ain heađuštii min skiippa garrasit, de nuppi beaivvi olbmát bálkugohte gálvvuid áhpái, ₁₉ja goalmmát beaivvi sii iežaset gieđaiguin bálko áhpái maiddái skiipagálvvuid. ₂₀Máŋgga beaivái mii eat oaidnán beaivváža eatge násttiid, ja go garra dálki ain čuzii, de mis maŋimuš nogai buot doaivu gáddjomis.

₂₁Muhto dalle, go mii eat lean sáhttán oppa borratge guhkes áigái, de Paulus čuožžilii olbmáid gaskii ja dajai: “Olbmát, dii livččiidet galgan jeagadit mu ehpetge vuolgit Kretas. Dalle dii livččiidet vealtan dán lihkuhisvuođas ja vahágis. ₂₂Muhto dál mun ávžžun din leat arvvot mielas. Ii oktage dis heavvan, dušše skiipa duššá. ₂₃Mannan ija mu bálddas čuoččui dan Ipmila eŋgel geasa mun gulan ja gean mun bálvalan, ja celkkii: ₂₄‘Ale bala, Paulus. Don beasat čuožžut keaisára ovddas, ja Ipmil lea addán dutnje dan attáldaga ahte maiddái du mátkeguoimmit gáddjojit.’ ₂₅Lehket dan dihte arvvot mielas! Mun oskkun Ipmilii ja jáhkán ahte nu geavvá go munnje lea daddjojuvvon. ₂₆Muhto muhtun sullui mii gal rievdat.”

₂₇Go mii leimmet rievddadan Adriaábis njealljenuppelohkái jándora, de gaskaija áigge mearraolbmát árvidedje ahte lahkoneimmet gáddái. ₂₈Sii mihtidedje bodni, ja čikŋodat lei guoktelogi sala, ja go sii oanehis áiggi geažes mihtidedje ođđasis, de čikŋodat lei vihttanuppelohkái sala. ₂₉Mearraolbmát balle rievdamis njuora njeaiga, ja sii vuolidedje njeallje áŋkora maŋŋestávnnis ja sávve ahte čuvggodivččii. ₃₀Sii geahččaledje vuolgit suoli fatnasis ja luite fatnasa čáhcái, vai mahkáš besset vuolidit áŋkoriid ovdastávnnis. ₃₁Muhto Paulus dajai čuohtásaoaivámužžii ja soalddáhiidda: “Jos dot olbmát eai biso skiippas, de dii ehpet sáhte gáddjot.” ₃₂Dalle soalddáhat botkejedje fatnasa báttiid ja luite dan rievdat.

₃₃Ovdalaš čuvggodeami Paulus ávžžuhii sin buohkaid boradit. Son dajai: “Dii lehpet leamaš borakeahttá njealljenuppelohkái beaivvi ehpetge leat návddašan maidege. ₃₄Danin mun neavvun din dál boradit; dat lea dárbbašlaš, vai gáddjobehtet. Ii oktage dis masse vuoktačalmmige oaivvis.” ₃₅Go Paulus lei dan dadjan, de son válddii láibbi, giittii Ipmila buohkaid oaidnut, doadjalii láibbi ja borragođii. ₃₆Dalle maiddái earát arvvosmuvve ja borragohte. ₃₇Mii leimmet fatnasis oktiibuot guoktečuođi čiežalogiguđas. ₃₈Go olbmot ledje gallánan, de sii bálko áhpái gordneseahkaid, vai skiipa geahppu.

₃₉Go iđit šattai, de mearraolbmát eai dovdán eatnama, muhto sii áice rittus vági, ja dohko sii geahččaledje rievddahit fatnasa. ₄₀Sii botkejedje áŋkorbáttiid ja dikte áŋkoriid vuodjut merrii, ja go velá stivrranbáttitge ledje čovdojuvvon, de sii gesse ovdageašborjasa bajás ja dolle biekka mielde vági guvlui. ₄₁Skiipa rievddai sáttonjuora njeaiga man goappáge bealde lei čieŋal, ja cohkkui dasa. Ovdastávdni čuoggasii njurrii ja darvánii dasa, ja bárut cuvkegohte skiippa maŋŋegeaži. ₄₂Soalddáhat áigo dalle goddit fáŋggaid, vai ii oktage beasa vuodjalit báhtarussii. ₄₃Čuohtásaoaivámuš goit cakkai sin áigumuša, danin go son dáhtui gádjut Paulusa. Son gohčui daid geat máhtte vuodjat, njuiket čáhcái vuosttažin ja viggat gáddái, ₄₄ja sin maŋis earáid fielluid dahje eará skiipabihtáid veagas. Ja nu buohkat besse dearvan gáddái.