1. Korinta 11

₂Mun rámidan din go dii álo muitibehtet mu ja doallabehtet daid oahpahusaid maid mun lean ovddidan didjiide. ₃Dii fertebehtet diehtit ahte Kristus lea juohke olbmá oaivi, olmmái lea nissona oaivi ja Ipmil lea Kristusa oaivi. ₄Jos olmmái rohkadallá dahje profehtastallá gahpir oaivvis, de son heahppášuhttá oaivvis. ₅Muhto jos nisson rohkadallá dahje profehtastallá rabas oivviid, de son heahppášuhttá oaivvis, dasgo dat lea seammá go son livččii čuohpahan vuovttaidis. ₆Jos nisson ii govčča iežas oaivvi, de son sáhttá seammá bures čuohpahit vuovttaidis. Muhto jos nissonii lea heahpadin čuohpahit vuovttaidis dahje ráhkehit oaivvis, de son galgá gokčat oaivvi. ₇Olmmái ii oaččo gokčat oaivvi, danne go son lea Ipmila govva ja gudni, muhto nisson lea olbmá gudni. ₈Dasgo olmmái ii boahtán nissonis, muhto nisson olbmás, ₉iige olmmái sivdniduvvon nissona dihte, muhto nisson olbmá dihte. ₁₀Danne nisson galgá atnit oaivvis vuoigatvuođa mearkka eŋgeliid dihte. ₁₁Hearrá siste ii almmatge leat nisson almmá olbmá haga iige olmmái almmá nissona haga, ₁₂danne go nugo nisson lea boahtán olbmás, nu olmmáige lea riegádan nissonis. Muhto buot lea boahtán Ipmilis.

₁₃Árvalehket ieža: Heivego ahte nisson rohkadallá Ipmila gahperkeahttá? ₁₄Almma luonduge oahpaha didjiide ahte olbmái guhkes vuovttat leat heahpadin, ₁₅muhto nissonii gudnin. Guhkes vuovttat leat addojuvvon nissonii suokkan. ₁₆Jos muhtumis lea miella nágget vuostá, de mun dajan sutnje ahte ii mis iige Ipmila searvegottiin muđuige leat eará vierru.

₁₇Go mun attán dáid neavvagiid, de mun ferten cuiggodit din das ahte din čoagganeamit leat didjiide ovdal vahágin go buorrin. ₁₈Vuosttažettiin mun lean gullan ahte searvegotti čoagganemiin dis lea soahpameahttunvuohta, ja muhtun muddui mun dan jáhkánge. ₁₉Din gaskkas gal fertejit leat sierrasearvvit, vai šaddá almmusin, guđemuččaide dis sáhttá luohttit. ₂₀Din čoagganeamit eai leat Hearrá mállásiid rievttes návddašeamit, ₂₁danne go juohkehaš borrá iežas borramušaid, ja nu nubbi nealgu ja nubbigis juhkaluvvá. ₂₂Ehpetgo dii sáhte borrat ja juhkat ruovttus? Vai badjelgeahččabehtetgo dii Ipmila searvegotti go heahppášuhttibehtet daid geain ii leat maid borrat? Maid mun galggašin dadjat didjiide? Galggašingo mun rábmot din? Dán áššis mun in din rábmo.

₂₃Mun lean ožžon Hearrás dan maid lean maiddái oahpahan didjiide: Hearrá Jesus, dan ija go son behttojuvvui, válddii láibbi, ₂₄giittii Ipmila, doadjalii láibbi ja celkkii: “Dát lea mu rumaš mii addojuvvo din ovddas. Dahket dán, vai muitibehtet mu.” ₂₅Seammá láhkái son válddii geara mállásiid maŋŋil ja celkkii: “Dát gearra lea ođđa lihttu mu varas. Nu dávjá go dii dan juhkabehtet, de dahket dan, vai muitibehtet mu.”

₂₆Nu dávjá go dii borrabehtet dán láibbi ja juhkabehtet dán geara, de dii gulahehpet Hearrá jápmima, dassážii go son boahtá. ₂₇Danne dat gii borrá dán láibbi ja juhká Hearrá geara dohkkemeahttumit, sudduda Hearrá rupmaša ja vara vuostá. ₂₈Guorahallos juohkehaš iežas, ovdal go borrá dán láibbi ja juhká dán geara. ₂₉Gii borrá ja juhká iige jurddaš ahte dat lea Jesusa rumaš, dat borrá ja juhká alccesis duomu. ₃₀Dan dihte din gaskkas leat ollu heajut ja buohccit, ja eatnagat leat juo oađđán jápmimii. ₃₁Jos mii guorahalašeimmet iežamet, de mii eat dubmejuvvoše. ₃₂Go Hearrá dubme min, de dat lea midjiide bagadussan, vai mii eat dubmejuvvo oktanaga máilmmiin.

₃₃Vieljažiiddán, go dii nappo čoagganehpet boradit, de vurdet guhtet guimmiideattet. ₃₄Jos muhtun nealgu, de son galgá boradit ruovttus, vai din čoagganeamit eai buvtte didjiide duomu. Eará áššiin mun neavvun din dalle go boađán.