Markus 12

₁Jeesus sárnuškuođij sijjân viärdádâsâiguin:

»Almai ištâdij viinikäärdi, raahtij ääiđi ton pirrâ, ruugâi källei viinituolmâmsaje já huksij vahtimtoornâ. Talle sun laiguuttij käärdi viiniviljâleijeid já jieš sun varrij meddâl enâmist.

₂Sooppum ääigi sun vuolgâttij palvâleijeidis viinikäärdi viljâleijei kuuvl vâi finniiččij sist uási käärdi valjeest. ₃Mut taah valdii almaa kiddâ, caimii suu já vuolgâttii maassâd kuárus kieđâi. ₄Omâsteijee vuolgâttij sii kuuvl nube palvâleijee, mut taam-uv sij čoskii uáiván já hepâšuttii. ₅Sun vuolgâttij oppeet uđđâ palvâleijee, já taam sij kuddii. Siämmáánáál keevâi čuávuváid-uv: motomijd sij caimii, motomijd kuddii. ₆Tääl lâi pááccám tuše ohtâ, suu rähis alge. Taam sun vuolgâttij laiguutteijei kuuvl majemužžân já jurdâččij: ’Muu jieččân aalgan sij iä aainâs tuostâ kuoskâđ.’ ₇Mut taah ettii kuáimásis: ’Sun lii árbálâš. Mij koddep suu, te uážžup suu äärbi.’ ₈Sij valdii suu kiddâ, kuddii suu já leggistii olgos viinikäärdist.

₉»Maid viinikäärdi omâsteijee tääl parga? Sun puátá já koddá tuoid viljâleijeid já addel viinikäärdis iärrásáid. ₁₀Leppeđ vissâ luuhâm čalluin taam saje:

₁₂Rääđi jesâneh liččii halijdâm väldiđ Jeesus kiddâ, tastko sij iberdii, et Jeesus lâi viärdádâsâstis sárnum sist. Mut tastko sij pollii aalmugist, sij tiptii suu orroođ já vuolgii meddâl.

₁₃Talle sij vuolgâttii motomijd fariseusijd já Herodes kyeditteijeid Jeesus kuuvl vâi fattiiččii suu sanij peht. ₁₄Taah pottii já ettii sunjin: »Máttáátteijee, mij tiettip, et tun lah vuoigâlâš jiehke tipte ulmui uáinuid stivriđ jieččâd. Tun jieh toovâ iäru ulmui kooskâst, pic máttááttâh Immeel kiäinu tuotâvuođâ mield. Lii-uv olmânáál mäksiđ kiäisárân viäru vâi ij? Kolgâp-uv mij mäksiđ vâi ep?»

₁₅Jeesus tieđij, et sij tohâluddeh já eeđâi: »Mondiet tij keččâlâdvetteđ muu? Čäittiđ munjin deenaar ruuđâ.» ₁₆Sij čaittii ruuđâ, já sun koijâdij: »Kiän kove já nommâ tast lii?» »Kiäisár», sij västidii. ₁₇Talle Jeesus eeđâi sijjân: »Adeliđ kiäisárân mii kiäisárân kulá já Imelân mii Imelân kulá.» Taat vástádâs hiämáskitij sii.

₁₈Talle Jeesus kuuvl pottii saddukeuseh, kiäh kieldii pajaspajanem. Sij koijâdii sust: ₁₉»Máttáátteijee, Mooses lii čáállám näävt: ’Jis kiännii viljâ jáámá já sust páácá kálgu mut ij pärni, te kalga taat almai väldiđ viiljâs káálgu já adeliđ viljâsis maajeeldpuáttee.’ ₂₀Lijjii čiččâm viljâžid. Puárásumos sist vaaldij káálgu já jaamij maajeeldpuátteittáá. ₂₁Talle nubbe vaaldij leeskâ, mut sun-uv jaamij maajeeldpuátteittáá. Siämmáánáál keevâi kuálmádân ₂₂já puohháid čiččâmân: sist iä pááccám maajeeldpuátteeh. Puoh majemužžân jaamij nissoon. ₂₃Ko sij pajaspajanem peeivi pajaneh jämimist, kiän kálgu sun talle lii? Sunhân lii lamaš puohâi čiččâmâs kálgu.»

₂₄Jeesus västidij sijjân: »Tij leppeđ čájádâm, tastko tij eppeđ tuubdâ čalluid eppeđge Immeel vyeimi. ₂₅Jämimist pajaneijeeh iä vääldi káálgu iäge riemâ kálgun pic láá tego eŋgâleh almeest. ₂₆Já ko tääl mij sárnup jáámmám ulmui pajaspaijaanmist – eppeđ-uv tij lah luuhâm Mooses kirje čalluu pyellee miestust? Tast Immeel sárnu Moosesân já iätá: ’Mun lam Áábráhâm Immeel, Issáák Immeel já Jáákkup Immeel.’ ₂₇Ij sun lah jáámmám ulmui Immeel, pic ellee ulmui. Tij leppeđ čuuvtij čájádâm.»

₂₈Mottoom laavâmáttáátteijee lâi čuávvum sii nágáttâllâm já huámmášâm, mon šiev vástádâs Jeesus adelij saddukeusáid. Sun poođij tääl Jeesus kuuvl já koijâdij: »Mii pákkumijd lii puoh tehelumos?» ₂₉Jeesus västidij: »Tehelumos lii taat: ’Kuulâ Israel: Hiärrá, mii Immeel, lii áinoo Hiärrá. ₃₀Räähist Hiärá, Imelâd, ubâ váimustâd, ubâ siälustâd já mielâstâd já ubâ vuoimijnâd.’ ₃₁Nubbe lii taat: ’Räähist aldemud nuuvtko jieččâd.’ Tađe stuárráábeh pákkumeh iä lah.» ₃₂Laavâmáttáátteijee eeđâi sunjin: »Tun lah vuoigist, máttáátteijee! Tuođâ sarnuh, ko ettih, et Hiärrá lii áinoo Immeel, iä lah iärráseh ko sun. ₃₃Já ko räähist suu ubâ váimustis, puoh jiermijnis já puoh vuoimijnis já räähist aldemuu nuuvtko jieijâs, te tot lii eenâb ko puáldimuhreh já puoh eres uhreh.» ₃₄Jeesus ooinij, et sun västidij vijsáht já eeđâi sunjin: »Tun jieh lah kukken Immeel väldikoddeest.»

Kihheen ij innig tuostâm koijâdiđ Jeesusist maiden.

₃₅Temppâlist máttátdijn Jeesus koijâdij: »Maht laavâmáttáátteijeeh pyehtih ettâđ, et Messias lii Taavvid alge? ₃₆Taavvid jieš lii Pase Jiegâ vaikuttâsâst ettâm:

Stuorrâ aalmugjuávkku kuldâlij Jeesus mielâstis. ₃₈Máttátdijnis sun eeđâi näävt: »Váruttiđ laavâmáttáátteijein! Sij joteh mielâstis kuhes kiessâmpihtâsist já vyerdih, et ulmuuh tiervâtteh sii markkânijn. ₃₉Sij väldideh ovdemuid peeŋkâid synagogast já kunneesoojijd tuáluin. ₄₀Sij nisteh leeskâin tááluid já loheh kuhes rukosijdis tuše uáinim tiet. Tađe äŋgirub lii sii puátteš tuámu.»

₄₁Jeesus čokánij uhrečuhe puotâ já keejâi, maht ulmuuh pieijii toos ruuđâ. Maaŋgah riggáh adelii ennuv. ₄₂Talle poođij kievhis leskâkálgu já piejâi čuukán kyehti uccâ šlanttii, ohtsis veškišlaanti verd. ₄₃Jeesus kočoi máttááttâspárnáid jieijâs kuuvl já eeđâi sijjân: »Tuođâi: taat kievhis leskâ piejâi uhrečuukán eenâb ko ohtâgin eres. ₄₄Puoh iäráseh adelii lijgestis, mut sun adelij vänistis. Puoh mii sust lâi, puoh maid sun tarbâšij eellim várás.»