Markus 10

₁Jeesus vuolgij tobbeen já juuđij Jordan nuorttiipele Juudea kuávlun. Suin juuđij tääl-uv stuorrâ olmoošjuávkku, já vyevis mield sun máttááttij sii.

₂Suu kuuvl pottii meiddei fariseuseh, kiäh halijdii keččâlâddâđ suu já tondiet koijâdii, uážžu-uv almai hilgođ káálgus. ₃Sun västidij sijjân: »Maid Mooses lii tast pákkum?» ₄Sij ettii: »Mooses adelij mijjân love čäälliđ iärukirje já hilgođ káálgu.» ₅Talle Jeesus eeđâi: »Tij leppeđ korrâváimusiih, tondiet sun adelij tijjân tom pákkum. ₆Mut maailm aalgâst Immeel sivnedij ulmuu almajin já nisonin. ₇Tondiet almai kuáđá eejis já eenis já ohtân kálgusis, ₈nuuvt et taah kyevtis puáttiv ohtân uážžin. Suoi iävá lah innig kyevtis, suoi lává ohtâ. ₉Já mon Immeel lii ovtâstâm, tom iälus olmooš iärut.»

₁₀Ko sij lijjii koskânis, te máttááttâspárnááh koijâdii uđđâsist taan ääšist. ₁₁Jeesus eeđâi sijjân: »Tot, kote hilgo káálgus já náájá nubbijn, lii näimirikkoo já parga puástud káálgus kuáttá. ₁₂Já jis kálgu hilgo kállás já náájá nubbijn, te sun še taha näimirikkoos.»

₁₃Jeesus kuuvl puáhtojii párnááh, vâi sun kuoskâččij sijjân. Máttááttâspárnááh nuttâlii pyehteid, ₁₄mut ko Jeesus huámmášij tom, sun njunádui já eeđâi sijjân: »Tipteđ párnáid puáttiđ muu kuuvl, elleđ eesti sii. Sii sullâsij lii Immeel väldikodde. ₁₅Tuođâi: kote ij vääldi Immeel väldikode vuástá tego pärni, sun ij tohon peesâ.» ₁₆Sun vaaldij párnáid askasis, piejâi kieđâidis sii oolâ já sivnedij sii.

₁₇Ko Jeesus vuolgij juátkiđ määđhis, te mottoom almai poođij kaačân, luáštádâđâi idduidis oolâ suu oovdân já koijâdij: »Pyeri máttáátteijee, maid mun koolgâm porgâđ, et mun arbiiččim avalii eellim?» ₁₈Jeesus västidij sunjin: »Mondiet tun kočoh muu pyerrin? Tuše Immeel lii pyeri, ij kihheen eres. ₁₉Pákkumijd tun tiäđáh: ele kode, ele toovâ näimirikkoos, ele suáláád, ele eeđâ puástutuođâštâs, ele niste nubbeest, kunnijât iäččád já iännád.»

₂₀»Máttáátteijee, puoh taam mun lam nuávdittâm nuorâvuođâ rääjist», västidij almai. ₂₁Jeesus kejâstij sunjin rähisvuođáin já eeđâi: »Ohtâ tust váilu. Moonâ já vyebdi puoh, mii tust lii, já adde ruuđâid kievhijd, te tust lii aarni almeest. Puáđi talle já čuávu muu.» ₂₂Almai šlundoi täin saanijn. Sun vuolgij murâšlâžžân meddâl, tastko sust lâi ennuv omâdâh.

₂₃Jeesus jorgettij, keejâi máttááttâspárnáidis já eeđâi: »Mon väädis toid liigin, kiäh ennuv omâsteh, peessâđ Immeel väldikoodán!» ₂₄Máttááttâspárnááh imâštellii suu saanijd, mut Jeesus joođhij: »Párnááh, Immeel väldikoodán lii tuođâi vaigâd peessâđ. ₂₅Älkkeb lii kamelist moonnâđ äimičalme čoođâ ko riggást peessâđ Immeel väldikoodán.» ₂₆Máttááttâspárnááh imâštellii ain eenâb já koijâdellii kyeimistis: »Kii te puáhtá piäluštuđ?» ₂₇Jeesus keejâi sijjân já eeđâi: »Ulmui tot lii máhđuttem, mut ij Imelân. Imelân lii puoh máhđulâš.»

₂₈Talle Piättár sárnuškuođij já koijâdij: »Nabai mij? Mij lep kuáđđám puoh já čuávvum tuu.» ₂₉Jeesus västidij: »Tuođâi: kii ihenis muu tiet já ilosaavâ tiet lii luoppâm tálustis, viljâinis teikâ obijnis, enistis, ejistis teikâ párnáinis teikâ piälduinis, ₃₀sun finnee čyetikiärdásávt maassâd. Taan maailmist sun finnee tááluid, viiljâid já oobijd, eenijd já párnáid já piälduid – já vala vajedem-uv – já avalii eellim puáttee maailmist. ₃₁Mut maaŋgah vuosmuuh šaddeh majemužžân já majemuuh vuosmužžân.»

₃₂Ko sij tastoo korŋuu Jerusalemân mannee luodâ, te Jeesus juuđij iärrásij ovdiibeln. Máttááttâspárnááh lijjii hiämáskâm, já sii maajeeld jottee ulmuuh polâškuottii. Talle Jeesus kočoi jieijâs kyehtnubáloh máttááttâspärnid vuod jieijâs kuuvl já sárnuškuođij sijjân tast, mii sunjin koolgâi tábáhtuđ: ₃₃»Mij moonnâp tääl Jerusalemân, já Ulmuu Alge adeluvvoo ollâpaapâi já laavâmáttáátteijei kieđáid. Sij tyemmejeh suu jämimân já luovâtteh suu pähináid, ₃₄já taah pilkkedeh já čolgeh já ruáiskuh suu já koddeh suu. Mut sun paijaan jämimist kuulmâ peeivi keččin.»

₃₅Jáákkup já Juhánâs, Sebedeus algekyevtis, poođijn Jeesus kuuvl já eeđáin: »Máttáátteijee, muoi ánuččáim tust. Mieđahhân toos.» ₃₆»Maid tuoi haalijdvettee muu porgâđ?» Jeesus koijâdij. ₃₇Suoi västidáin: »Ko tuu kirkkâdvuotâ puátá, te adde munnuu čokkáđ paldâstâd, nubbe uálgispeln já nubbe čižetpeln.» ₃₈Jeesus eeđâi sunnui: »Tuoi eppee tieđe, maid tuoi táttuvettee. Lii-uv tunnust tom ceerhi juhhen, maid mun juuvâm? Pyehtivettee-uv tuoi väldiđ tom kaastâ, moin mun kastuum?» ₃₉»Pyehteen», suoi västidáin. Talle Jeesus eeđâi sunnui: »Tom ceerhi, mon mun juuvâm, tuoi vala juhâvettee-uv, já toin kastáin, moin mun kastuum, kastuuvettee tuoi-uv. ₄₀Mut mun jiem meerrid tast, kii čokkáá muu uálgispeln já kii čižetpeln. Toh sajeh láá toi várás, kiäid toh láá uáivildum.»

₄₁Ko toh loves kullii täst, te sij suttii Jáákkupân já Juhánâsân. ₄₂Mut Jeesus kočoi sii puáttiđ jieijâs kuuvl já eeđâi: »Tij tietivetteđ, et toh, kiäh láá haldâšeijee saajeest, láá almugij hiäráh, já eennâm pajemuuh tuálih almugijd jieijâs vääldi vyelni. ₄₃Toin naalijn ij uážu leđe tii juávhust. Tot kote áigu tii juávhust šoddâđ styeresin, tot liävus nubij palvâleijee, ₄₄já tot kote áigu šoddâđ tii juávhust vuosmužžân, tot liävus puohâi uárji. ₄₅Ij Ulmuu Algegin puáttám palvâluđ, pic jieš palvâliđ nuubijd já adeliđ jiegâs lonástâssân puohâi peeleest.»

₄₆Sij pottii Jerikon. Talle ko Jeesus vuolgij kaavpugist máttááttâspárnáidiskuin já stuorrâ olmoošjuávkku čuávui sii, te luoddâpiällást čokkái čalmettes kerjideijee Bartimaios, Timaios alge. ₄₇Ko sun kuulâi, et lappâdmannee lâi Jeesus Nasaretlâš, te sun čuárvuškuođij: »Jeesus, Taavvid Alge, äärmit muu!» ₄₈Maaŋgah kuččuu suu orroođ joskâ, mut sun čuárvui ain korrâsubbooht: »Taavvid Alge, äärmit muu!» ₄₉Talle Jeesus orostij já eeđâi: »Koččođ suu teehi.» Sij monnii koččođ čalmettes almaa já ettii sunjin: »Ele poolâ. Čyežžil, sun koččo tuu.» ₅₀Almai nuolâstij olgopihtâsis pajalist, čyežžilij huápust já poođij Jeesus kuuvl. ₅₁»Maid tun halijdah muu porgâđ tunjin?» Jeesus koijâdij. Čalmettes almai västidij: »Rabbuuni, adde munjin uáinu.» ₅₂Talle Jeesus eeđâi sunjin: »Moonâ, oskod lii pyeredâm tuu.» Siämmást almai oppeet uáiniškuođij, já sun čuávuškuođij Jeesus luodâ mield.