Matteus 21

₁Ko sij aldanii Jerusalem já lijjii puátimin Betfagen Oljovääri oolâ, Jeesus vuolgâttij oovdeld kuáhtás suu máttááttâspárnáin ₂já eeđâi sunnui: »Mannee tuon siijdân. Tobbeen lii niŋálâsaasi čonnum kiddâ já vársá ton paaldâst; kavnâvettee taid tállân. Väldee taid tast já pyehtee munjin. ₃Jis kiinii iätá tunnui maidnii, te västidee, et Hiärrá taarbâš taid mut maaccât taid forgâ.»

₄Näävt tábáhtui, vâi olášuuččij taat proofeet sääni:

₆Máttááttâspäärnikyevtis vuolgijn já porgáin tego Jeesus lâi koččom. ₇Suoi puovttijn aasi já vársá já piejáin toi siälgán pihtâsijdis, já Jeesus čokánij aasi siälgán. ₈Ulmuuh lijjii hirmâd ennuv, já sij lebbejii pihtâsijdis pálgá oolâ, iäráseh čuoppii muorâin oovsijd já lebbejii taid pálgá oolâ. ₉Já olmoošjuávkku, mii juuđij suu oovdâst já maajeeld, čuárvui:

₁₀Ko sun poođij Jerusalemân, te ubâ kaavpug liihâdškuođij já puohah koijâdellii: »Kii sun lii?» ₁₁Ulmuuh ettii: »Sun lii Jeesus, proofeet Galilea Nasaretist.»

₁₂Jeesus moonâi temppâlân já vuájálitij puoh vyebdeid já uásteid tobbeen olgos. Sun komettij ruttâlonotteijei peevdijd já tuvváávyebdei stoovlijd ₁₃já eeđâi sijjân: »Lii čallum: ’Muu viste kalga leđe ruhâdâsviste.’ Mut tij rähtivetteđ tast riävárij piäju.»

₁₄Jeesus kuuvl temppâlân pottii čalmettemeh já likkušeh, já sun pyeredij sii. ₁₅Mut ko ollâpaapah já laavâmáttáátteijeeh oinii, maid puoh hiämáskitteid sun poorgâi, já kullii párnáid čuárvumin temppâlist: »Hoosianna, Taavvid Alge!», sij suttii ₁₆já ettii sunjin: »Kuulah-uv tun maid tuoh čuárvuh?» »Kuulâm», Jeesus västidij. »Eppeđ-uv tij lah kuássin luuhâm taam sääni: ’Párnái já njammei njäälmist tun lah haahâm kijttosâd’?» ₁₇Sun kuođij sii toos, moonâi kaavpug ulguubel Betanian já ijâstâlâi tobbeen.

₁₈Ko Jeesus tooláá iđedist lâi maccâmin kaavpugân, te sunjin šoodâi nelgi. ₁₉Sun ooinij luoddâpiällást viigunmuorâ já moonâi tutkâđ tom, mut ij kavnâm tast muide ko loostâid. Talle sun eeđâi muorân: »Kuássin jieh innig räähti heeđâlm.» Ton siämmást viigunmuorâ kuuškâi.

₂₀Ko máttááttâspárnááh tom oinii, sij hiämáskii já ettii: »Maht tuot muorâ nuuvt jotelávt kuuškâi?» ₂₁Jeesus västidij: »Tuođâi: jis tist ličij osko eppeđge epidiččii, te tij eppeđ tuš porgâččii taam viigunmuorân, pic tij puávtáččijd ettâđ taan váárán-uv: ’Paijaan sajestâd já ruámččáá meerân’, já nuuvt tábáhtuuččij. ₂₂Puoh maid tij ánuvetteđ oskoost ruhâdâlmáin, tij uážžuvetteđ.»

₂₃Ko Jeesus lâi moonnâm temppâlân já máttááttij tobbeen, tohon pottii ollâpaapah já aalmug puárásumoseh. Sij koijâdii: »Moin valdijn tun tágárijd poorgah? Kii tunjin lii adelâm taam vääldi?» ₂₄Jeesus västidij sijjân: »Mun-uv koijâdâm tist maidnii. Jis tij västidvetteđ toos, te mun pelestân eeđâm, moin valdijn mun puoh taam poorgâm. ₂₅Kost Juhánâs kaastâ lâi vuálgus? Almeest vâi ulmuin?»

Sij ráđádellii koskânis: »Jis mij ettâp: ’Almeest’, sun iätá mijjân: ’Mondiet tij talle eppeđ oskom suu?’ ₂₆Jis mij vest ettâp: ’Ulmuin’, te mij uážžup poollâđ aalmugist, tastko puohah aneh Juhánâs profetin.» ₂₇Nuuvt sij västidii Jeesusân: »Mij ep tieđe.» Talle Jeesus eeđâi: »Jiem mungin talle eeđâ tijjân, moin valdijn mun puoh taam poorgâm.»

₂₈»Maid tij täst etâvetteđ? Mottoom almast láin kyehti alge. Sun moonâi nube kuuvl já eeđâi: ’Algam, moonâ onne viinikáárdán paargon.’ ₂₉’Jiem mun haalijd’, alge västidij. Maŋeláá sun kuittâg kaađâi já moonâi.

₃₀»Eeči moonâi nube alge kuuvl já eeđâi sunjin siämmáánáál. Alge västidij: ’Mun moonâm kale, eeči’, mut ij moonnâmgin. ₃₁Kuábáš taan kuáhtást poorgâi, maid suu eeči táátui?»

»Oovdeb», sij västidii.

Jeesus eeđâi:

»Tuođâi: huárásteijeeh já publikaaneh maneh Immeel väldikoodán ovdil ko tij. ₃₂Juhánâs leehâi tijjân vanhurskesvuođâ kiäinu, mut tij eppeđ oskom sunjin. Mut huárásteijeeh já publikaaneh uskuu, já veik tij tom ooinijd, tij eppeđ maŋagin kaattâm eppeđge oskom sunjin.

₃₃»Kuullâđ nube viärdádâs. Lâi iššeed, kote ištâdij viinikäärdi, raahtij ääiđi ton pirrâ, ruugâi källei viinituolmâmsaje já huksij vahtimtoornâ. Te sun laiguuttij käärdi viiniviljâleijeid já varrij jieš meddâl enâmist.

₃₄»Ko heđâlmij nuurrâmäigi poođij, te sun vuolgâttij palvâleijeidis peerrâđ viinikäärdi viljâleijein sunjin kullee uási šaddoost. ₃₅Mut taah valdii palvâleijeid kiddâ. Mottoom sij caimii, mottoom kuddii, mottoom keđgejii. ₃₆Iššeed vuolgâttij uđđâ palvâleijeid, eenâb ko vuosmuu keerdi, mut sijjân keevâi siämmáánáál. ₃₇Viijmâg sun vuolgâttij laiguutteijei kuuvl algees já jurdâččij: ’Muu aalgan sij iä kuittâg tuostâ kuoskâđ.’ ₃₈Mut ko taah oinii alge, sij ettii kuáimásis: ’Sun lii árbálâš. Mij koddep suu, te mij uážžup suu äärbi.’ ₃₉Sij valdii suu kiddâ, viešidii suu olgos viinikäärdist já kuddii suu.

₄₀»Ko viinikäärdi omâsteijee puátá, maid sun taha tuoid viljâleijeid?»

₄₁Sij västidii: »Sun addel tuoid paaid paas loopâ já laaigut käärdi eres viljâleijeid, kiäh toimâtteh sunjin kullee šado meriääigi.»

₄₂Jeesus eeđâi sijjân:

»Eppeđ-uv tij lah kuássin čalluin luuhâm:

₄₃»Taan tiet mun eeđâm tijjân, et Immeel väldikodde váldoo tist meddâl já adeluvvoo aalmugân, kote ráhtá ton heđâlmijd. ₄₄Kote vierrâl taan kiäđgán, tot lammâšuvá, mut kiän oolâ taat keđgi vierrâl, tom tot mottee.»

₄₅Ko ollâpaapah já fariseuseh kullii täid viärdádâsâid, sij iberdii, et Jeesus sáárnui sist. ₄₆Sij lijjii halijdiđ väldiđ suu kiddâ mut pollii aalmugist, tastko tot oonij suu profetin.