Matteus 20

₁»Oolmij väldikode puáhtá verdidiđ išedân, kote tooláá iđedist vuolgij pálkkááttiđ pargeid viinikárdásis. ₂Sun soovâi almaiguin oovtâ deenaar peivipäälhist já vuolgâttij sii viinikáárdán. ₃Peeivi kuálmád tiijme ääigi sun vuolgij oppeet olgos já ooinij, et kävppišiljoost čuožžuu vala almaah jyevdilâssân. ₄’Moonnâđ tij-uv viinikáárdán’, sun eeđâi sijjân, ’mun máávsám tijjân tom, maid kulá mäksiđ’. ₅Almaah vuolgii. Kuuđâd já oovcád tiijme ääigi iššeed oppeet vuolgij olgos já poorgâi siämmáánáál. ₆Ko sun moonâi olgos ohtnubálovváád tiijme jođedijn, te sun ooinij vala-uv motomijd jyevdilâsâid já koijâdij sist: ’Mondiet tij čuážžuvetteđ tääbbin peivipoojijd jyevdilâssân?’ ₇’Kihheen ij lah pálkkááttâm mii’, sij västidii. Sun eeđâi almaid: ’Moonnâđ tij-uv muu viinikáárdán.’

₈»Ko eehid poođij, te viinikäärdi omâsteijee eeđâi táluhoittájeijeesis: ’Kočo pargeid já määvsi sijjân päälhi, toid vistig, kiäh pottii majemustáá já talle esken toid, kiäh pottii vuossâmustáá.’ ₉Toh, kiäh lijjii pálkkááttum ohtnubálovváád tiijme ääigi, pottii já ožžuu juáháš denaris. ₁₀Ko vuosmustáá pálkkááttum almaah pottii, sij jurdii, et sij uážžuh eenâb, mut sij-uv ožžuu tuše deenaar. ₁₁Talle sij miännudškuottii já ettii išedân: ₁₂’Taah majemuuh puátteeh porgii tuše oovtâ áinoo tiijme, já kuittâg tun adelah sijjân siämmáá ko mijjân, kiäh lep kuáddám peeivi kyermi já paahâ.’ ₁₃Mut iššeed eeđâi mottoom almai: ’Ustevâm, jiemhân mun toovâ tunjin verivuođâ. Iän-uv muoi sooppâm denarist? ₁₄Vääldi jieijâd päälhi já moonâ. Mun táátum mäksiđ taas, kote poođij majemustáá, siämmáá verd ko tunjin, ₁₅já vissâ mun uážum omijnân porgâđ maid mun halijdâm? Anah-uv tun paan tom, et mun lam pyeri?’

₁₆»Näävt majemuuh šaddeh vuosmužžân já vuosmuuh majemužžân.»

₁₇Ko sij lijjii jotemin pajas tom luodâ, mii tuálvui Jerusalemân, Jeesus vaaldij kyehtnubáloh máttááttâspärnid sierâ já sáárnui jođedijnis sijjân: ₁₈»Mij moonnâp tääl Jerusalemân, já Ulmuu Alge adeluvvoo ollâpaapâi já laavâmáttáátteijei kieđáid. Sij tyemmejeh suu jämimân ₁₉já adeleh suu pähináid, vâi sij pilkkedeh, ruáiskuh já riistânnävlejeh suu. Mut kuálmád peeivi sun paijaan jämimist.»

₂₀Mottoom ääigi keččin poođij Sebedeus oolgij enni algekuáhtáin suu kuuvl já luáštádâđâi ánuvávt idduidis oolâ suu oovdân. ₂₁»Maid tun halijdah?» Jeesus koijâdij. Nissoon eeđâi sunjin: »Lopedâhhân, et taah algekyevtis uážžuv čokkáđ väldikodestâd tuu paaldâst, nubbe uálgispeln já nubbe čižetpeln?» ₂₂Jeesus västidij: »Tij eppeđ tieđe maid tij ánuvetteđ. Pyehtivetteđ-uv tij juuhâđ tom ceerhi, maid mun koolgâm juuhâđ?» »Te pyehtip», sij västidii. ₂₃Talle sun eeđâi sijjân: »Muu ceerhi tij vala juhâvetteđ-uv, mut mun jiem meerrid tast, kii čokkáá muu uálgispeln já kii čižetpeln. Toh sajeh láá toid, kiäid muu Eeči lii taid uáivildâm.»

₂₄Ko toh loves kullii täst, sij suttii viiljâkuáhtás. ₂₅Mut Jeesus kočoi sii jieijâs kuuvl já eeđâi: »Tij tietivetteđ, et haldâšeijeeh láá almugijdis hiäráh, já eennâm váldáliih tuálih aalmugijd vääldis vyelni. ₂₆Nuuvt ij uážu leđe tii koskâvuođâst. Kote táttu tii juávhust šoddâđ styeresin, tot liävus nubij palvâleijee, ₂₇já kote táttu šoddâđ tii koskâvuođâst vuosmužžân, tot liävus nubij uárji. ₂₈Ij Ulmuu Algegin puáttám palvâluđ, pic jieš palvâliđ nuubijd já adeliđ jiegâs lonástâssân puohâi peeleest.»

₂₉Ko sij vuolgii Jerikost, te stuorrâ olmoošjuávkku čuávui Jeesus. ₃₀Luoddâpiällást čokkáin čalmettes kyevtis, já ko suoi kuuláin Jeesus jotemin tast lappâd, te suoi čuárvuškuođijn: »Äärmit munnuu, Hiärrá, Taavvid Alge!» ₃₁Ulmuuh kuččuu sunnuu orroođ joskâ, mut suoi čuárvoin vala-uv korrâsubbooht: »Äärmit munnuu, Hiärrá, Taavvid Alge!» ₃₂Talle Jeesus orostij já kočoi sunnuu jieijâs kuuvl. »Maid haalijdvettee muu porgâđ tunnui?» sun koijâdij?» sun koijâdij. ₃₃Suoi västidáin: »Hiärrá, adde munnui uáinu čolmijdân.» ₃₄Jeesus šallišij sunnuu. Sun kuoskâttij sunnuu čolmijd, já siämmást toid poođij uáinu. Nuuvt almaakyevtis vuolgijn čuávvuđ suu.