Matteus 12

₁Toi aaigij Jeesus ohtii juuđij sabattin valjepiäldu roobdâ. Suu máttááttâspárnáid šoodâi nelgi, já sij nurâškuottii jiveooivijd já purâškuottii. ₂Fariseuseh oinii tom já ettii Jeesusân: »Keejâ tääl, tuu máttááttâspárnááh pargeh tom, maid sabattin ij lah lope porgâđ.» ₃Mut Jeesus västidij sijjân: »Eppeđ-uv tij lah luuhâm, maid Taavvid poorgâi, ko sun já suu almaah lijjii niälgum? ₄Sun moonâi Immeel viistán já puurâi uhreleeibijd, veik toi puurrâm lâi loválâš tuše pappáid, ij sunjin ige suu almaid. ₅Teikâ eppeđ-uv lah laavâst luuhâm, et paapah pargeh temppâlist sabattin-uv, já liijká sij láá sujâttemeh? ₆Mun eeđâm: täst tist lii eenâb ko temppâl. ₇Jis tij iberdiččijd, maid taat meerhâš: ’Läđisvuođâ mun táátum, jiem uhremiänuid’, te tij eppeđ tuommiiččii sujâttemijd. ₈Ulmuu Alge lii sabbaat hiärrá.»

₉Jeesus juuđij ovdâskulij já moonâi ton kuávlu synagogan. ₁₀Tobbeen lâi almai, kiän kietâ lâi kuškâm. Fariseuseh tattuu ášáskuttiđ Jeesus já koijâdii sust: »Uážžu-uv sabattin pyerediđ?» ₁₁Jeesus västidij sijjân: »Jis kiästnii tist lii savzâ já tot kačča sabattin roogán, te ámahân te sun tuáppee tom já paajeed tom tobbeen! ₁₂Já liihân olmooš ennuv tivrâsub ko savzâ. Kale sabattin uážžu porgâđ pyere.» ₁₃Talle sun eeđâi almai: »Keigii kieđâd.» Almai keigij kieđâs, já tot šoodâi ovdiináál, tiervâsin tego nubbe-uv kietâ. ₁₄Mut fariseuseh monnii olgos já smietâškuottii, maht sij puávtáččii koddeđ Jeesus.

₁₅Ko Jeesus uážui tiettiđ täst, sun vuolgij tobbeen. Suu maajeeld juttii ennuv ulmuuh, já sun pyeredij puoh pyecceid. ₁₆Sun kuittâg váruttij sii sárnumist sust julgâlávt, ₁₇vâi olášuuččij taat proofeet Jesaja ettâm Immeel sääni:

₂₂Talle Jeesus kuuvl puohtui čalmettes já kielâttes almai, kiäm paas jieggâ väividij. Jeesus pyeredij suu, nuuvt et almai sáárnui já ooinij. ₂₃Puohah lijjii hiämáskâm já koijâdellii: »Ij-uvsun taat lah Taavvid alge?» ₂₄Mut ko fariseuseh kullii tom, sij ettii: »Jieijâs Belsebul, uáivipahakkâs, iššijn sun paas jiegâid vuájálit.»

₂₅Jeesus tieđij sii jurduid já eeđâi sijjân: »Jyehi väldikodde, kote juáhášuvá já tuáru jieijâs vuástá, tuššá, ige kaavpug ige peerâ killáá, jis tom riijdoh rikkoh. ₂₆Jis Sáttán vuájá olgos Sáttán, te tot lii pajanâm jieijâs vuástá. Maht ton väldikodde talle ciävzá? ₂₇Jis mun vuájálitám paas jiegâid Belsebul iššijn, te kiän iššijn tij talle taid vuájálitvetteđ? Sist tij uážžuvetteđ olssâd tuámárijd. ₂₈Mut jis mun vuájálitám paas jiegâid Immeel Jiegâ vuoimijn, te tallehân Immeel väldikodde lii jo puáttám tii kuuvl.

₂₉»Maht kiinii puáhtá pokkiđ vievsâs almaa táálun já rievediđ suu tävirijd, jis ij vistig čoonâ suu kiddâ? Esken talle sun puáhtá rievediđ táálu já tävirijd. ₃₀Kote ij lah muu peln, lii muu vuástá, já kote ij muin oovtâst nuurâ, tot pieđgee.

₃₁»Tondiet mun eeđâm tijjân: jyehi suddo já pilkke adeluvvoo ulmuid addâgâs, mut Jiegâ pilkkedem ij adeluu addâgâs. ₃₂Kote iätá maidnii Immeel Alge vuástá, sunjin adeluvvoo addâgâs, mut kote sárnu Pase Jiegâ vuástá, sunjin ij adeluu addâgâs, ij taan ige puáttee maailmääigist.

₃₃»Jis muorâ lii pyeri, ton heeđâlm-uv lii pyeri, mut jis muorâ lii hyeni, ton heeđâlm-uv lii hyeni. Heđâlmijnis muorâ tobdoo. ₃₄Tij kyevdišohânâsah, maht tii sárnum puávtáččij leđe pyeri, ko tij jiejah leppeđ paah! Mast váimu lii tievâ, tast njälmi sárnu. ₃₅Šiev olmooš puáhtá pyerivuođâs vuárhást oovdân pyere, já paas olmooš paavuođâs vuárhást paa. ₃₆Mun eeđâm tijjân: jyehi tušes säänist, maid ulmuuh sárnuh, sij kalgeh tuámupeeivi västidiđ. ₃₇Sanijdâd vuáđuld tun celkkuuh sujâtteemmin, já sanijdâd vuáđuld tun tyemmejuuh sujâlâžžân.»

₃₈Talle motomeh laavâmáttáátteijeeh já fariseuseh ettii Jeesusân: »Máttáátteijee, adde täst mii uáinidijn meerhâ!»

₃₉Mut Jeesus västidij sijjân:

»Taat paas já oskottes suhâpuolvâ váátá meerhâ, mut áinoo merkkâ, mii toos adeluvvoo, lii Joona merkkâ. ₄₀Tego proofeet Joona lâi merâpiäđu čuávjist kulmâ peeivi já kulmâ iijâ, nuuvt kalga Ulmuu Alge leđe eennâm puoŋâst kulmâ peeivi já kulmâ iijâ. ₄₁Ninive ässeeh pajaneh tuámun oovtâst tain suhâpuolváin já tyemmejeh tom. Sij jorgettii Immeel piälán, ko Joona särnidij sijjân, já taa tist lii eenâb ko Joona! ₄₂Määdi roonnig morráán tuámun oovtâst tain suhâpuolváin já tyemmee tom. Sun poođij maailm roobdâin kuullâđ Salomo vijsesvuođâ, já taa tist lii eenâb ko Salomo!

₄₃»Ko nyeskis jieggâ vuálgá ulmust, tot juuttâl ävđinkuávluin já ocá vuoiŋâstemsaje, mut ij kaavnâ.

₄₄»Tastoo tot meerrid: ’Mun maacâm páikkásân, kost mun vuolgim.’ Ko tot talle puátá já kávná jieijâs viste kuárusin, suopâlistum saijeen já šiev oornigist, ₄₅te tot viäžžá čiččâm vala paab jieggâd, já toh puátih siisâ já tiälláádeteh tohon aassâđ. Näävt ton ulmuu tile lii loopâst viärráb ko lâi aalgâst. Siämmáánáál kiävá meiddei taam paas suhâpuolvân.»

₄₆Ko Jeesus vala sáárnui olmoošjuávkun, te suu enni já viiljah lijjii puáttám tohon. Sij čuožžuu olgon já halijdii sárnuđ suin. ₄₇Mottoom poođij ettâđ Jeesusân: »Tuu enni já viiljah láá tyebbin olgon já halijdeh sárnuđ tuin.» ₄₈Mut Jeesus västidij sänipyehtei: »Kii lii muu enni? Kiäh laa muu viiljah?» ₄₉Sun čaaitij kieđâinis máttááttâspárnáidis já eeđâi: »Keejâ, taa láá muu enni já viiljah. ₅₀Juáháš, kote tiävdá muu almalii Eeji táátu, lii muu viljâ já uábbi já enni.»