Máttááttâspárnái vuolgâttem
Kyehtnubáloh apostolid
1Jeesus kočoi kyehtnubáloh máttááttâspärnis jieijâs kuuvl já adelij sijjân vääldi vuájálittiđ nyeskis jiegâid já pyerediđ puohlágán taavdâid já vaaivijd.
2Taah láá toi kyevtinubálov apostol noomah: vuosmužžân Simmoon, nube noomâ mield Piättár, já suu viljâ Andârâs, Jáákkup Sebedeus alge já suu viljâ Juhánâs, 3Filippus já Bartolomeus, Tyemes já publikaan Matteus, Jáákkup Alfeus alge, já Taddeus, 4Simmoon Kananeus já Juudas Iskariot, kote kävildij Jeesus.
Jeesus addel mätkiravvuid
5Täid kyehtnubálov Jeesus vuolgâttij máátkán ko lâi adelâm sijjân ravvuid:
»Elleđ moonâ viereshiäimusij kooskân elleđge oohtângin Samaria kaavpugân. 6Mut moonnâđ Israel aalmug čájádâm saavzâi kuuvl 7já särnidiđ: ’Oolmij väldikodde lii puáttám alda.’ 8Pyerediđ pyecceid, cuvnâđ jämmeid, putestiđ spiitaallijd já vuájálittiđ paas jiegâid. Lähjin tij leppeđ uážžum, lähjin adeliđ.
9»Elleđ haavâ puáhháidâd kole, siilbâ teikâ veeški 10elleđge vääldi laavhâ, elleđ paijeelmiärálii liškepääiđi, elleđ kammuid teikâ suábi. Pargee lii purrâmâšâs ánsášâm.
11»Ko tij puátivetteđ monnii kaavpugân teikâ siijdân, te tiäđustâllâđ, kii tobbeen ličij tii kollim árvusâš, já pääcciđ suu kuuvl jieijâd vuolguu räi. 12Ko tij monâvetteđ táálun, te tuáivuttiđ ráávhu táluässeid. 13Jis táálu lii ton árvusâš, te uážus tot tii tuáivuttem ráávhu, mut jis tot ij áánsáš tom, te máccus tuáivuttâs tijjân maassâd. 14Jis monnii táálust teikâ kaavpugist kiinii ij vääldi tii vuástá ige kuldâl tii saanijd, te vyelgiđ tobbeen já luvveliđ mulde juolgijnâd. 15Tuođâi: Sodoma já Gomorra eennâm piäsá tuámupeeivi älkkeebeht ko tot kaavpug.
Jeesus ruokâsmit killáđ vááinu
16»Mun vuolgâttâm tii tego saavzâid kuumpij kooskân. Kolgâvetteđ tondiet leđe vijsáh tego kyevđih já vavettemeh tego tuvvááh.
17»Váruttiđ, tastko ulmuuh tuálvuh tii vuoigâdvuođâ oovdân já ruáiskuh tii synagogainis. 18Eennâmhiärái já kunâgâsâi oovdân tij tolvuuvetteđ muu tiet, tuođâštâssân sijjân já almugáid. 19Mut ko tij tolvuuvetteđ esivääldi kieđáid, te elleđ huolât tast, maht teikâ maid tij sárnuččijd, tastko tijjân adeluvvojeh ton tove säänih, maid tij kolgâvetteđ sárnuđ. 20Tij eppeđ sáárnu jiejah, tist sárnu tii Eeji Jieggâ.
21»Viljâ addel koddeđ viiljâs, eeči päärnis, já párnááh pajaneh vanhimijdis vuástá já kodetteh sii. 22Puohah vajedeh tii muu noomâ tiet, mut tot, kote killáá loopâ räi, piäluštuvvoo.
23»Ko ulmuuh tii oovtâ kaavpugist váinutteh, te patâriđ nuubán. Tuođâi: tij eppeđ kiergân eelliđ puoh Israel kaavpugijn ovdilgo Ulmuu Alge puátá.
24»Ij máttááttâspärni lah máttáátteijes aaleeb teikâ palvâleijee išedis aaleeb. 25Totos máttááttâspärni siämmáá uásán ko máttáátteijee já palvâleijee siämmáá uásán ko iššeed. Jis táluiššeed kočoduvvoo Belsebulin, te mon čuuvtij älkkeebeht tom noomâ uážžugin táluviehâ!
26»Elleđ tääl poolâ ulmuin. Ij lah čiähá, mii ij puáđáččii uáinusân, ige syeligâsvuotâ, mii ij puáđáččii tiättun. 27Maid mun eeđâm tijjân sevŋâdâsâst, tom särnidiđ peeivičuovâst, já mii culijduvvoo tii piälján, tom kulluuttiđ káátui alne! 28Elleđ poolâ tain, kiäh koddeh rummâš mut iä pyevti koddeđ siälu. Poollâđ pyerebeht sust, kote puáhtá siälu já rummâš hevâttiđ helvitân. 29Cissáid uážžu šlanttijn kyehti, mut ohtâgin tain ij koočâ enâmân tii Eeji salliihánnáá. 30Puoh vuoptah-uv tii uáivist láá luhhum. 31Elleđ tääl poolâ! Leppeđhân tij ennuv tivrâsuboh ko puoh cissááh.
Kristus tubdâstem
32»Kote tuubdâst jieijâs muu uámmin ulmui oovdâst, tom mun-uv tubdâstâm muu uámmin Iäččán oovdâst oolmijn. 33Mut kote ulmui oovdâst kiäldá muu, tom mun-uv kiäldám Iäččán oovdâst oolmijn.
34»Elleđ juurdâš, et mun lam puáttám pyehtiđ eennâm oolâ ráávhu. Jiem mun lah puáttám pyehtiđ ráávhu, mut miehi. 35Mun lam puáttám pajediđ alge eejis vuástá, nieidâ eenis vuástá já manje vuánámis vuástá. 36Vajaliih láá jieijâs perâkoddeest.
37»Kote räähist eejis teikâ eenis eenâb ko muu, tot ij tuhhii munjin, ige tot, kote räähist algees teikâ nieidâs eenâb ko muu, tuhhii munjin. 38Kote ij vääldi riistâs ja čuávu muu, tot ij tuhhii munjin. 39Kote varjâl jieijâs eellim, sun láppá tom, mut kote elimis muu tiet láppá, kávná tom.
40»Kote váldá vuástá tii, tot váldá vuástá muu, já kote váldá vuástá muu, váldá vuástá tom, kote lii muu vuolgâttâm. 41Kote váldá vuástá proofeet tondiet, et taat lii proofeet, finnee proofeet päälhi, já kote váldá vuástá vanhurská tondiet, et taat lii vanhurskes, finnee vanhurskásân kullee päälhi. 42Já kote addel oohtângin tain uucijn kuvse tievâ kolmâ čääsi tuše tondiet, et taat lii máttááttâspärni – tuođâi: sun ij pääsi pälhittáá.»
