Luukas 9

₁Jeesus kočoi čuákán kyehtnubáloh máttááttâspäärnis já adelij sijjân vyeimi já vääldi pyerediđ taavdâid já vyeijiđ paas vuoimijd meddâl. ₂Sun vuolgâttij sii kulluuttiđ Immeel väldikode já pyerediđ pyecceid ₃já eeđâi sijjân: »Elleđ vääldi fáárun maiden – ij suábi, ij laavhâ, ij leeibi ige ruuđâ. Elleđ vääldi nube pääiđigin. ₄Já mon táálun ooroostvetteđgin, te aassâđ tobbeen já tobbeen oppeet vyelgiđ. ₅Jis ulmuuh iä mottoom saajeest kuásut tii, te vyelgiđ tom kaavpugist meddâl já šluvgeliđ koovjâ juolgijnâd. Taat kalga leđe tuođâštus sii vuástá.»

₆Nuuvt máttááttâspárnááh vuolgii máátkán. Sij juttii siijdâst nuubán já kulluuttii evangelium já pyeredii pyecceid jyehi saajeest.

₇Niäljádâsfurstâ Herodes uážui kuullâđ puoh täin aašijn ige tiättám maid jurdâččiđ. Motomeh uáináh jurdâččii, et Juhánâs lâi pajanâm jämimist, ₈motomeh arvâlii, et Elia lâi almostum eennâm oolâ, já motomij mielâst kiinii ovdii ääigi profetijn lâi pajaspajanâm. ₉Herodes eeđâi: »Juhánâs mun lam miästááttâm. Kii tastoo lii taat almai, kiäst ulmuuh munjin muštâleh tyegárijd?» Sun halijdij uáiniđ Jeesus já uusâi máhđulâšvuođâ toos.

₁₀Apostoleh maccii já muštâlii Jeesusân, maid puoh sij lijjii porgâm. Jeesus vaaldij sii fáárun já vuolgij Betsaida kaavpug aldasáid, vâi sun uážuččij leđe tobbeen ráávhust. ₁₁Ulmuu pottii kuittâg tiettiđ, kost sun lâi, já vuolgii suu maŋŋaal. Jeesus tiiptij sii puáttiđ jieijâs kuuvl. Sun sáárnui sijjân Immeel väldikoddeest já pyeredij puohâid, kiäh lijjii iše táárbust.

₁₂Ko viäiguškuođij, te Jeesus kyehtnubáloh máttááttâspärnid pottii suu kuuvl já ettii: »Vuolgât ulmuid meddâl, vâi sij monâččii ránnjásijdáid já tááloid já usâččii tain ijjâsaje já purrâmâš. Taat lii aaibâs asâhánnáá kuávlu.» ₁₃»Adeliđ tij sijjân purrâmâš» Jeesus eeđâi. Sij västidii: »Ij mist lah eenâb ko vittâ leeibi já kyehti kyele – vâi moonnâp-uv mij uástiđ purrâmâš ubâ taan juávkun?» ₁₄Tobbeen uáináh lijjii suullân vittâtuhháát almajid. Jeesu eeđâi máttááttâspárnáid: »Pieijâđ sii čokkáđ viđâlov ulmuu juávhoid purâdem várás.» ₁₅Sij porgii nuuvt já uárnejii puohháid purâdemsaje. ₁₆Talle Jeesus vaaldij taid vittâ leeibi já kyehti kyele, keejâi pajas aalman já ceelhij tain kijttos. Sun tojâlij leeibijd já adelij pittáid máttááttâspárnáidis, vâi taah juáváččii taid aalmugân. ₁₇Puohah purrii kalas, já pasâttâspitáh norrojii kyehtnubáloh koorid.

₁₈Ohtii, ko Jeesus lâi kiäsádâttâm ohtuuvuotân ruhâdâllâđ já máttááttâspárnááh lijjii suin, te sun koijâdij sist: »Kii mun ulmui mielâst lam?» ₁₉Sij västidij: »Motomij mielâst tun lah Juhánâs Kästee, motomij mielâst Elia, motomeh vist eteh, et mottoom ovdii ääigi proofeet lii pajanâm jämimist.» ₂₀»Nabai tij?» koijâdij Jeesus. »Kii mun tii mielâst lam?» Piättár västidij: »Tun lah Kristus, Immeel Vuoidum.» ₂₁Jeesus kieldij sii korrâsávt sárnumist täst kiässán ₂₂já eeđâi: »Ulmuu Alge ferttee killáđ ennuv. Aalmug puárásumoseh, ollâpaapah já laavâmáttáátteijeeh hilgoh suu, já sun sormejuvvoo. Mut kuálmád peeivi sun paijaan jämimist.»

₂₃Jeesus eeđâi puohháid: »Jis kiinii haalijd jotteeđ muu maajeeld, te sun kiäldus jiejâs, vááldus jyehi peeivi riistâs já čuávus muu. ₂₄Tastko tot, kote haalijd piäluštiđ elimis, láppá tom, mut kote tom muu keežild láppá, piälušt tom. ₂₅Mii aavhijd ulmui lii tast, jis sun vuáittá olssis ubâ maailm, mut joođeet jieijâs hiävun já hevâttâsân? ₂₆Kote heeppân muu já muu saanijd, tom Ulmuu Alge heeppân, ko sun puátá kunneestis, Eejis já pase eŋgâlij kirkkâdvuođâst. ₂₇Tuođâi: taam juávhust láá motomeh, kiäh iä kuáhtáá jäämmim ovdilgo sij uáinih Immeel väldikode.»

₂₈Suullân oho keččin tast ko Jeesus lâi taam sárnum, sun vaaldij jieijâs fáárun Piättár, Juhánâs já Jáákkup já kuárŋui vääri oolâ ruhâdâllâđ. ₂₉Ruhâdâldijnis suu muáđuh nubástuvvii já suu pihtâseh suonjârdii kirkesvielgâdin. ₃₀Siämmást togo láin almaakyevtis, Mooses já Elia, sáárnudmin suin. ₃₁Suoi almostuin almalii kirkkâdvuođâst já sárnudáin Jeesus meddâlvyelgimist, mii koolgâi olášuđ Jerusalemist.

₃₂Piättár já máttááttâspárnááh, kiäh lijjii suin, ođđii lussâdávt. Morráándijnis sij oinii Jeesus kirkkâdvuođâstis já almaikuáhtá, kiäh láin suin. ₃₃Ko suoi láin vyelgimin Jeesus kulen, te Piättár eeđâi: »Máttáátteijee, lii pyeri, et mij lep tääbbin. Mij rähtip kulmâ kuáđi: tunjin já Moosesân já Elian.» Mut sun ij tiättám maid sáárnui.

₃₄Piättár vala sárnudijn poođij polvâ já loovdij tom saje suoivuusis. Máttááttâspárnááh suorgânii, ko sij oinii, et almaah láppojii poolvâ siisâ. ₃₅Poolvâst kullui jienâ: »Taat lii muu Alge, kiäm mun lam valjim, kuullâđ suu!» ₃₆Ko jienâ jaskodij, te máttááttâspárnááh oinii, et Jeesus lâi ohtuu. Sij urruu joskâ puoh tain aašijn, maid sij lijjii uáinám, iäge vala talle muštâlâm tast kiässán.

₃₇Ko sij čuávuváá peeivi pottii väärist vuálus, lâi Jeesus oovdeld stuorrâ olmoošjuávkku. ₃₈Mottoom almai čuárvui olmoošjuávhu siste: »Máttáátteijee, mun áánum tuu: puáđi keččâđ algaam, áinoo algaam! ₃₉Paas jieggâ vollit suu ohtânmaanoost. Kivkked sun páárgád, já jieggâ čärvee suu nuuvt, et suptâ kolgá suu njäälmist. Ko jieggâ loopâst kuáđá suu, te sun lii aaibâs vaibâm. ₄₀Mun tattum tuu máttááttâspárnáid vuájálittiđ tom, mut sij iä nahcim.» ₄₁Talle Jeesus eeđâi: »Vuoi taam epioskolii já punjâsâm suhâpuolvâ! Mon kuhháá mun vala ferttiim leđe tii koskâvuođâst já killáđ tii? Pyevti algaad teehi.» ₄₂Vala alge puáđidijn-uv jieggâ leggistij suu enâmân já čarvij suu. Mut Jeesus kočoi äŋgiris sanijguin nyeskis jiegâ vyelgiđ meddâl, pyeredij alge já adelij suu maassâd iäččásis. ₄₃Puohah lijjii hiämáskâm, ko sij oinii Immeel vyeimi styeresvuođâ.

Ko puohah imâštellii Jeesus tavoid, te sun eeđâi máttááttâspárnáidis: ₄₄»Kuldâliđ tárkká, maid mun tijjân eeđâm: Ulmuu Alge adeluvvoo ulmui kieđáid.» ₄₅Máttááttâspárnááh iä iberdâm, maid sun tai sanijguin uáivildij. Tot paasij sijjân syeligâssân nuuvt, et sij iä addim suu sárnum iäge tuostâm koijâdiđ sust ton merhâšume.

₄₆Máttááttâspárnááh nágáskii tast, kotemuš sist lâi stuárráámus. ₄₇Jeesus tieđij, maid sij jurdâččii. Sun luptij paldâsis párnáá ₄₈já eeđâi sijjân: »Kote muu noomâst váldá taam párnáá jieijâs kuuvl, tot váldá jieijâs kuuvl muu. Já kote váldá jieijâs kuuvl muu, váldá tom, kote lii muu vuolgâttâm. Tot tist, kote lii puoh ucemus, lii tuođâi styeres.»

₄₉Juhánâs eeđâi talle: »Máttáátteijee, mij ooinijm mottoom almaa vyejeetmin paas jiegâid olgos tuu noomâst. Mij keččâlijm estiđ suu, ko sun ij čuávu tuu mii juávhust.» ₅₀Mut Jeesus västidij: »Elleđ eesti. Kote ij lah tii vuástá, lii tii pelni.»

₅₁Ko Jeesus aalmanväldimäigi aldanškuođij, te sun vuolgij Jerusalem kulij. ₅₂Jieijâs ovdiibel sun vuolgâttij sänituálvoid. Taah vuolgii máátkán já monnii mottoom Samaria siijdân valmâštâllâđ Jeesus puáttim. ₅₃Siijdâ ulmuuh kuittâg piettâlii väldiđ Jeesus vuástá, ko sun lâi jotemin Jerusalemân. ₅₄Ko suu máttááttâspárnááh Jáákkup já Juhánâs kuuláin täst, te suoi eeđáin: »Hiärrá, halijdah-uv tun, et muoi koččoon tuulâ časkeđ almeest já tuššâdiđ sii [tegu Elia-uv poorgâi]?» ₅₅Mut Jeesus jorgettij já nuttâlij máttááttâspárnáid [já eeđâi: »Tuoi eppee tieđe, mon jiegâ uámih tuoi leppee. _56aUlmuu alge ij puáttám ulmui siäluid läpittiđ pic piäluštiđ.»]. _56bOovtâst sij jotkii määđhi nube siijdân.

₅₇Ko sij lijjii jotemin, te mottoom almai eeđâi Jeesusân: »Mun čuávum tuu, kuus ihenis tun moonahkin.» ₅₈Jeesus eeđâi sunjin: »Riämnjáin láá jieijâs piäjuh já alme luudijn piervâleh, mut Ulmuu Algeest ij lah, kuus viälániđ.»

₅₉Mottoom iärásân Jeesus eeđâi: »Čuávu muu!» Taat västidij: »Hiärrá, tipte muu vistig eelliđ hävdidmin iäččán.» ₆₀Mut Jeesus eeđâi sunjin: »Tipte jämmeid hävdidiđ jämmeidis. Vyelgi tun kulluuttiđ Immeel väldikode.»

₆₁Vala mottoom eres eeđâi: »Hiärrá, mun čuávum tuu, mut tipte muu vistig kyeđđiđ iärutiervuođâid jieččân kuátiviehân.» ₆₂Sunjin Jeesus västidij: »Tot, kote piäjá kieđâs avra oolâ já kiäččá tuáhásis, ij lah hiäivulâš Immeel väldikoodán.»