Luukas 8

₁Tastmaŋa Jeesus juuđij kaavpugist kaavpugân já siijdâst siijdân já kulluuttij ilosaavâ Immeel väldikoddeest. Sust lijjii fáárust jieijâs kyehtnubáloh máttááttâspärnid ₂já motomeh nisoneh, kiäid sun lâi pyeredâm taavdâin já luovvim paas jiegâi vääldist. Taah lijjii Magdala Máárjá, kiäst sun lâi vuájálittám čiččâm paas jieggâd, ₃Johanna, kiän käälis Kuusas lâi Herodes ollâ virgealmai, sehe Susanna. Ton lasseen lijjii maaŋgah eres nisoneh, já sij puohah išedii jieijâs omâduvváin.

₄Ko ennuv ulmuuh puoh kaavpugijn lijjii čokkânâm Jeesus kuuvl, te sun muštâlij sijjân viärdádâs: ₅»Almai vuolgij kalveđ siemmân. Ko sun koolvij, te uási siemânijn koččii luoddâpiällás. Tast jotteeh tuolmii jiivijd, já alme lodeh purrii taid. ₆Uási koččii källee oolâ já šodâškuottii, mut šaddoveerdih kuškii, tastko toh iä finnim lahtâs enâmist. ₇Uási koččii čuággooraasij kooskân, já ko valje šoodâi, te šoddii čuággoorääsih-uv já avkkâdii tom.» ₈Mut uási koččii šiev enâmân, šoddii já adelii čyetikiärdásii šado.» Ko Jeesus lâi taam ettâm, te sun čuorvij: »Kiäst peeljih láá, tot kulos!»

₉Máttááttâspárnááh koijâdii Jeesusist, maid viärdádâs merhâšij.

₁₀Sun eeđâi:

Tij leppeđ uážžum uápásmuđ Immeel väldikode syelimâsvuođáid, mut iärásáid toh adeluvvojeh viärdádâsâiguin, vâi sij iä uáinidijniskin uáináččii iäge kulâdijniskin iberdiččii. ₁₁Viärdádâs táárgut taam: Siemâ lii Immeel sääni. ₁₂Luoddâpiällás koččâm siemâ uáivild ulmuid, kiäh kuleh sääni mut kiäi vááimust Pahakkâs tállân puátá väldiđ tom meddâl, nuuvt et sij iä oskoččii já piälustuuččii. ₁₃Källee oolâ koččâm siemâ táárgut taid, kiäh sääni kulâdijnis väldih tom iloin vuástá mut oskoh tuše uánihâš puudâ. Sist ij lah ruotâs, já nuuvt sij, ko sij kärttih keččâlusân, lyepih. ₁₄Čuággooraasij siisâ koččâm uási uáivild taid, kiäh kuleh sääni mut tastoo ävkkih eellim huoláid, rigesvuotân já naavdâšmáid. Sij iä pyevtit laddâm šado. ₁₅Mut šiev enâmân koččâm siemâ uáivild taid, kiäh sääni kuullâm maŋa cuápcuh tast putes já čapo váimoin já šoddâdeh šado kierdâvâšvuođâ peht.

₁₆»Ij kihheen cokkit laampu já tastoo luávdi tom littijn teikâ piejâ tom seeŋgâ vuálá. Laampujuálgán tot piäijoo, vâi siisâpuátteeh uáináččii čuovâ. ₁₇Ij lah mihheen čiehhum, mii ij puáđáččii uáinusân, ige syeligâs, mii ij almostuuččii já puáđáččii tiättun. ₁₈Váruttiđ tastoo, maht tij kulâvetteđ. Kiäst lii, toos adeluvvoo, mut kiäst ij lah, tast váldoo meddâl tot-uv, maid sun jurdá, et sust lii.»

₁₉Jeesus enni já viiljah pottii teivâdiđ suu, mut sij iä olmoošpokkiidâtmist peessâm suu kuuvl. ₂₀Jeesusân almottui: »Iännád já tuu viiljah láá tyebbin olgon já sij halijdeh teivâđ tuin.» ₂₁Mut sun västidij: »Muu enni já viiljah láá taah, kiäh kuleh Immeel sääni já pargeh ton mield.»

₂₂Mottoom peeivi Jeesus lavkkij máttááttâspárnáidiskuin kárbás já eeđâi sijjân: »Tääl mij vyelgip nubebel rido.» Sij vuolgii čääsi oolâ. ₂₃Määđhi alne Jeesus nohádij. Mut jäävri alne pajanij šuármu já käärbis tievâškuođij čääsist nuuvt et sij lijjii vaarâst. ₂₄Talle máttááttâspárnááh cuvnii Jeesus já ettii: »Máttáátteijee, máttááttâijee, mij hevvânep!» Jeesus pajanij já nuttâlij piegâ já jäävri pááruid. Toh josijduvvii, jeđe kolkkij. ₂₅»Kost tii osko lii?» Jeesus koijâdij. Máttááttâspárnááh palaskii já lijjii hiämáskâm, ko sij ettii kuáimásis: »Mii almaid taat ubâ liigin? Sun koččo joba piegâ já čääsi, já toh tottâleh suu.»

₂₆Sij läddejii Gerasa kuávlust riidon, mii lii Galilea puotâ. ₂₇Ko Jeesus korŋij riidon, te suu oovdeld kaavpugist poođij almai, kiäm väividii paas jiegah. Almai lâi jo kuhháá jottáám pihtâsijttáá, ige sun aassâm ulmui aassâmviäsuin, mut orostâlâi hävdikuovđâšmijn. ₂₈Jeesus uáinidijn sun párgádij, leggistâđâi suu oovdân já čuárvui korrâ jienáin: »Maid tun must táátuh, Jeesus, Alemuu Immeel alge? Mun piivdám: ele pijned muu!» ₂₉Jeesus lâi uáináh koččom nyeskis jiegâ vyelgiđ almast. Tot lâi jo kuhháá toollâm almaa jieijâs vääldist. Sun lâi ain čonnum kievđáid já avlijd, vâi pisoččij sajestis, mut jyehi tove sun lâi puátkum čonâsijdis, já paas jieggâ lâi vuájálittám suu meddâl ulmui kulen. ₃₀»Mii tuu nommâ lii?» Jeesus koijâdij. Almai västidij: »Legioona», tastko sunjin lijjii moonnâm maŋgâ paas jiegâ. ₃₁Toh pivdii, et Jeesus ij kočoččii taid koččâđ káđuttâs áávžán.

₃₂Tast aldasijn väärist lâi stuorrâ šaheiälu kuátumin. Paas jiegah tattuu Jeesusist love moonnâđ šovvijd, já sun suovâi tom. ₃₃Talle jiegah vuolgii almast já monnii šovvijd, já iälu ruámustij päävti vuálus jáávrán já hevvânij.

₃₄Ko šahekeččeeh oinii tom, sij vuolgii patârâsân já muštâlii puoh kaavpugist já siijdâin. ₃₅Maaŋgah vuolgii keččâđ, mii lâi tábáhtum. Sij pottii Jeesus kuuvl já kuáhtájii almaa, mast paas jiegah lijjii vuálgám. Almai čokkái Jeesus juolgij ovdiibeln pihtâseh pajalist já tievâ jiermijnis. Sij palaskii. ₃₆Ulmuuh, kiäh lijjii lamaš talle tast, muštâlii sijjân, maht paas jiegâi väividem olmooš lâi puáránâm. ₃₇Talle puoh Gerasa kuávlu ulmuuh pivdii Jeesus vyelgiđ tobbeen meddâl, tastko sij lijjii uáli čuuvtij paaloost. Jeesus lavkkij-uv kárbás já vuolgij maassâd. ₃₈Almai, kiäst paas jiegah lijjii vuálgám, piivdij, et uážuččij pääcciđ suin, mut Jeesus vuolgâttij suu meddâl já eeđâi: ₃₉»Maacâ páikkásâd já muštâl taam stuorrâ taavoost, mon Immeel lii tunjin porgâm.» Almai vuolgij, juuđij pirrâ kaavpug já kulluuttij, maid Jeesus lâi porgâm sunjin.

₄₀Ko Jeesus maacâi, te suu oovdeld poođij stuorrâ olmoošjuávkku, tastko puohah lijjii vuárdám suu. ₄₁Talle Jeesus oovdân poođij Jairos, synagoga hovdâ. Sun leggistâđâi Jeesus juolgij oovdân já piivdij suu puáttiđ páikkásis. ₄₂Suu áinoo páárnáš, suullân kyehtnubálovihásâš nieidâš, lâi jämimin.

Määđhi alne Jairos pááikán olmoošjuávkku pokkiidâđâi Jeesus pirrâ. ₄₃Tobbeen lâi meid nissoon, kiäm lâi kyehtnubáloh ihheed väividâm vorrâkulgâttâs. Sun lâi kulâttâm puoh omâduvâs tuáhtáráid, mut kihheen ij lamaš áppádâm pyerediđ suu. ₄₄Sun poođij Jeesus kuuvl já kuoskâttij suu kiessâmmááccuh tiäpán, já vorrâkulgâttâs jooskâi tállân. ₄₅Jeesus koijâdij: »Kii kuoskâttij munjin?» Kihheen ij mieđettâm, et ličij kuoskâttâm, já Piättár eeđâi: »Máttáátteijee, jyehi pelnhân täst ulmuuh pokkiideteh tuu oolâ.» ₄₆Mut Jeesus eeđâi: »Kiinii kuoskâttij muujin. Mun tubdim, et must vuolgij vyeimi.» ₄₇Ko nissoon huámášij, et sun ij puáhtám pissoođ syeligâsâst, te sun poođij uáinusân, tuárgistij já leggistâđâi Jeesus juolgij oovdân. Puoh aalmug kulâdijn sun muštâlij, mondiet sun lâi kuoskâttâm Jeesusân já maht sun lâi tállán puáránâm. ₄₈Jeesus eeđâi sunjin: »Nieidâm, oskood lii pyeredâm tuu. Moonâ ráávhust.»

₄₉Suu vala sárnudijn puohtui synagoga hoovdân sääni pääihist: »Tuu nieidâ lii jáámmám. Ele innig väivid máttáátteijee.» ₅₀Mut ko Jeesus kuulâi taam, te sun eeđâi hoovdân: »Ele poolâ. Osko, te sun piäluštuvá.» ₅₁Jairus pááikán puáđidijn sun ij adelâm kiämmán iärrás puáttiđ siisâ ko Piättár, Juhánâs já Jáákkup sehe nieidâ eeji já eeni. ₅₂Puohah čierruu já luoimii nieidâ jäämmim, mut Jeesus eeđâi: »Elleđ čiäru! Ij sun lah jáámmám, sun uáđá.» ₅₃Sij povvâstii sunjin, ko tiettii, et nieidâ lâi jáámmám. ₅₄Mut Jeesus toppij nieidâ kieđâst kiddâ já eeđâi kullojeijee jienáin: »Nieidâ, paijaan!» ₅₅Talle jieggâ maacâi nieidân. Sun tállán čyežžilij, já Jeesus kočoi adeliđ sunjin purrâmâš. ₅₆Nieidâ vaanhimeh láin jiäráskâm. Jeesus kieldij sunnuu muštâlmist kiässán, mii lâi tábáhtum.