Luukas 6

₁Jeesus juuđij sabattin valjepiäldu roobdâ, já suu máttááttâspárnááh nurrii jiveooivijd, ruvvejii taid kieđáin já purrii. ₂Motomeh fariseuseh ettii: »Mondiet tij porgâvetteđ taggaar, maid sabattin ij lah lope porgâđ?» ₃Jeesus västidij: »Eppeđ-uv tij lah luuhâm, maid Taavvid poorgâi, ko sun niälgui almaidiskuin? ₄Sun moonâi Immeel viistán já vaaldij uhreleeibijd, puurâi já adelij almaidis, veik tuše paapâin lâi lope taid puurrâđ.» ₅Já Jeesus eeđâi vala: »Ulmuu Alge lii sabbaat hiärrá.»

₆Mottoom nube sabattin Jeesus moonâi synagogan já máttááttij. Tobbeen lâi almai, kiän uálgiskietâ lâi kuškâm. ₇Laavâmáttáátteijeeh já fariseuseh čuovvuu, pyeredičij-uv Jeesus sabattin, tastko sij uccii aagâ ášáškuttiđ suu. ₈Mut Jeesus tieđij, maid sij jurdâččii. Sun eeđâi almai, kiän kietâ lâi kuškâm: »Čyežžil já puáđi teehi oovdân.» Almai čyežžilij já lavkkij uáinusân. ₉Jeesus eeđâi: »Västidiđ munjin: kuábáš lii sabattin loválâš, porgâđ pyere vâi porgâđ paa, kááijuđ ulmuu vâi tuššâdiđ suu?» ₁₀Sun keejâi sijjân puohháid já eeđâi almai: »Keigii kieđâd.» Almai poorgâi nuuvt, já suu kietâ maacâi ovdii tilán. ₁₁Taat iäddudij laavâmáttáátteijeid já fariseusijd čuuvtij, já sij arvâlškuottii koskânis, maid porgâđ Jeesusân.

₁₂Toi aaigij Jeesus moonâi vääri oolâ ruhâdâllâđ já vietij tobbeen ubâ iijâ já ruhâdâlâi Immeel. ₁₃Čuávuváá peeivi sun kočoi máttááttâspárnáidis puáttiđ jeđe valjij sist kyehtnubálohháás, kiäid sun nomâttij apostolin. ₁₄Taah lijjii Simmoon, kiäs sun adelij meiddei noomâ Piättár, taan viljâ Andârâs, Jáákkup já Juhánâs, Filippus, Bartolomeus, ₁₅Matteus, Tyemes já Jáákkup Alfeus alge, Simmoon, kii kočodui selottin, ₁₆Juudas Jáákkup alge já Juudas Iskariot, kiäst šoodâi kävildeijee.

₁₇Jeesus njeejâi väärist siiguin já orostij tuolbâdâsân. Tobbeen lâi stuorrâ máttááttâspärnijuávkku. Ton lasseen lijjii ennuv ulmuuh puoh kuávluin Juudeast, Jerusalemist já merâriddoost Tyros já Sidon kuávluin.

₁₈Sij puohah lijjii puáttám kuullâđ Jeesus. Pyecceeh halijdii puárániđ tavdâinis, já nyeskis jiegâi väividem ulmuuh-uv puáránii. ₁₉Puohah viggii olmoošpokkiidâtmist kuoskâđ sunjin, tastko sust vuolgij vyeimi, mii pyeredij puohâid.

₂₀Jeesus keejâi máttááttâspárnáidis já eeđâi:

₂₂Avdâgâsah leppeđ tij, ko ulmuuh vajedeh já pilkkedeh tii Ulmuu Alge tiet, ko ulmuuh olgošteh tii já fostâšeh tii noomâ-uv. ₂₃Siämmáánáálhân sii eejih porgii profettáid. Ilodiđ já ávudiđ talle ko näävt kiävá, tastko almeest tii vuárdá stuorrâ pälkki.

₂₆»Vuoi tij, ko puohah sárnuh tist pyere! Siämmáánáálhân sii eejih tohhii puástuprofetáid.

₂₇»Tijjân, kiäh kulâvetteđ muu, mun eeđâm: Rähistiđ vajalijdâd, toohâđ pyere toid, kiäh vajedeh tii. ₂₈Sivnediđ taid, kiäh karodeh tii, ruhâdâllâđ toi peeleest, kiäh luávkkájeh tii. ₂₉Jis kiinii toškâl tuu nierân, faalâ nube-uv nierâ. Jis kiinii tuálvu tust mááccuh, tipte suu väldiđ pááiđád-uv. ₃₀Adde juáhážân, kii tust áánu, elege vaađâ maassâd tast, kii tust tuálvu maidnii.

₃₁Nuuvtko tij haalijdvetteđ ulmuid toohâđ tijjân, nuuvt toohâđ tij sijjân. ₃₂Jis tij räähistvetteđ taid, kiäh rähisteh tii, mii kijttámušâid tast lii? Suddogâsâh-uv rähisteh taid, kiäin sij jiejah finnejeh rähisvuođâ. ₃₃Jis tij tohâvetteđ pyere toid, kiäh taheh pyere tijjân, mii kijttámušâid tast lii? Suddogâsah-uv pargeh nuuvt. ₃₄Já jis tij lovniivetteđ toid, kiäin oskovetteđ, et sij mäksih maassâd, mii kijttámušâid tast lii? Suddogâsâh-uv luávnejeh kuáimásis, ko tietih, et finnejeh maassâd siämmáá verd. ₃₅Ij, rähistiđ vajalijdâd, toohâđ pyere já lovniđ, veik eppeđ oskoččiigin, et finnivetteđ maassâd. Talle tii pälkki lii styeres ja tij leppeđ Alemuu párnááh, tastko sun lii pyeri kijttemettumáid já paaid.

₃₆»Kolgâvetteđ leđe valmâšeh ärmittiđ, tego tii Eeči-uv äärmit.

₃₇»Elleđ tuommii, te tijgin eppeđ tuommiittât. Elleđ kullut oovtâgin sujâlâžžân, te tiigin ij kihheen kullut sujâlâžžân. Lyeštiđ rijjâ, te tij-uv luoštuuvetteđ rijjâ. ₃₈Adeliđ, te tijjân adeluvvoo. Valjaas mitto, čovgâsân tedâččum, šluvgum já kukkârijn tievâ, adeluvvoo tii aaskan. Nuuvtko tij mittedvetteđ, nuuvt tijjân mitteduvvoo.»

₃₉Sun sáárnui sijjân vala viärdádâsâiguin:

Maht čalmettem puávtáččij laiđiđ nube čalmettem? Kuohtuuhhân tast koččâv roogán. ₄₀Ij uáppee lah čeepib ko suu máttáátteijee, mut ko sun lii tuárvi oppâm, sun šadda máttáátteijes náál.

₄₁Maht tun uáináh roske viiljâd čalmeest, mut jieh huámmáš, et jieijâd čalmeest lii hirsâ? ₄₂Maht tun puávtáh ettâđ viljâsâd: ’Adlistba, viljâm, ko mun vááldám roske čalmestâd’? Jiehhân tun uáini hiirsâgin jieijâd čalmeest. Tun passaa! Vääldi vistig hiirsâ jieijâd čalmeest, te eskin talle tun uáináh väldiđ roske viiljâd čalmeest.

₄₃»Ohtâgin šiev muorâ ij šoddâd kiälbuttes heeđâlm ige ohtâgin kiälbuttes muorâ šoddâd šiev heeđâlm. ₄₄Heeđâlmstis jyehi muorâ tobdoo. Iähân säggišaddoin nurruu viiguneh iäge säggimiestust nurruu vijnemyerjih. ₄₅Šiev olmooš puáhtá pyere vááimus pyerivuođâ vuárhást. Paas olmooš puáhtá paa paavuođâs vuárhást. Mast váimu lii tievâ, tast njälmi sárnu.

₄₆»Mondiet tij etâvetteđ munjin: ’Hiärrá, Hiärrá’, mut eppeđ poorgâ maid mun eeđâm? ₄₇Mun muštâlâm tijjân, maggaar lii tot, kote puátá muu kuuvl, kulá muu saanijd já parga toi mield. ₄₈Sun lii tego almai, kote táálu huksiidijnis kuáivui kieŋâlâsân vuáđukällee räi já piejâi keđgijyelgi päävti oolâ. Talle ko tulvečääsih kirdii táálu njeigâ, toh iä finnim tom viirrâđ, tastko tot lâi pyereest huksejum. ₄₉Tot vuod, kote kulá mut ij poorgâ, lii tego almai, kote huksij eennâm oolâ, keđgijyelgittáá. Ko tulvečääsih peškâsii táálu njeigâ, tot viirâi tállân já tuušâi.»