Jeesus puávdee Piättár já eres máttááttâspárnáid
1Ko Jeesus mottoom peeivi čuážui Gennesaretjäävri riddoost já olmoošjuávkku pokkiittâđâi suu pirrâsijn kuldâlmin Immeel sääni, 2te sun ooinij riddoost kyehti kárbá. Kuálásteijeeh läddejii já putestii viermijdis. 3Jeesus lavkkij nube kárbás já koijâdij Simonist, kiän käärbis tot lâi, et taat suvâččij riddoost olgoláá. Talle sun čokkái kárbást já máttááttij olmoošjuávhu.
4Ko Jeesus jooskâi sárnumist, te sun eeđâi Simonân: »Suuvâ kárbá váávlán, suáppuđ toho viermijdâd.» 5Taas Simmoon västidij: »Mij lep porgâm jo ubâ iijâ epge lah koddám maiden. Mut mun suápum vala viermijd, ko tun nuuvt kočoh.» 6Näävt sij porgii já pirâstittii nuuvt stuorrâ kyeliuáiváduv, et viermih kiškojii. 7Sij sevvii nube kárbá ulmuid išán. Taah pottii, já sij kuddii kyevti kárbá tievâ kuolijd, nuuvt et kárbáh masa vuoijuu. 8Ko Simmoon Piättár taam ooinij, sun luáštádâđâi Jeesus juolgij oovdân já eeđâi: »Moonâ meddâl muu kulen, Hiärrá! Mun lam suddogâs almai.» 9Sun já puohah suu kárbást lijjii palaskâm já hiämáskâm kyelisaallâs keežild, 10siämmáánáál meiddei Jáákkup já Juhánâs, Sebedeus algekyevtis, kiäh láin Simmoon kuálástemskipáreh. Mut Jeesus eeđâi sunjin: »Ele poolâ. Täst ovdâskulij tun kuálástah ulmuid.» 11Sij kessii kárbáid enâmân, kuođđii puoh já vuolgii čuávvuđ Jeesus.
Jeesus pyereed spiitaallii
12Mottoom kaavpugist Jeesus kuáhtái almaa, kiäst lâi viärráás spiitaaltavdâ. Ko almai ooinij Jeesus, te sun luáštádâđâi Jeesus oovdân muáđuh enâmist já ruhâdâlâi: »Hiärrá, jis peri táátuh, te tun puávtáh putestiđ muu.» 13Jeesus keigij kieđâs, kuoskâttij almaa já eeđâi: »Mun táátum. Puttáásm.» Tavdâ vuolgij almast tállân. 14Jeesus kieldij suu muštâlmist täst oohtângin já eeđâi: »Ele čäittimin jieijâd paapân já adde jieijâd puttáásmist Mooses laavâ miäldásii uhre tuođâštussân sijjân.» 15Kuittâg-uv ulmuuh sarnuu Jeesusist ain vijđásubbooht. Stuorrâ olmoošjuávhuh čokkânii kuldâliđ Jeesus, já pyecceeh tuoivuu, et sun pyeredičij sii. 16Mut sun kiesâdâđâi vuod ävđinkuávlun ruhâdâllâđ.
Jeesus pyereed vuoččum almaa
17Ko Jeesus mottoom peeivi vuod máttááttij, te fariseuseh já laavâmáttáátteijeeh čokkájii kuldâlmin suu. Sij lijjii puáttám puoh Galilea siijdâin já meiddei Juudeast já Jerusalemist. Hiärá vyeimi vaiguttij Jeesusist nuuvt et sun puovtij pyerediđ pyecceid.
18Ton sajan pottii almaah, kiäh kuoddii kyeddimmattoin vuoččum almaa. Sij irâttii pyehtiđ suu siisâ táálun, vâi puávtáččii lyeštiđ suu Jeesus oovdân. 19Olmoošpokkiidâtmist sij iä kuittâg puáhtám pyehtiđ suu siisâ, já nuuvt sij korŋuu káátu oolâ, lyevvejii tiijlâid já luoštii pyeccee kyeddimmato alne puohâi kooskân Jeesus oovdân. 20Ko Jeesus ooinij sii osko, te sun eeđâi: »Ustevâm, tuu sudoh láá adelum addâgâs.»
21Talle laavâmáttáátteijeeh ja fariseuseh arvâlii: »Mii almaid taat lii? Sun pilkked Immeel, ko sun sárnu näävt. Kii eres ko Immeel puáhtá adeliđ suddoid addâgâs?» 22Mut Jeesus tieđij, maid sij jurdâččii, já eeđâi sijjân: »Maid tij jiešalnees juurdâšvetteđ? 23Kuábáš lii älkkeb, ettâđ ’Tuu sudoh láá adelum addâgâs’, vâi ettâđ: ’Čyežžil já vääzi’? 24Mut jis tij tiäđáččijd, et Immeel Algeest lii väldi adeliđ eennâm alne suddoid addâgâs» – sun sáárnui tääl vuoččum almai – »mun eeđâm tunjin: čyežžil, vääldi kyeddimmattod já moonâ páikkásâd.»
25Tállân almai puohâi uáinidijn čyežžilij, vaaldij kyeddimmattoos, mon alne sun lâi viällám, já vuolgij páikkásis já alestij Immeel. 26Puohah lijjii čuuvtij hiämáskâm já alestii Immeel. Paloin sij ettii: »Mij lep onne uáinám tagarijd, maid illá puáhtá tuottân oskođ.»
Jeesus koččo Leevi
27Taan maŋa Jeesus vuolgij tobbeen já ooinij Leevi-nommâsii publikaan čokkáámin tullisajattuvvâst. Jeesus eeđâi sunjin: »Čuávu muu», 28já Leevi kuođij puoh, čyežžilij já vuolgij čuávvuđ Jeesus.
29Leevi tastoo ornij Jeesusân stuorrâ kyessimálásijd päihistis. Maaŋgah publikaaneh já eres kyesih čokkájii sunnuin peevdist. 30Fariseuseh já sijjân kullee laavâmáttáátteijeeh lijjii täst njunádum já ettii Jeesus máttááttâspárnáid: »Maht tij puurâdvetteđ já juhâvetteđ oovtâst publikaanijguin já eres suddogâsâiguin! 31Jeesus västidij sijjân: »Iä tiervâseh taarbâš pyeredeijee pic pyecceeh. 32Jiem mun lah puáttám koččođ hurskáid, pic suddogâsâid, nuuvt et sij jorgettiččii Immeel piälán.»
Hejâkyesih iä vástud
33Jeesusân ettii: »Juhánâs máttááttâspárnááh vástudeh já ruhâdeleh távjá tego fariseusij máttááttâspárnááh, mut tuu máttááttâspárnááh poreh já juheh.» 34Sun västidij: »Eppeđ suigen tij pyevti vaattâđ, et hejâkyesih vástudiččii talle ko irge lii vala siiguin? 35Vala puátá nubbe-uv äigi. Talle ko irge lii valdum meddâl, toi peeivij sij vástudeh.»
36Jeesus muštâlij sijjân vala viärdádâs: »Ij ohtâgin vääldi uđđâ kiessâmmááccuhist pitá já kuáru tom puáris kiessâmmááccuhân. Tallehân uđđâ kiessâmmááccuh kiškoo ige uđđâ kággást valdum tuovŋâs soovâ puáris mááccuhân. 37Ige kihheen liäšku uđđâ viini puáris viinisehháid. Tallehân uđđâ viini lyeddee viiniseehâid, viini kolgá enâmân já viiniseehah láá pillâšum. 38Ij, uđđâ viini kalga liäškuđ uđđâ viinisehháid. 39Ij kihheen, kote lii juuhâm puáris viini, haalijd uđđâ viini. Suu mielâst puáris viini lii pyereeb.»
