Luukas 23

₁Sij puohah vuolgii oovtâst, tolvuu Jeesus Pilatus oovdân ₂já oovdânpuohtii sujâttâsâid Jeesus vuástá. Sij ettii: »Mij lep huámášâm, et taat almai joođeet aalmug puástukuávlun. Sun kiäldá mäksimist viäru kiäisárân já iätá et sun lii Messias, kunâgâs.» ₃Pilatus koijâdij Jeesusist: »Lah-uv tun juudalij kunâgâs?» »Tun tom ettih», Jeesus västidij. ₄Pilatus eeđâi ollâpappáid já olmoošjuávkun: »Jiem pyevti aiccâđ, et taat almai ličij sujâlâš mongin rikosân.» ₅Mut sij pissuu čovgâsávt sujâttâsâidis tyehin já ettii: »Sun táájut aalmug, jotá máttátmin jyehi kuávlust Juudea, Galileast aaibâs teehin.»

₆Taan kulâdijn Pilatus koijâdij, lâi-uv almai galilealâš. ₇Ko sun uážui tiettiđ, et Jeesus kuulâi Herodes haldâšemkuávlun, sun vuolgâttij Jeesus Herodes kuuvl, ko sun-uv lâi toi peeivij Jerusalemist.

₈Herodes ilosmij čuuvtij Jeesus uánidijn, ko sun lâi jo kuhháá halijdâm teivâđ suin. Sun lâi kuullâm Jeesusist já tuáivui, et Jeesus tovâččij suu uáinidijn monnii imâštavoid. ₉Sun koijâdâlâi Jeesusist jyehimuđušijd aašijd, mut Jeesus ij västidâm sunjin maiden. ₁₀Ollâpaapah já laavâmáttáátteijeeh, kiäh lijjii tast, sujâttii Jeesus korrâsávt. ₁₁Herodes já suu suáldátteh hálbášškuottii Jeesus. Herodes pilkkedij Jeesus káárvutmáin suu mučis máccuhân, já talle sun vuolgâttij Jeesus maasâd Pilatus kuuvl. ₁₂Tuon peeivi Herodesist já Pilatusist šoddáin verdižin; ton räi suoi láin lamaš vaajeest koskânis.

₁₃Pilatus kočoi čuákán ollâpaapâid, haldâttâsalmaid já aalmug ₁₄já eeđâi sijjân: »Tij puovtijd taan almaa muu oovdân suujâtmáin suu aalmug tájutteijen. Lam tääl tii kulâdijn koijâdâllâm sust aašijd, mut jiem lah aiccâm suu sujâlâžžân moossân, mast tij suu suujâtvetteđ. ₁₅Ij Herodeskin, ko sun vuolgâttij almaa maassâd mii oovdân. Ij sun lah porgâm maiden, mast puávtáččij tuommiđ jämimân. ₁₆Mun luáštám suu luovâs, ko lam vistig cäimittâm suu.» [ ₁₇Sun uáináh ferttij juhle ääigi lyeštiđ sijjân mottoom faaŋgâ luovâs.]

₁₈Talle puohah čuorvuu oovtjienân: »Jäämmim tien almai! Lyešti mijjân Barabbas!» ₁₉Barabbas lâi kaavpugist cokkânâm stuime já morhe keežild fäŋgejum almai. ₂₀Pilatus piejâi ääši uđđâsist sii oovdân, ko sun halijdij lyeštiđ Jeesus. ₂₁Mut sij čuorvuu vuástá: »Riistânnavlii, riistânnavlii!» ₂₂Pilatus eeđâi sijjân kuálmád keerdi: »Maid paaid sun talle lii porgâm? Mun jiem lah aiccâm maiden, mon keežild suu kolgâččij tuommiđ jämimân. Mun luáštám suu luovâs, ko lam vistig cäimittâm suu.» ₂₃Mut sij iä adelâm piärán pic čuorvuu ain korrâsubbooht já vattii, et Jeesus kalga riistânnävlejuđ.

Čuárvumijdis vuoimijn sij ožžuu táátus čoođâ. ₂₄Pilatus meridij loopâst miettâđ sii vátámuššáid. ₂₅Sun luoštij almaa, kiäm sij halijdii – almaa, kote lâi fäŋgejum stuime já morhe keežild – mut Jeesus sun vist luovâttij sii haaldun.

₂₆Te suáldátteh tuálvuškuottii Jeesus. Määđhi ääigi suáldátteh orostittii Simmoon-nommâsii kyrenelii almaa, kote lâi puátimin kaavpugân, já pieijii suu kyeddiđ riistâ Jeesus maajeeld. ₂₇Mieldi čuávui stuorrâ olmoošjuávkku, meid nisoneh, kiäh luoimii jiänusân já čierruu Jeesus. ₂₈Mut Jeesus jorgettij sii piälán já eeđâi: »Elleđ muu čiäru, Jerusalem nieidah, čiärruđ jieččâd já párnáidâd. ₂₉Puátá äigi, kuás iättoo: ’Avdâgâsah láá heeđelmmettumeh, avdâgâsah láá toh kuáhtuh, moh iä lah šoddâdâm, já njamah, moh iä lah párnáá njomâttâm.’ ₃₀Talle ulmuuh eteh vaarijd: ’Vierâliđ mii oolâ’, já tiäváid: ’Luávdiđ mii.’ ₃₁Jis näävt tahhoo ruonâs muorân, te mii tábáhtuva talle koške muorân!»

₃₂Jeesusáin riistânnavliimân tolvuin kyehti eres-uv almaa, kyehti rikolii. ₃₃Ko sij pottii sajan, mon Uáiviskálžun kočodeh, sij riistânnävlejii Jeesus já rikolijd, nube suu uálgispel nube čižetpel. ₃₄Mut Jeesus eeđâi: »Eeči, adde sijjân addâgâs. Sij iä tieđe, maid sij pargeh.» Suáldátteh juohhii koskânis Jeesus káárvuid vuárbádmáin taid.

₃₅Aalmug čuážui keččâmin. Haldâttâsalmaah-uv lijjii tobbeen pilkkedmin Jeesus. Sij ettii: »Iärásijd sun kale lii išedâm – išedus tääl jieijâs, jis sun kerd lii Messias, kiäm Immeel lii valjim.» ₃₆Meid suáldátteh pilkkedii suu. Sij pottii suu kuuvl, fallii sunjin suvreviini ₃₇já ettii: »Jis lah juudalij kunâgâs, te piälušt jieččâd.» ₃₈Jeesus uáivi paajaabeln lâi meid čaalâ: »Taat lii juudalij kunâgâs.»

₃₉Nubbe riistâst hiäŋgájeijee paatahhee pelhittij sun-uv Jeesus. Sun eeđâi: »Jieh-uv tun lah Messias? Piälušt tääl jieččâd já munnuu!» ₄₀Mut nubbe laaitij suu: »Jieh-uv ubâ tungin poolâ Imelist, veikkâ killááh siämmáá ráŋgáštâs?» ₄₁Muoihân leen ánsášâm jieččân tuámu, muoi ráŋgáštuvvojeen tavoidân mield, mut taat almai ij lah porgâm maiden paaid.» ₄₂Já sun eeđâi: »Jeesus, mušte muu, ko puáđáh väldikoddásâd.» ₄₃Jeesus västidij: »Tuođâi: jo onne lah muin paradiisist.»

₄₄Lâi jo kuudâd tijme. Talle, koskâpeeivi ääigi, piäiváš siävŋánij. Sevŋâdâs poođij ubâ eennâm oolâ, já tot piištij oovcád tiijme räi. ₄₅Temppâl ovdâloovdâ kiškui kuovdin.

₄₆Já Jeesus čuorvij korrâ jienáin: »Eeči, tuu kieđáid mun oskom jieggân.» Ko sun lâi ettâm taam, sun vuoiŋâi majemuu keerdi.

₄₇Ko čyeđeuáivalmai ooinij, mii tábáhtui, sun adelij Imelân kunnee já eeđâi: »Taat almai lâi tuođâi vavettem.» ₄₈Já puohah toh ulmuuh, kiäh stuorrâ juávhuiguin lijjii čokkânâm keččâđ taam čaitâlmâs, maccii taam uáinim maŋa kaavpugân já huškuu raddees. ₄₉Jeesus uápisulmuuh čuožžuu puohah kukkeláá já čuovvuu tobbeen tábáhtuumijd. Tobbeen lijjii meiddei nisoneh, kiäh lijjii puáttám Galileast suu fáárust.

_50-51Ohtâ rääđi jeessân, Joovsep, kote lâi meddâl juudalii Arimatia kaavpugist, ij lamaš miettâm rääđi miärádâsân ige uásálistâm ton toimáid. Sun lâi šiev já hurskes almai já vuordij Immeel väldikode. ₅₂Joovsep moonâi Pilatus savváid já táátui Jeesus rummâš. ₅₃Sun vaaldij tom riistâst, kiesâi piellivâspihtâsân já piejâi källei čuollum háávdán, moos ij lam vala hävdidum kihheen. ₅₄Lâi valmâštâspeivi, sabbaat lâi eidu älgimin.

₅₅Nisoneh, kiäh lijjii Jeesusáin puáttám Galileast, vuolgii Joovsep fáárun. Sij oinii, maht Jeesus ruumâš pieijui háávdán. ₅₆Ko sij maccii kaavpugân, sij hahhii njaalgâhaajâg oljoid já vuoidâsijd, mut sabbaat sij viettii vuoiŋâstmáin laavâ pákkum mield.