Luukas 22

₁Suvrothánnáá leeibi juhle, maid kočodeh meid pessijâžžân, lâi jo alda. ₂Ollâpaapah já laavâmáttáátteijeeh smiettii korrâsávt, moin naalijn sij puávtáččii surmiđ Jeesus, tastko sij pollii aalmugist.

₃Talle moonâi Sáttán Juudasân, kiäm kočodii Iskariotin; sun lâi ohtâ kyevtnubálov máttááttâspárnáást. ₄Sun vuolgij ollâpaapâi já temppâlvaavtâi hoovdâi kuuvl já savâstâlâi siiguin tast, maht sun toimâttičij Jeesus sii kieđáid. ₅Sij ilosmii já fallii sunjin ruuđâ. ₆Juudas mieđâi falâldâhân já uusâi vuovâs ääigi Jeesus saatâšmân sii kieđáid aaibâs joskâdávt.

₇Te poođij tot suvrodhánnáá leeibi peivi, kuás pessijâšsaavzâ kalga njuovvâđ. ₈Jeesus vuolgâttij Piättár já Juhánâs kaavpugân já eeđâi sunnui: »Mannee valmâštâllâđ mijjân pessijâšpurrâmâš.» ₉Suoi koijâdáin: »Kuus tun halijdah munnuu valmâštiđ tom?» ₁₀Sun eeđâi: »Ko tuoi puátivettee kaavpugân, puátá tunnuu oovdeld čäciruho kyeddee almai. Čuávvoo suu. Mannee tom táálun, moos sun mana, ₁₁já ettee táálu išedân: ’Máttáátteijee koijâd tust, kost lii viste, mast sun puáhtá purâdiđ pessijâšpurrâmâš máttááttâspárnáidiskuin.’ ₁₂Iššeed čáittá tunnui pajekeerdist stuorrâ loonjâ, mast puoh lii oornigist. Valmâštiđ toho purrâmâš.» ₁₃Suoi vuolgijn máátkán, já puoh tábáhtui nuuvt ko Jeesus lâi sijjân ettâm. Suoi valmâštâláin pessijâšpurrâmâš.

₁₄Ko äigi poođij, te Jeesus puurâdškuođij pessijâšpurrâmâš apostolijguin. ₁₅Sun eeđâi sijjân: »Mun lam tuođâi halijdâm puurrâđ taam pessijâšpurrâmâš tiiguin ovdil kierdâmâšâidân. ₁₆Tastko mun eeđâm tijjân: mun jiem innig puurâ pessijâšpurrâmâš ovdilgo tot uážžu olášume Immeel väldikoddeest.» ₁₇Sun vaaldij kaalhâ, kiijtij Immeel já eeđâi: »Väldiđ taam já jyehiđ koskânâd. ₁₈Mun eeđâm tijjân: mun jiem innig smakkii viiniponnjoos adalduv ovdilgo Immeel väldikodde lii puáttám.»

₁₉Talle sun vaaldij leeibi, sivnedij, tojâlij já adelij máttááttâspárnáidis já eeđâi: »Taat lii muu ruumâš, kote tii peeleest adeluvvoo. Toohâđ tom muu mušton.» ₂₀Purrâmâš maŋa sun siämmáánáál vaaldij kaalhâ já eeđâi: »Taat kalkkâ lii uđđâ litto muu voorâst, mii kulgâttuvvoo tii peeleest. ₂₁Mut taam siämmáá piävdán keigee kieđâs meid muu kävildeijee. ₂₂Ulmuu Alge vuálgá tääbbin eidu nuuvt ko sun kalga-uv vyelgiđ, mut vuoi tom, kiäst šadda suu kävildeijee!» ₂₃Máttááttâspárnááh koijâdâlškuottii kyeimistis, kii sist puávtáččij leđe tot.

₂₄Máttááttâspárnái kooskân šoodâi nággu meid tast, kotemuu sist kolgâččij nabdeđ sturráámussân.

₂₅Talle Jeesus eeđâi sijjân:

»Kunâgâsah haldâšeh hiärrán aalmugijdis, já vääldituálleeh väätih, et sii kočoduuččii pyeretahhen. ₂₆Nuuvt ij uážu leđe tii koskâvuođâst. Kote tii juávhust lii stuárráámus, tot liävus tegu nuorâmus, já kote lii hovdâ, liävus sun tegu palvâleijee. ₂₇Kuábáš lii stuárráb – tot, kote lii puurâdmin, vâi tot, kote palvâl suu? Ij-uv tot, kote lii puurâdmin? Mut mun lam tii kooskâst, tegu tot, kote palvâl.

₂₈»Ubâ ääigi, puoh keččâlusâinân, tij leppeđ pissoom muin. ₂₉Nuuvtpa mun adelâm tijjân kunâgâslâš vääldi, nuuvt tegu iäččám lii adelâm munjin. ₃₀Tij uážžuvetteđ muu väldikoddeest puurrâđ já juuhâđ muu peevdist, já tij čokkáávetteđ väldičokkámsoojijn já haaldâšvetteđ Israel kyehtnubáloh hiäimud.

₃₁»Simmoon, Simmoon! Sáttán lii uážžum love silliđ tii tegu valje. ₃₂Mut mun lam ruhâdâllâm tuu peeleest, amas oskod časkâđ. Já ko tun lah puáttám maasâd, te naanood viljâidâd.»

₃₃Piättár eeđâi sunjin: »Hiärrá, tuin mun lam kiärgus moonnâđ veikkâ faŋgâlân tâi jämimân-uv.» ₃₄Mut Jeesus västidij: »Mun eeđâm tunjin Piättár: Ovdil ko käniores onne piško, tun lah kulmii kiäldám tubdâmist muu.»

₃₅Jeesus eeđâi máttááttâspárnáidis: »Ko vuolgâttim tii máátkán pursâttáá, lavhâttáá já kammuittáá, te vááilui-uv tist mihheen?» »Ij mihheen», sij västidii. ₃₆Talle Jeesus eeđâi: »Tääl lii nubenáál. Kiäst lii pursâ, váldus tom fáárun, siämmáá ko laavhâ. Kiäst ij lah ruttâ, vuábdus olgomáccuhis já uástus miehi. ₃₇Tastko tiettiđ, et taat čaalâ ferttee must olášuđ: ’Sun luhhui rikolij juávkun.’ Puoh, mii must lii ettum, tääl olášuvá.» ₃₈Máttááttâspárnááh ettii: »Hiärrá, taa láá kyehti miehi.» »Tuárvás», sun västidij.

₃₉Jeesus vuolgij kaavpugist já vyevis mield moonâi Oljováárán. Máttááttâspárnááh čuovvuu suu. ₄₀Toho puáđidijn Jeesus eeđâi sijjân: »Ruhâdâllâđ, amas šoddâđ kivsádâsân.» ₄₁Jieš sun moonâi váhá olgoláá, keđgileggistem mudo kiäčán, luáštádâđâi idduidis oolâ já ruhâdâlâi: ₄₂»Eeči, jis halijdah, te vääldi taam kaalhâ must meddâl. Mut nuuvt, et muu táttu ij olášuu pic tuu.» ₄₃Talle almeest almostui sunjin eŋgâl, kote nanodij suu. ₄₄Stuorrâ toskeest Jeesus ruhâdâlâi ain äŋgirubbooht nuuvt, et pivâstâh kuulgâi enâmân vorrâkuáškánjâsâi náálá. ₄₅Ko sun čyežžilij ruhâdâlmist já poođij máttááttâspárnái kuuvl, sun kuáhtái sii uáđimin. Muurâš lâi silodâm sii. ₄₆»Maid? Uáđivetteđ-uv tij?» sun eeđâi. Čyežžiliđ já ruhâdâllâđ, amas šoddâđ kivsádâsân.»

₄₇Jeesus vala sárnudijn poođij toho almaijuávkku, já sii uápisin lâi Juudas, kyehtnubálov máttááttâspárnáást ohtâ. Juudas poođij Jeesus kulij cummâlemdiet suu, ₄₈mut Jeesus eeđâi sunjin: »Juudas, cummijn-uv tun kävildâh Ulmuu Alge?» ₄₉Ko Jeesus siärváliih oinii, mii lii tábáhtuumin, sij ettii: »Hiärrá, časkep-uv miehhijn?» ₅₀Sist ohtâ čooskij-uv ollâpaapâ palvâleijee nuuvt, et suu uálgispele pelji luovânij. ₅₁Mut Jeesus eeđâi: »Ij! Tipteđ taam-uv tábáhtuđ.» Sun kuoskâttij almaa peelji já pyeredij suu. ₅₂Talle sun eeđâi ollâpappáid, temppâlvaavtâi hoovdân já aalmug puárásumosáid, kiäh lijjii puáttám faŋgiđ suu: »Tij leppeđ vuálgám tegu riävvár vuástá, miehih já kaarbah kieđâin. ₅₃Mun lam lamaš jyehi peeivi tii kooskâst temppâlist, eppeđge tij lah kieđâidâd luptim muu vuástá. Mut tääl lii tii puddâ, tääl lii sevŋâdâs väldi.»

₅₄Sij fäŋgejii Jeesus já tolvuu ollâpaapâ táálun. Piättár čuávui suu mottoom määđhi keejist. ₅₅Kuávdoo šiljo cokkiittui tullâ já ko ulmuuh čokijdii tom pirrâ, čokánij Piättár še sii juávkun. ₅₆Mottoom pijgá ooinij suu čokkáámin tullâpiällást, keejâi suu kuhháá já eeđâi: »Taat-uv lâi suin.» ₅₇Piättár kieldij: »Mun vâi? Jiemhân ubâ tuubdâgin suu.» ₅₈Váhá ääigi keejist mottoom almai eeđâi suu uáinidijn: »Tun še lah ohtâ tain.» Mut Piättár västidij: »Feiliih, jiem lah.» ₅₉Tiijme keččin vala nubbe almai tähidij: »Kale tuot-uv vissásávt lâi toin almain, liihân sun galilealâš-uv.» ₆₀Mut Piättár eeđâi: »Jiem ibbeerd, mast sáárnuh.» Siämmást, suu vala sárnudijn, känioreš piškoi. ₆₁Hiärrá jorgettij já keejâi Piätárân, já Piättár muuštij, maid Hiärrá lâi sunjin ettâm: »Ovdil ko käniores onne piško, tun kulmii kiäldáh muu.» ₆₂Sun moonâi olgos já čiärui poočâht.

₆₃Almaah, kiäi kieđâin Jeesus lâi, pilkkedii já huškuu suu. ₆₄Sij lovdii suu čoolmijd já ettii: »Profetist tääl! Kii tuu čooskij?» ₆₅Maŋgáin eres-uv vuovvijn sij pelhittii suu.

₆₆Ko peivi čuovânij, čokkânii aalmug puárásumoseh, ollâpaapah já laavâmáttáátteijeeh rääđi čuákkimân. Jeesus puohtui sii oovdân, ₆₇já sij ettii sunjin: »Jis lah Messias, te eeđâ tom mijjân.» Jeesus västidij: »Jis eeđâm tom tijjân, tij eppeđ osko. ₆₈Já jis maidnii koijâdâm, tij eppeđ västid. ₆₉Mut täst oovdâs Ulmuu Alge šadda čokkáđ Puohváldálii uálgispeln.» ₇₀Talle sij puohah koijâdii: »Lah-uv tun talle Immeel Alge?» Jeesus västidij sijjân: »Jiejahpa tij nuuvt etâvetteđ.» ₇₁Talle sij ettii: »Maid tuođâštusâid mij innig tarbâšep! Mijhân lep kuullâm tom suu jieijâs njäälmist.»