Johannes 21

₁Taan maŋa Jeesus vuod almostui máttááttâspárnáidis, tääl Tiberiajäävri riddoost. Taat tábáhtui näävt:

₂Tobbeen lijjii oovtâst Simmoon Piättár, Tyemes ađai Didymos, Natanael Galilea Kaanast, Sebedeus algeh já kyevtis Jeesus eres máttááttâspárnáin. ₃Simmoon Piättár eeđâi: »Mun vuálgám kuálástiđ.» »Mij puáttip fáárun, iäráseh ettii. Sij lävkkejii kárbás já vuolgii jäävri oolâ, mut sij iä koddám ton iijâ maiden. ₄Iđedist Jeesus čuážui riddoost, mut máttááttâspárnááh iä tubdâm suu. ₅Jeesus čuárvui sijjân: »Kuullâđ, almaah! Lii-uv tist mihheen purrâmâššân?» »Ij lah», sij västidii. ₆Jeesus eeđâi: »Suáppuđ viermi kárbá uálgispel, te tij koddevetteđ kuolijd.» Sij suoppuu viermi, já kyeleh pottii nuuvt ennuv, et sij iä vaijaam keessiđ viermi pajas. ₇Talle tot máttááttâspärni, kote lâi Jeesusân rákkásumos, eeđâi Piätárân: »Tot lii Hiärrá!» Ko Simmoon Piättár kuulâi, et tot lâi Hiärrá, sun kárvuttij kiessâmmááccuhis, mon lâi nuollâm, já njuškij čáácán. ₈Eres máttááttâspárnááh pottii kárbáin já kessii maaŋaabeln viermi, mii lâi tievâ kuolijn, tastko riidon ij lam kukkegin mätki, tuše muáddičyet älnid.

₉Ko máttááttâspárnááh pottii riidon, sij oinii, et tobbeen lijjii kyeleh já leeibih ilosist possuumin. ₁₀Jeesus eeđâi sijjân: »Pyehtiđ teehin taid kuolijd, maid tij eskin kuudijd.» ₁₁Simmoon Piättár moonâi kárbás já keesij viermi enâmân. Tot lâi tievâ stuorrâ kuolijn, mut veik kyeleh lijjii-uv ennuv – ohtsis čyetivittâlovkulmâ – viermi ij kiškum.

₁₂Jeesus eeđâi: »Puáttiđ puurrâđ.» Kihheen máttááttâspárnáin ij tuostâm koijâdiđ: »Kii tun lah?» tastko sij tiettii, et tot lâi Hiärrá. ₁₃Jeesus poođij, vaaldij leeibi já adelij sijjân, siämmáánáál sun adelij kyele. ₁₄Taat lâi jo kuálmád kerdi, ko Jeesus jämimist paijaanmis maŋa almostui máttááttâspárnáidis.

₁₅Ko sij lijjii purâdâm, Jeesus eeđâi Simmoon Piätárân: »Simmoon, Juhánâs alge, rähistah-uv tun muu eenâb ko taah iäráseh?» »Rähistâm, Hiärrá», Piättár västidij, »tun tiäđáh, et tun lah munjin räähis.» Jeesus eeđâi: »Piemâ muu lábbáid.» ₁₆Talle sun koijâdij nube kerd: »Simmoon, Juhánâs alge, rähistah-uv tun muu?» »Rähistâm, Hiärrá», Piättár västidij, »tun tiäđáh, et tun lah munjin räähis.» Jeesus eeđâi: Kuáđut muu saavzâid.» ₁₇Vala kuálmád keerdi Jeesus koijâdij: »Simmoon, Juhánâs alge, lam-uv mun tunjin räähis?» Piättár šoodâi murâšlâžžân tast, et Jeesus kuálmád keerdi koijâdij sust: »Lam-uv mun tunjin räähis?», já sun västidij: »Hiärrá, tun tiäđáh puoh. Tun tiäđáh, et tun lah munjin räähis.» Jeesus eeđâi: »Piemâ muu saavzâid. ₁₈Tuođâi, tuođâi: Ko tun lijjih nuorâ, tun puáhánjistih jieijâd já moonnih, kuus tun halijdih. Mut ko tun puárásmah, tun keigiih kieđâd já tuu puáhánjist kiinii eres, kote tuálvu tuu kuus tun jieh táátu.» ₁₉Näävt Jeesus almottij, maggaar jämimáin Piättár koolgâi kirkesmittiđ Immeel. Talle sun eeđâi: »Čuávu muu.»

₂₀Piättár jorgettij já ooinij tom máttááttâspäärni čuávumin, kote lâi Jeesusân rákkásumos, tom, kote málásij ääigi lâi mieigâm suu radded vuástá já koijâdâm: »Hiärrá, kii tot lii? Kii tuu käävild?» ₂₁Suu uáinidijnis Piättár koijâdij Jeesusist: »Nabai sun, Hiärrá?» ₂₂Jeesus västidij: »Maid tot tunjin kulá, veik mun halijdiččim, et sun páácá teehin ain ton räi ko mun puáđám? Čuávu tun muu.»

₂₃Täst šoodâi viiljâi koskâvuođâst uáinu, et tot máttááttâspärni ij jäämi. Jeesus ij kuittâg ettâm Piätárân, et taat máttááttâspärni ij jäämi. Sun eeđâi: »Maid tot tunjin kulá, veik mun halijdiččim, et sun páácá teehin ain ton räi ko mun puáđám?»

₂₄Eidu taat máttááttâspärni tuođâšt puoh täst. Sun lii taam čáállám, já mij tiettip, et suu tuođâštem lii lyetittettee.

₂₅Ennuv eres-uv tavoid Jeesus toovâi. Jis jyehi äšši čalluuččij kiirján, jurdám, et ubâ maailmân iä šietâččii toh kirjeh, maid kolgâččij čäälliđ.