Johannes 20

₁Ko sabbaat lâi moonnâm, oho vuosmuu peeivi Magdala Máárjá poođij jo iiđeedveigin häävdi kuuvl já ooinij, et keđgi lâi sirdum meddâl häävdi oovdâst. ₂Sun vuolgij kaačân muštâliđ tast Simmoon Piätárân já ton máttááttâspáárnán, kote lâi Jeesusân rákkásumos, já eeđâi sunnuu teivâdijnis: »Sij láá tuálvum Hiärá meddâl häävdist, epke mij tieđe, kuus sij láá pieijâm suu.» ₃Piättár já tot nubbe máttááttâspärni vuolgijn tállân kaačân häävdi kuuvl.

₄Almaikyevtis moonáin oovtfááru, mut tot nubbe máttááttâspärni kaačâi jotelubbooht ko Piättár já kiergânij vistig häävdi kuuvl. ₅Sun kuovlâlij siisâ já ooinij, et kiessâmlijneh lijjii tobbeen, mut sun ij moonnâm siisâ. ₆Simmoon Piättár poođij suu maajeeld, moonâi háávdán já kejâdij kiessâmlijnijd, moh lijjii tobbeen. ₇Sun huámmášij, et Jeesus muáđuid luávdám pivâstâhlijne ij lam kiessâmliijnij paaldâst pic jieijâs kiesâldâhhân. ₈Tääl poođij siisâ meiddei tot nubbe máttááttâspärni, kote lâi vistig puáttám häävdi kuuvl, já sun ooinij já oskoi. ₉Vala sij iä lamaš iberdâm, et čallui mield Jeesus koolgâi pajaniđ jämimist.

₁₀Máttááttâspárnááh vuolgii häävdi kulen páikkásis.

₁₁Máárjá čuážui häävdi uuvsâ kulen já čiärui. Tast čiärudijnis sun kuovlâlij háávdán ₁₂já ooinij, et tast, kogo Jeesus ruumâš lâi lamaš, čokkáin vielgispiivtâs eŋgâlkyevtis, nubbe uáivikeččin já nubbe jyelgikeččin. ₁₃Eŋgâlkyevtis eeđáin sunjin: »Mondiet tun čiäruh, nissoon?» Sun västidij: »Muu Hiärrá lii tolvum meddâl, jiemge tieđe, kuus sij láá pieijâm suu.» ₁₄Ko sun lâi ettâm taam, sun jorgettij já ooinij Jeesus čuážžumin jieijâs tyehin, mut ij iberdâm, et tot lâi Jeesus. ₁₅Jeesus eeđâi sunjin: »Maid tun čiäruh, nissoon? Kiäm tun uusah?» Máárjá noobdij Jeesus muorâkäärdi tipšon já eeđâi: »Hiärrá, jis tun lah tuálvum suu meddâl tääbbin, te eeđâ, kuus tun lah suu pieijâm. Mun viežâm suu meddâl.» ₁₆Talle Jeesus eeđâi sunjin: »Máárjá.» Máárjá jorgettij já eeđâi: »Rabbuuni!» – tot lii hepreakielâ já meerhâš: muu máttáátteijee. ₁₇Jeesus eeđâi: »Ele kuoskâ munjin. Mun jiem lah vala pajanâm Eeji kuuvl. Moonâ tun tuálvuđ sääni muu viljáid já eeđâ sijjân, et mun moonâm pajas jieččân Eeji já tii Eeji kuuvl, jieččân Immeel já tii Immeel kuuvl.»

₁₈Magdala Máárjá toomâi máttááttâspárnái kuuvl já almottij: »Mun lam uáinám Hiärá!» Tastoo sun muštâlij, maid Hiärrá lâi sunjin ettâm.

₁₉Siämmáá peeivi, oho vuosmuu peeivi, máttááttâspárnááh lijjii ehidist čuákist lukkâdum uuvsâi tyehin, tastko sij pollii juudalijn. Kivkked Jeesus čuážui sii kooskâst já eeđâi: »Ráávhu tijjân!» ₂₀Taam eđâdijn sun čaaitij sijjân kieđâidis já eertis. Máttááttâspárnááh ilosmii, ko sij oinii Hiärá. ₂₁Jeesus eeđâi uđđâsist: »Ráávhu tijjân! Nuuvtko Eeči lii vuolgâttâm muu, nuuvt mun vuolgâttâm tii.» ₂₂Taam eđâdijn sun posádij sii kulij já eeđâi: »Väldiđ Pase Jiegâ. ₂₃Kiäs tij addelvetteđ suddoid addâgâs, sunjin toh láá addâgâs adelum. Kiäst tij kieldivetteđ addâgâsadelem, sun ij finnii sudoidis addâgâs.»

₂₄Ohtâ kyehtnubálov máttááttâspárnáást, Tyemes, kiäst kevttui meid nommâ Didymos, ij lamaš iärásij juávhust, ko Jeesus poođij. ₂₅Eres máttááttâspárnááh muštâlii sunjin: »Mij ooinijm Hiärá.» Mut Tyemes eeđâi: »Mun jiem osko. Jis jiem jieš uáini spiijkársoojijd suu kieđâin já čuoggii jieččân suormâ toid já jis jiem piejâ kiettân suu iärtán, te mun jiem osko.»

₂₆Oho keččin Jeesus máttááttâspárnááh lijjii oppeet čuákist, já Tyemes lâi sii juávhust. Uuvsah lijjii luuhâst, mut kivkked Jeesus čuážui sii kooskâst já eeđâi: »Ráávhu tijjân!» ₂₇Talle sun eeđâi Tuámásân: »Keigii suormâd: taa láá muu kieđah. Keigii kieđâd já piejâ tom muu iärtán. Jieh koolgâ leđe epioskolâš, pic koolgah oskođ!» ₂₈Talle Tyemes eeđâi: »Muu Hiärrá já muu Immeel!» ₂₉Jeesus eeđâi sunjin: »Tun oskoh, ko tun peessih uáiniđ muu. Avdâgâsah toh, kiäh oskoh, veikkâ iä uáini.»

₃₀Maaŋgâid eres-uv tobdostavoid Jeesus toovâi máttááttâspárnáidis uáinidijn, mut tain ij lah muštâlum taan kirjeest. ₃₁Taat lii čallum tondiet, et tij oskoččijd, et Jeesus lii Kristus, Immeel Alge, já et tist ličij oskod tiet eellim suu noomâst.