Johannes 2

₁Oho kuálmád peeivi viettii Galilea Kaanast heejâid. Jeesus enni lâi tobbeen, ₂já meid Jeesus já suu máttááttâspárnááh lijjii puávdejum heejáid. ₃Viini nuuvâi koskân, já enni eeđâi Jeesusân: »Sist ij lah viini.» ₄Mut Jeesus västidij: »Tipte muu orroođ, nissoon. Muu äigi ij lah vala puáttám.» ₅Suu enni eeđâi palvâleijeid: »Maid sun tijjân eeđâškin, porgâđ tom.»

₆Tobbeen lijjii kuttâ keđgilite juudalij putásmittemvuovij miäldásij posâdâttâm várás; toh kessii kyevti tâi kuulmâ mito verd čääsi. ₇Jeesus eeđâi palvâleijeid: »Tevdiđ liitijd čassijn», já sij tevdii taid roobdâ räi. ₈Talle sun eeđâi: »Väldiđ tääl tast já tuálvuđ tuálui koccei», já nuuvt sij tolvuu. ₉Koccee smakkij čääsist: tot lâi muttum viinin. Nubenáál ko palvâleijeeh, kiäh lijjii čääsi litteest váldám, sun ij tiättám, kost viini lâi vuálgus. Sun kočoi irge jieijâs kuuvl ₁₀já eeđâi: »Puohah fäälih vistig šiev viini já talle ko kyesih juhâluuškyeteh, te hyeneeb. Mut tun lah šiäštám šiev viini taan räi.»

₁₁Taat lâi Jeesus tobdostavoin vuosmuš, já sun toovâi tom Galilea Kaanast. Toin sun olgospuovtij kirkkâdvuođâs, já suu máttááttâspárnááh uskuu sunjin.

₁₂Tast maŋa Jeesus sehe suu enni, viljâ já máttááttâspárnááh monnii Kapernaumân já orostellii tobbeen mottoom peeivi.

₁₃Juudalij pessijâšjuhle lâi puátimin já Jeesus vuolgij Jerusalemân. ₁₄Sun ooinij temppâlist kävppijâsâid, kiäh vuobdii vuávsáid, saavzâid já tuvváid. Tobbeen čokkájii meid ruttâlonotteijeeh. ₁₅Jeesus raahtij orrâpittáin spižá já vyejettij sii puohâid meddâl temppâlist savzâidiskuin já vuávsáidiskuin. Sun ripâstij lonotteijei ruuđâid enâmân já komettij sii peevdijd. ₁₆Tuvváášvyebdeid sun eeđâi: »Tuálvuđ ludijdâd meddâl! Elleđ räähti Iäččán táálust markkânsaje! ₁₇Talle máttááttâspárnááh muštii, maht čalluin iättoo: »Kijvesvuotâ tuu temppâl peeleest luáptá muu.»

₁₈Juudaliih ettii Jeesusân: »Mii vuoigâdvuođâid tust lii porgâđ nyevt? Moin tobdostavvoin tun tuođâštah mijjân vuoigâdvuođâd?» ₁₉Jeesus västidij: »Pieđgiđ taam temppâl, te mun uážum tom pajaniđ kuulmâ peeivist.» ₂₀Talle juudaliih ettii: »Taam temppâl láá huksim neljilovkuttâ ihheed. Tun-uv cegâttiččih tom kuulmâ peeivist?» ₂₁Jeesus uáivildij kuittâg temppâláin jieijâs rummâš. ₂₂Ko sun lâi pajanâm jämimist, máttááttâspárnááh muštii täid suu saanijd, já uskuu čalluid já toos, maid Jeesus lâi sárnum.

₂₃Ko Jeesus lâi pessijâšjuhle ääigi Jerusalemist, te maaŋgah uskuu sunjin, ko sij oinii taid tobdostavoid, maid sun poorgâi. ₂₄Jeesus ij liijká čáittám sijjân luáttámuš, tastko sun tieđij, maggaar olmooš lii. ₂₅Sun ij tarbâšâm kiännán tuođâštus ulmust, ko sun tieđij jieš, mii ulmuu vááimust lii.