Jeesus já Nikodemus
1Fariseusij juávhust lâi Nikodemus-nommâsâš almai, juudalij rääđi jeessân. 2Sun poođij iho Jeesus kuuvl já eeđâi: »Rabbi, mij tiettip, et tun lah Immeel vuolgâttem máttáátteijee. Ij kihheen paste toohâđ tagarijd tobdostavoid tego tun, jis Immeel ij lah suin.» 3Jeesus västidij sunjin: »Tuođâi, tuođâi: jis olmooš ij šoodâ uđđâsist, paijeen, sun ij peesâ uáiniđ Immeel väldikode.» 4Nikodemus koijâdij: »Maht kiinii puávtáččij šoddâđ puárisin? Maht kiinii puávtáččij moonnâđ maassâd ennis kuáhtun já šoddâđ nube keerdi?»
5Jeesus västidij: »Tuođâi, tuođâi: jis olmooš ij šoodâ čääsist já Jiegâst, sun ij peesâ Immeel väldikoodán. 6Mii lii šoddâm uážist, lii uážži, mii lii šoddâm Jiegâst, lii jieggâ. 7Ele imâštâl tom, et mun eeđâm tunjin: ’Tij ferttiivetteđ šoddâđ uđđâsist.’ 8Pieggâ poso kost haalijd. Tun kuulah tuše ton šuuvvân, mut jieh tieđe, kost tot puátá já kuus tot mana. Siämmáánáál lii tast, kote lii Jiegâst šoddâm.»
9»Maht taat puoh lii máhđulâš?» Nikodemus koijâdij.
10Jeesus västidij:
»Jieh-uv tun, Israel máttáátteijee, ibbeerd tom?
11»Tuođâi, tuođâi: mij sárnup maid tiettip já tuođâštep tast, maid lep uáinám, mut tij eppeđ vääldi vuástá mii tuođâštus. 12Jis tij eppeđ osko, ko mun sáárnum tijjân taan maailm aašijn, maht tij puávtáččijd oskođ, ko mun sáárnum almalijn aašijn! 13Kihheen ij lah pajanâm aalman, eereeb sun, kote lii almeest teehi puáttám: Ulmuu Alge. 14»Nuuvt tegu Mooses ävđinkuávlust luptij kyevdi ollâgâsân, siämmáánáál šadda meid Ulmuu Alge pajeduđ, 15vâi juáháš, kote osko sunjin, uážuččij nuvâhánnáá eellim. 16Immeel lii rähistâm maailm nuuvt ennuv, et sun adelij áinoo Algees, amas ohtâgin, kote sunjin osko, šoddâđ káđuttâsân, pic uážuččij nuvâhánnáá eellim.
17»Ij Immeel vuolgâttâm Algees maailmân tom tuommiđ, pic piäluštiđ tom. 18Tot, kote osko sunjin, ij tyemmejuu, mut tot, kote ij osko, lii jo tyemmejum, tastko sun ij oskom Immeel áinoo Aalgan. 19Já tuámu lii taat: čuovâ lii puáttám maailmân, mut paas tavoi keežild láá ulmuuh valjim čuovâ sajan sevŋâdâs. 20Tot, kote taha paa, karva čuovâ; sun ij puáđi čuovân, amas suu tavoh itteeđ uáinusân. 21Mut tot, kote nuávdit tuotâvuođâ, puátá čuovân, vâi čielgâččij, et suu tavoh láá vuálgus Imelist.»
Johannes Kästee já Messias
22Tastmaŋa Jeesus vuolgij máttááttâspárnáidiskuin Juudean. Sun ájánij tobbeen siiguin mottoom ääigi já kaastij ulmuid. 23Meid Johannes kaastij ain-uv; sun lâi Ainonist, Salim alda, kost lâi valjeest čääci, já ulmuuh pottii toho kästimnáál. 24Johannes ij uáináh lamaš vala karttâm faŋgâlân.
25Motomin Johannes máttááttâspárnááh kištâlii motomáin juudalijn jieijâs putásmitmist. 26Máttááttâspárnááh monnii Johannes kuuvl já ettii: »Rabbi, tääl lii kästiškuáttám meiddei tot almai, kote lâi tuin Jordan nubebeln já kiäst tun adelih šiev tuođâštus. Puohah maneh suu kuuvl.»
27Johannes västidij: »Kihheen ij pyevti väldiđ maiden, jis tot ij adeluu sunjin almeest. 28Tij pyehtivetteđ jiejah tuođâštiđ, et mun ettim: ’Jiem mun lah Messias. Mun lam vuolgâttum jotteeđ suu ovdiibeln.’ 29Irge lii tot, kiäst lii myerssee. Mut irge ustev čuážžu suu paaldâst já kuldâl suu sárnum, já illood čuuvtij irge kuldâldijnis. Nuuvt ilodâm mun-uv, já muu ilo lii tääl tievâslâš. 30Sun kalga stuárruđ áárvust já mun uccođ.»
31Sun, kote puátá paijeen, lii puohâi paajaabeln. Sun kote lii enâmist, lii eennâm kovjâ já sárnu taan maailm aašijn. Sun, kote puátá almeest, 32tuođâšt tast, maid lii uáinám já kuullâm, mut kihheen ij vääldi vuástá suu tuođâštus. 33Sun kote váldá suu tuođâštus vuástá, tuubdâst, et Immeel sárnu tuođâ, 34tastko sun, kiäm Immeel lii vuolgâttâm, sárnu Immeel saanijd. Ij Immeel adde Jiegâs merimittoin. 35Eeči räähist Alge já lii adelâm puoh suu vááldán. 36Tast, kote osko Aalgan, lii nuvâhánnáá eellim, mut kote ij tottâl Alge, ij peesâ uáiniđ eellim, pic Immeel vaje piso suu alne.
