Roma 2

₁Danne dus ii leat mihkkege bealuštusaid, don olmmoš gii dubmet, gii ihkinassii don leaččat. Go don dubmet nuppi, de don dubmet maiddái iežat, danin go don ieš dagat seammá daguid. ₂Mii diehtit ahte Ipmil lea vuoiggalaš go son dubme daid geat dahket dakkáriid. ₃Gáttátgo don ahte sáhtát vealtat Ipmila duomus, go ieš dagat dakkára man dihte dubmet earáid? ₄Dahje badjelgeahčatgo don su geahčemeahttun buorrevuođa, gierdavašvuođa ja guhkesmielalašvuođa? Itgo don ádde ahte Ipmila buorrevuohta doalvu du jorgalussii? ₅Muhto du garra váibmu mii ii dáhto jorgalit, čohkke moari mii deaivida du moari beaivvi go Ipmila vanhurskkis duopmu almmustuvvá. ₆Son máksá juohkehažžii su daguid mielde. ₇Son addá agálaš eallima sidjiide geat gierdavaččat dahket buriid ja ohcet hearvásvuođa, gudni ja nohkameahttunvuođa,. ₈Muhto sii geat iešbuorrevuođas hilgot duohtavuođa ja jeagadit vearrivuođa, ožžot moari ja ráŋggáštusa. ₉Áŧestus ja giksi boahtá juohke olbmui gii dahká bahá, vuos juvddálažžii ja dasto greikalažžii, ₁₀muhto hearvásvuohta, gudni ja ráfi boahtá juohkehažžii gii dahká buriid, vuos juvddálažžii ja dasto greikalažžii. ₁₁Dasgo Ipmil ii geahča olbmo hápmái.

₁₂Sii geat leat suddudan lága haga, maiddái duššet lága haga, ja dat geat suddudit vaikko sii dovdet lága, dubmejuvvojit lága mielde. ₁₃Ipmil ii ane vanhurskkisin daid geat gullet lága sániid, muhto atná vanhurskkisin sin geat dahket maid láhka cealká. ₁₄Go báhkinat geain ii leat láhka, luonddusteaset dahket dan maid láhka gáibida, de sii leat ieža alcceseaset láhkan, vaikko sis ii leatge láhka. ₁₅Nu sii čájehit ahte lága gáibádus lea čállojuvvon sin váibmui. Maiddái sin oamedovdu duođašta dan, go sin jurdagat jogo váidalit dahje bealuštit sin. ₁₆Nu lea dan beaivvi go Ipmil dubme váimmuid čiegusvuođaid dan evangeliuma mielde maid mun lean ožžon Jesus Kristusis.

₁₇Don gohčodat iežat juvddálažžan ja luohtát láhkii ja Ipmil lea du rápmi, ₁₈don dovddat su dáhtu ja máhtát dubmet mii lea mávssolaš, danne go don leat oahppan lága. ₁₉Don anát iežat čalmmehemiid oahpisteaddjin ja čuovgan sidjiide geat ellet seavdnjadasas, ₂₀jierpmehemiid bagadeaddjin ja mánáid oahpaheaddjin, danne go dus lea lágas diehtu ja duohtavuohta. ₂₁Don gii oahpahat earáid, itgo iežatge oahpat? Don gii sárdnidat ahte ii galgga suoládit, suoládatgo ieš? ₂₂Don gii dajat ahte ii galgga rihkkut náittosdili, rihkutgo ieš náittosdili? Don gii fasttášat eahpeipmiliid, rievidatgo ieš sin tempeliid? ₂₃Don gii čevllohalat lágain, heahppášuhtátgo Ipmila go ieš rihkut lága? ₂₄Nu han lea čállojuvvon: Din dihte Ipmila namma bilkiduvvo báhkiniid gaskkas.

₂₅Birračuohpahus lea gal dutnje ávkin jos don doalat lága. Muhto jos rihkut lága, de don leat dego birračuohpakeahtes olmmoš. ₂₆Jos birračuohpakeahtes olmmoš doallá lága njuolggadusaid, iigo son dalle galgga adnojuvvot birračuhppojuvvon olmmožin? ₂₇Birračuohpakeahtes olmmoš gii doallá lága gohččumiid, dubme du, danin go don rihkut lága, vaikko leat birračuhppojuvvon. ₂₈Rivttes juvddálaš ii leat dat gii olgguldasat lea juvddálaš, iige birračuohpahus leat dat mii oidno rupmašis olgguldasat. ₂₉Rivttes juvddálaš lea dat gii lea juvddálaš siskkildasat, ja rivttes birračuohpahus lea váimmu birračuohpahus maid dagaha Vuoigŋa iige bustávva. Son ii oaččo rámi olbmuin, muhto Ipmilis.