Sálmmaid girji 26

Hearrá, atte munnje vuoigatvuođa,

dasgo mun lean vádjolan

láitemeahttumit.

Mun dorvvastan Hearrái

inge suoibbo.

₂Suokkar mu, Hearrá,

ja geahččal mu,

guorahala mu váimmu

ja monimuččaid.

₃Du oskkáldasvuohta lea

mu čalmmiid ovddas,

mun vádjolan du duohtavuođas.

₄Mun in čohkká behtolaččaiguin

inge searvva guoktilaččaiguin.

₅Mun vašuhan

bahádahkkiid čoagganeami,

mun in čohkká searválaga

ipmilmeahttumiiguin.

₆Hearrá, mun basan gieđaid

vigihisvuođas.

Mun váccán du áltára birra.

₇Mun lávllun rámáduslávlaga

ja muitalan buot du oavdudaguid.

₈Hearrá, mun ráhkistan du viesu,

dan báikki gos du hearvásvuohta ássá.

₉Ale rohtte mu eret suttolaččaiguin,

ale divtte mu jápmit

oktanaga sorbmejeddjiiguin.

₁₀Sii leat gergosat dahkat rihkkosiid,

sin olgeš gieđas leat dievva

dulgojumit.

₁₁Muhto mun lean vádjolan

láitemeahttumit.

Lonis mu ja leage munnje árbmugas!

₁₂Mun čuoččun nana vuođu alde.

Čoakkalmasas mun máinnun Hearrá.