Sálmmaid girji 14

Doavki dadjá váimmustis:

“Ipmil ii leat.”

Bahát ja fasttit leat sin dagut,

ii oktage daga dan mii lea buorre.

₂Hearrá geahččá almmis

olbmománáide,

son dáhttu oaidnit leago

oktage jierpmálaš,

oktage gii ohcá Ipmila.

₃Buohkat leat jorgalan sus eret,

juohkehaš lea gealbbohuvvan.

Ii leat oktage gii dahká dan mii lea buorre,

ii fal ii oktage.

₄Eaigo sii ipmir maidege,

duot vearredahkkit?

Sii njillet mu álbmoga,

borret dan dego láibbi.

Sii leat vajálduhttán Hearrá.

₅Muhto sii deaivvahallet ballui,

danin go Ipmil lea vuoigatlaččaid beali.

₆Dii veadjibehtet dahkat duššin

vártnuheami áigumušaid,

muhto Hearrá lea su dorvu.

₇Vare Israelii juo boađášii

bestojupmi Sionis!

Go Hearrá jorgala álbmogis vuorbbi,

de Jakob ávvuda, Israel illuda.