Nehemja 2

₁Gonagas Artaxerxesa guoktelogát ráđđenjagi, nisanmánus, mun ledjen oktii bidjan viinni gonagasa ovdii. Gonagas ii lean goassege ovdal oaidnán mu šlundin, ja go mun geigejin sutnje viinni, ₂de son jearai mus: “Manne dus lea nu morašlaš hápmi? It don goit leat buozus. Ii dat sáhte leat eará go váibmomoraš.” Mun suorganin sakka ₃ja dadjen gonagassii: “Ellos gonagas agálaččat! Manne mus ii livčče morašlaš hápmi, go dat gávpot gosa mu áhčit leat hávdáduvvon lea duššaduvvon ja dan poarttat boldojuvvon?” ₄Gonagas jearai: “Maid don sávat?” Dalle mun rohkadallen almmi Ipmila ₅ja dadjen gonagassii: “Jos don anát buorrin, gonagas, ja jos du bálvaleaddji lea dohkálaš du čalmmiin, de divtte mu vuolgit Judai hukset ođđasis gávpoga gosa mu áhčit leat hávdáduvvon.” ₆De gonagas gean bálddas dronnet lei čohkkámin, jearai mus: “Man guhká don jávkkat? Goas áiggut máhccat?” Mun evttohin áiggi, ja gonagas suovai mu vuolgit. ₇De mun dadjen gonagassii: “Jos gonagas atná buorrin, de bija mu mielde reivviid Eanu oarjjabeali provinssa eatnanhearráide, vai sii veahkehit mu go mun mátkkoštan Judai, ₈ja velá reivve Asafii, gonagasa vuovdefáldái, vai son addá munnje hirssaid tempelladni poartabielkkáid, gávpotmuvrra ja dan vistti várás gos mun ieš orun.” Ja gonagas attii munnje reivviid, dasgo mu Ipmila buorre giehta lei muinna.

₉Go mun de ledjen boahtán Eanu oarjjabeale provinssa eatnanhearráid lusa, de mun adden sidjiide gonagasa reivviid. Gonagas lei maiddái bidjan mu mielde riidejeddjiid ja sin oaivámuččaid. ₁₀Muhto go horonlaš Sanballat ja ammonlaš virgeolmmái Tobia dan gulaiga, de soai eaba liikon dasa ahte lei boahtán olmmái gii bivddii israellaččaid ávkki.

₁₁Go mun ledjen joavdan Jerusalemii ja ledjen leamaš doppe golbma beaivvi, ₁₂de mun vulgen ihkku olggos ja válden mielde dušše moadde olbmá. Mun in lean muitalan ovttage olbmui maid Ipmil lei ávžžuhan mu dahkat Jerusalema ávkin. Mun in váldán mielde eará ealli go dan mainna riidejin. ₁₃Guovdelaš ija mun mannen olggos Leahkepoartaráigge Guovdeádjaga ja Duvdnepoartta guvlui, geahčadin Jerusalema gaikojuvvon muvrraid ja boldojuvvon poarttaid. ₁₄Mun riidejin Ájapoartta lusa ja Gonagasláddo gáddái, muhto de ii lean šat sadji beassat ovddos dainna elliin mainna mun riidejin. ₁₅Ija áigge mun mannen leahkeráigge bajás ja dárkkistin muvrra. De mun jorggihin ja máhccen gávpogii Leahkepoartaráigge.

₁₆Oaivámuččat eai diehtán gos mun ledjen fitnan dahje maid mun ledjen dahkan, dasgo mun in lean velá almmuhan áigumušaidan juvddálaččaide, in báhpaide inge hearráide, in oaivámuččaide inge earáide geaidda dát bargu gulai. ₁₇Muhto dál mun dadjen sidjiide: “Dii oaidnibehtet ieža man heajos dilis mii leat. Jerusalem lea čievračopman ja dan poarttat leat boldojuvvon. Huksejehkot ođđasit Jerusalema muvrra, vai eat šat hiddjiduvvo!” ₁₈De mun muitalin mo Ipmila buorre giehta lei leamaš muinna ja maid gonagas lei cealkán munnje. Sii dadje: “Dál mii huksegoahtit!” Ja sii bargagohte áŋgirit dán buori barggu.

₁₉Muhto go horonlaš Sanballat, ammonlaš virgeolmmái Tobia ja arabalaš Gešem gulle dan, de sii bilkidedje ja hiddjidedje min ja dadje: “Mii dátgis lea maid dii lehpet dahkamin? Áigubehtetgo dii stuibmidit gonagasa vuostá?” ₂₀Mun vástidin sidjiide: “Almmi Ipmil diktá min lihkostuvvat. Mii, su bálvaleaddjit, áigut huksegoahtit. Muhto dis ii leat oassi iige vuoigatvuohta Jerusalemii, iige dis báze deike makkárge muitu.”