3. Mosesgirji 6

₁Hearrá sártnui Mosesii:

₂Atte Aronii ja su bártniide dán gohččuma: Dát leat boaldinoaffarmearrádusat. Boaldinoaffar galgá leat dolas áltára alde geažos ija iđida rádjái, iige áltárdolla oaččo jáddat. ₃Báhppa galgá gárvodit liidnebiktasa ja liidnebuvssaid maiguin son gokčá iežas. Son galgá čoaggit gunaid mat leat báhcán boaldinoaffaris, ja bidjat daid áltára gurrii. ₄De son galgá molsut eará biktasiid ja doalvut gunaid siidda olggobeallái buhtis báikái. ₅Dolla galgá leat álo buollimin áltára alde. Juohke iđida báhppa galgá lasihit muoraid dollii, bidjat boaldinoaffara dola ala ja boaldit dan alde searvevuođaoaffara buiddiid. ₆Dolla galgá leat buollimin geažos áigge áltára alde; dat ii oaččo jáddat. ₇Dát leat borramušoaffarmearrádusat. Arona bártnit galget buktit borramušoaffara áltára lusa Hearrá muođuid ovdii. ₈Báhppa galgá váldit čorpma dievva sevlejuvvon jáffuid ja oljju mii gullá borramušoaffarii, ja maiddái buot suovvasiid borramušoaffara alde, ja boaldit daid oasseoaffarin áltára alde, hádjan mii lea Hearrá miela mielde. ₉Aron ja su bártnit ožžot borrat dan mii báhcá oaffaris. Dan galgá láibut suvrutkeahtes láibin ja borrat bassi sajis. Sii galget borrat dan almmustusgoađi ovdašiljus. ₁₀Dan ii oaččo láibut suvrraláibin. Dat lea dat oassi maid mun lean addán sidjiide iežan dollaoaffariin. Dat lea allabassi seammá ládje go suddooaffar ja vealgeoaffar. ₁₁Juohke olbmábealle Arona nális oažžu borrat dan; dat lea buolvvas bulvii din agálaš oassi Hearrá dollaoaffariin. Buot mii dasa guoská, šaddá bassin.

₁₂Hearrá sártnui Mosesii: ₁₃Aron ja su bártnit galget dan rájes go sii vuidojuvvojit, buktit Hearrái oaffarattáldahkan beaivválaš borramušoaffarin efalogádasa sevlejuvvon jáffuid, beali das iđedis ja beali eahkedis.

₁₄ Jáffut galget sotkojuvvot bures oljjuin, goikaduvvot rávttu alde láibbážin ja buktojuvvot Hearrái borramušoaffarin, hádjan mii lea Hearrá miela mielde. ₁₅Dat Arona bártniin gii vuidojuvvo báhppan su maŋŋil, galgá ráhkadit dan. Dat oaffar lea Hearrá agálaš oassi: Visot galgá boldojuvvot. ₁₆Juohke borramušoaffar maid báhppa addá iežas ovddas, galgá leat ollesoaffar; dan ii oaččo borrat.

₁₇Hearrá sártnui Mosesii: ₁₈Cealkke Aronii ja su bártniide: Dát leat suddooaffarmearrádusat: Dan báikkis gos boaldinoaffarealli goddojuvvo, galgá maiddái suddooaffarealli goddojuvvot Hearrá muođuid ovddas. Dat lea allabassi.

₁₉Báhppa gii oaffaruššá suddooaffara, oažžu borrat dan; dan galgá borrat bassi sajis, almmustusgoađi ovdašiljus.

₂₀Buot mii guoská suddooaffarbirgui, šaddá bassin. Jos dan varra lea riškkihan biktasii, de don galggat bassat vara eret bassi sajis. ₂₁Jos biergu lea vuššojuvvon láirelihtis, de lihti galgá cuvket. Jos dat lea vuššojuvvon veaikelihtis, de lihti galgá ruvvet ja doidit čáziin. ₂₂Dušše báhppasogaid olbmát ožžot borrat dan, dat lea allabassi. ₂₃Muhto suddooaffara man varra dolvojuvvo almmustusgoahtái doaimmahit soabahusa, ii oaččo borrat, muhto dan galgá boaldit dolas.