Joel 1

₂Gullet dán, vuorrasat,

guldalehket, buot eatnama ássit:

Leago dákkár dáhpáhuvvan din áiggis

dahje dalle go din áhčit ledje eallimin?

₃Muitalehket dan mánáidasadet,

muitalehkoset sii dan iežaset mánáide

ja siigis boahtti bulvii:

₄Dan mii bázii rásselohkuin

borre rássejursit,

dan mii bázii rássejursiin

borre rásseborrit,

dan mii bázii rásseborriin

borre rássemuozut.

₅Morihehket, juhkan olbmot, ja čirrot!

Váidalehket, buot viidnejuhkkit,

viidnemuorjesáhpi maid ehpet

beassan máistit!

₆Álbmot lea boahtán mu eatnamii,

gievrras ja lohkameahttun álbmot.

Dan bánit leat dego ledjona bánit,

dan máttabánit nugo njiŋŋelas ledjonis.

₇Dat guorbadii mu viidnemuoraid

ja dojii fiikonmuoraidan,

njalddii bárkku ja gaikkui lasttaid,

nu ahte suorggit šadde vielgadin.

₈Fuoikko dego nieida

gii morašbiktasat gárvun

fuoiku nuorravuođa irggi.

₉Borramušoaffar ja juhkamušoaffar

leat jávkan Hearrá viesus.

Báhpat, Hearrá bálvaleaddjit, moraštit.

₁₀Bealddut leat duššaduvvon,

eanan morašta,

gordni lea billistuvvon,

viidni lea goikan ja olju sotnan.

₁₁Eanadoallit leat suorganan,

viidnešaddadeaddjit váidalit

nisuid ja bivggiid,

eatnama šaddu lea massašuvvan.

₁₂Viidnemuorra lea goikan,

fiikonmuorra goldnan.

Granáhtaehpelmuorra,

pálbma ja ehpelmuorra,

buot eatnama muorat leat ástan.

Illu lea gáidan olbmuin.

₁₃Gárvodehket morašbiktasiid

ja váidalehket, báhpat,

ludjet, dii geat bálvalehpet áltáris!

Mannet tempelii ja gohcet

morašbiktasat gárvun,

dii Ipmila bálvaleaddjit,

danin go borramušoaffar

ja juhkamušoaffar leat nohkan

din Ipmila viesus.

₁₄Gulahehket fásttu,

bovdejehket čoahkkái

bassi čoakkalmasa!

Čohkkejehket vuorrasiid

ja buot eatnama ássiid

Hearrá, Ipmileattet, vissui,

čurvot Hearrái.

₁₅Vuoi dan beaivvi!

Hearrá beaivi lea lahka,

dat boahtá heavahussan

maid Buotveagalaš vuolggaha.

₁₆Borramuš jávká min oaidnut,

illu ja ávvu min Ipmila viesus.

₁₇Gilvagat leat goikan eatnamii,

vuorkágárit leat billistuvvon,

láđut leat gahččan ja gordni billašuvvan.

₁₈Mo šibihat bárgot!

Šibitealut leat golgosis,

dain ii leat guohtun;

sávzaealutnai gillájit.

₁₉Hearrá, du mun čuorvvun,

dasgo dolla lea loaktán meahci guohtumiid,

dollanjuokčamat leat boaldán

buot eatnama muoraid.

₂₀Maiddái meahcispiret

gehččet du beallái ja sáđđot,

dasgo jogažat leat goikan

ja dolla lea loaktán meahci guohtumiid.