Job 4

₂Nagodatgo don gullat

mii mus lea dadjamuššan?

Gii sáhttá leat sártnokeahttá!

₃Don leat ieš bagadan eatnagiid,

leat nanosmahttán vuoimmehuvvan gieđaid.

₄Du sánit leat čuoččáldahttán

guossaleddjiid,

don leat dahkan suibbodeaddji

čippiid nanusin.

₅Muhto dál go váttisvuohta

čuohcá dutnje, de don it gierdda,

go dat ollá dutnje alccesat,

de don suorganat.

₆Iigo du ipmilballu leat du dorvu,

iigo du láitemeahttunvuohta

leat du doaivu?

₇Jurddaš datte! Goas duššai vigiheapme,

gos manne hevvui vuoigatlaš olbmot?

₈Dán mun lean oaidnán:

Geat jorgot bahávuođa ja gilvet vearrivuođa,

dat maiddái dan láddjejit.

₉Ipmila vuoiŋŋanasas sii duššet,

su moari bosanas heavaha sin.

₁₀Ledjon čeargu, beahtu harrá,

muhto spiriid bánit cuvkejuvvojit.

₁₁Sállaša haga ledjon duššá,

njiŋŋelas ledjona čivggat bieđganit.

₁₂Suollemasat bođii mu lusa sátni,

dat ollii mu bealljái dego vuollegis jietna.

₁₃Dat bođii balddihahtti

oainnáhusaid siste ihkku,

go olbmot ledje lossadit oađđimin.

₁₄Mun suorganin ja dorggiidin,

oppa mu rumaš doarggistii balus.

₁₅Biegga njávkkastii mu muođuid,

mu rupmaša guolggat ceagganedje.

₁₆De čuoččui das juoga

maid mun in dovdan,

aiddo mu čalmmiid ovddas lei hápmi.

Jaskatvuođas mun gullen jiena:

₁₇“Sáhttágo olmmoš

leat vuoigadis Ipmila vuostá,

sáhttágo olmmái leat buhtis

sivdnideaddjis čalmmiin?”

₁₈Ipmil ii luohte

oppa bálvaleddjiidasasge,

iežas eŋgeliinge

son oaidná váilevašvuođa,

₁₉velá eambbo dain

geat ásset láiráviesus,

geaid álgu lea muolddas,

geat deakčasit dego muohcu.

₂₀Ovdal go beaivi nohká, olmmoš heavvana,

son duššá agálaččat iige oktage fuomáš.

₂₁Su goahtebáddi botkejuvvo,

son jápmá iige leat ožžon viissisvuođa.