1. Mosesgirji 15

₁Dáid dáhpáhusaid maŋŋil Abramii bođii oainnáhusas dát Hearrá sátni: “Ale bala, Abram! Mun lean du galba, ja du bálká šaddá sakka stuorisin.” ₂Abram dajai: “Hearrá, mu Ipmil, maid don attášit munnje? Munhan jámán mánáheapmin, ja damaskuslaš Elieser árbe mu.” ₃Abram dajai vel: “Munnje don it leat addán máná,, ja danne mu bálvaleaddji árbe mu.” ₄Muhto sutnje bođii dát Hearrá sátni: “Ii son árbe du, muhto du árbe du iežat bárdni.” ₅Ja Hearrá doalvvui su olggos ja celkkii: “Geahča albmái ja loga násttiid, jos máhtežat daid lohkat. Ná eatnagin šaddá du nálli.” ₆Abram oskkui Hearrá lohpádussii, ja Hearrá anii su vanhurskkisin.

₇Hearrá celkkii Abramii: “Mun lean Hearrá, guhte bukten du Uras Kaldeas vai beasan addit dutnje dán eatnama opmodahkan.” ₈Muhto Abram jearai: “Hearrá, mu Ipmil, mas mun dieđán ahte oaččun dan iežan opmodahkan?” ₉Dalle Hearrá celkkii sutnje: “Viečča golmmajahkásaš guiggu, golmmajahkásaš gáicca, golmmajahkásaš viercca, turtelduvvá ja duvváčivgga.” ₁₀Abram vieččai elliid, čuohpai daid guovtti sadjái ja bijai bihtáid buohtalagaid, muhto lottiid son ii čuohppan gaskat. ₁₁Gazzalottit seivo gorudiid ala, muhto Abram ájii daid eret. ₁₂Go beaivváš lei luoitádeamen, de losses nahkárat bohte Abramii, ja hirbma ja stuorra seavdnjadas bođii su badjelii.

₁₃Hearrá celkkii Abramii: “Don fertet diehtit dán: Du nálli šaddá ássat vierisin eatnamis mii ii leat sin. Doppe sii šaddet šlávvan ja sordojuvvojit njeallječuođi jagi. ₁₄Muhto mun dubmen dan álbmoga man šlávvan sii šaddet, ja sii besset vuolgit doppe stuorra opmodat mielddiset. ₁₅Don ieš goit oaččut mannat ráfis áhčiidat lusa ja beasat hávdái buori boarisvuođa maŋŋil. ₁₆Easka du náli njealját buolva máhccá deike, dasgo amorlaččaid suddovealgi ii leat velá dievvan.”

₁₇Beaivváš luoitádii, ja šattai seavdnjat, de oidnui suovasteaddji omman ja buolli spáiddar mii jođii biergobihtáid gaskkas. ₁₈Dan beaivvi Hearrá dagai lihtu Abramiin ja celkkii: “Du nállái mun attán dán eatnama Egyptajoga rájes gitta stuorra Eufrateanu rádjái, ₁₉dán eatnama mas ásset kenlaččat, kenisselaččat ja kadmonlaččat, ₂₀hetlaččat, perisselaččat ja refalaččat, ₂₁amorlaččat, kanaanlaččat, girgašlaččat ja jebuslaččat.”