Esra 4

₁Go Juda ja Benjamina vašálaččat gulle ahte olbmot geat ledje máhccan fáŋgavuođas, ledje huksegoahtán tempela Hearrái, Israela Ipmilii, ₂de sii manne Serubbabela ja bearašoaivámuččaid ságaide ja dadje: “Diktet min hukset ovttas dinguin! Miihan bálvalit seammá Ipmila go dii, ja mii leat oaffaruššan sutnje dan rájes go Assyria gonagas Assarhaddon buvttii min deike.” ₃Muhto Serubbabel, Ješua ja buot Israela bearašoaivámuččat vástidedje: “Eat divtte, dii ehpet oaččo hukset tempela min Ipmilii ovttas minguin. Mii hukset okto tempela Hearrái, Israela Ipmilii, nugo Kyros, Persia gonagas, lea gohččon min dahkat.”

₄Dalle eatnama olbmot arvvahuhtte juvddálaččaid ja balde sin heaitit huksenbargguid. ₅Sii dulgo gonagasa ráđđeaddiid, vai sii dagašedje juvddálaččaid áigumušaid duššin. Ná lei nu guhká go Kyros, Persia gonagas, elii, gitta dassážii go Dareios šattai gonagassan.

₆Go Xerxes lei gonagassan, su ráđđenáiggi álggus, de eatnama olbmot čálle váidalusreivve Juda ja Jerusalema ássiid vuostá. ₇Ja Artaxerxesa áigge čálle Bišlam, Mitredat, Tabeel ja buot sin virgeguoimmit Artaxerxesii, Persia gonagassii. Reive čállojuvvui arameagillii ja jorgaluvvui.

₈Maiddái eatnanhearrá Rehum ja čálli Šimšai čáliiga gonagas Artaxerxesii reivve Jerusalema hárrái. ₉Dan álggus namuhuvvojedje reivve sáddejeaddjit: “Eatnanhearrá Rehum ja čálli Šimšai ja sudno virgeguoimmit, duopmárat, sáttaolbmot, hálddahusolbmát, ereklaččat, babylonialaččat ja Susa elamlaččat ₁₀ja buot eará álbmogat maid stuorra ja beakkán Asenappar lei sirdán ja bidjan ássat Samaria gávpogii ja muđui Eanu oarjjabeale provinsii.” ₁₁Dát lea geardduhus dan reivves maid sii čálle sutnje: “Gonagas Artaxerxesii du bálvaleddjiin, Eanu oarjjabeale provinssa olbmáin. ₁₂Mii almmuhit gonagassii ahte juvddálaččat geat leat vuolgán du luhtte, leat boahtán deike min lusa Jerusalemii. Sii leat huksemin ođđasis dán stuibmideaddji ja bahás gávpoga, sii divodit dan muvrraid ja buoridit dan vuođu. ₁₃Danin mii almmuhit gonagassii ahte jos duot gávpot huksejuvvo ođđasis ja dan muvrrat divvojuvvojit, de dalle dan olbmot eai šat mávsse vearuid, divadiid eaige tuolu, ja maŋážassii dat šaddá riikii vahágin. ₁₄Go mii leat gonagasa bálvaleaddjit, de mii eat dáhto dušše geahččat go gonagas fudnojuvvo. Dan dihte mii almmuhit dán gonagassii, ₁₅vai don dutkkahivččet áhčiidat muitalusaid girjjiid. Dain boahtá ovdan ahte dat lea stuibmideaddji gávpot mii lea leamaš vahágin riikii ja provinssaide ja man ássit leat stuibmidan juo dolin. Dan dihte duot gávpot leage duššaduvvon. ₁₆Mii almmuhit gonagassii ahte jos duot gávpot huksejuvvo ođđasis ja dan muvrrat divvojuvvojit, de dalle don massát Eanu oarjjabeale provinssa.”

₁₇Gonagas sáddii dán vástádusa: “Eatnanhearrá Rehumii, čálli Šimšajii ja sudno virgeguimmiide geat ásset Samarias ja muđui Eanu oarjjabeale provinssas. Ráfi didjiide! ₁₈Mun lean jorgalahttán ja logahan alccesan reivve maid dii sáddiidet munnje. ₁₉Mun bidjen olbmuid guorahallat ášši, ja gávnnahuvvui ahte dološ áiggi rájes dát gávpot lea čuožžilan gonagasaid vuostá, ja ahte doppe leat leamaš stuimmit ja ráfehisvuođat. ₂₀Jerusalemis leat leamaš fámolaš gonagasat geat leat ráđđen oppa Eanu oarjjabeale guovllu, ja sidjiide leat máksojuvvon vearut, divadat ja tuollut. ₂₁Gohččot dál dáid olbmáid gaskkalduhttit barggu. Gávpot ii oaččo huksejuvvot ovdal go mun gohčun. ₂₂Gehččet bearrái ahte ehpet bargga fuollameahttumit dán áššis, vai gonagasat eai gillá vel stuorit vahága.”

₂₃Dalán go gonagas Artaxerxesa reivve geardduhus lei lohkkojuvvon Rehumii, čálli Šimšajii ja sudno virgeguimmiide, de sii vulge hoahpus Jerusalemii juvddálaččaid lusa ja bággejedje veahkaválddiin sin heaitit barggu.

₂₄Dalle Ipmila tempela huksenbargu Jerusalemis gaskkalduvai, ja dat lei bisánan gitta Persia gonagasa Dareiosa nuppi ráđđenjagi rádjái.