2. Muitalusaid girji 29

₁Hiskia lei guoktelogiviđajahkásaš go šattai gonagassan, ja son ráđđii Jerusalemis guoktelogiovcci jagi. Su eadni lei Abia, Sakarja nieida. ₂Hiskia dagai dan mii lei riekta Hearrá čalmmiin, aiddo nugo su áhčči David lei dahkan. ₃Vuosttaš ráđđenjagis vuosttaš mánus Hiskia rabai ja divui Hearrá tempela uvssaid. ₄Son rávkkai báhpaid ja levilaččaid nuorttabeale šilljui ₅ja dajai sidjiide: “Gullet maid mun dajan, levilaččat! Basuhehket iežadet ja basuhehket Hearrá, áhčiideattet Ipmila, tempela, ja buktet doppe eret visot mii lea buhtismeahttun. ₆Min áhčit leat leamaš oskkáldasmeahttumat ja leat dahkan dan mii lea bahá Hearrá, min Ipmila, čalmmiin. Sii leat hilgon su eaige leat beroštan Hearrá ássansajis, muhto leat jorgalan dasa sealggi. ₇Sii leat maid dahppan ovdahálla uvssaid ja jáddadan lámppáid, eai leat boaldán suovvasiid eaige oaffaruššan tempelis boaldinoaffariid Israela Ipmilii. ₈Dan dihte Hearrá moarri lea deaividan Juda ja Jerusalema. Son lea dahkan daid hiddjádussan ja bilkun, nugo dii oaidnibehtet iežadet čalmmiiguin. ₉Min áhčit leat gahččan miehkkái ja min bártnit, nieiddat ja áhkát leat dolvojuvvon fáŋgavuhtii. ₁₀Dál mun dáhtun dahkat lihtu Hearráin, Israela Ipmiliin, vai son jorgalivččii buolli moaris eret min badjelis. ₁₁Bártnážiiddán, allet ájahala, danin go Hearrá lea válljen din iežas bálvaleaddjin, bálvalit su ja boaldit suovvasiid.”

₁₂Dalle loaiddastedje ovdan dát levilaččat: Mahat, Amasaja bárdni, ja Joel, Asarja bárdni, Kehata sogas; Kiš, Abdi bárdni, ja Asarja, Jehallelela bárdni, Merari sogas; Joah, Simma bárdni, ja Eden, Joaha bárdni, Geršona sogas; ₁₃Šimri ja Jeiel Elisafana sogas ja Sakarja ja Mattanja Asafa sogas; ₁₄Jehiel ja Šimi Hemana sogas ja Šemaja ja Ussiel Jedutuna sogas. ₁₅Sii rávke čoahkkái vieljaideaset, basuhedje iežaset ja manne buhtistit Hearrá tempela, nugo gonagas lei sin gohččon Hearrá sáni mielde. ₁₆De báhpat manne Hearrá viesu sisa buhtistit dan. Buot buhtismeahttuma maid sii gávdne Hearrá tempelis, sii dolvo ovdašilljui. Doppe levilaččat válde dan ja dolvo gávpoga olggobeallái Kedronleahkái. ₁₇Buhtisteapmi álggahuvvui vuosttaš mánu vuosttaš beaivvi, ja mánu gávccát beaivvi sii ledje beassan tempela ovdahálla rádjái. Tempela buhtisteapmái golai gávcci beaivvi, ja vuosttaš mánu guhttanuppelogát beaivvi sii ledje geargan.

₁₈De sii manne gonagas Hiskia lusa ja dadje: “Mii leat buhtistan oppa Hearrá tempela, boaldinoaffaráltára ja buot dan biergasiid ja oaffarláibebeavddi ja buot dan biergasiid. ₁₉Mii leat divodan ja basuhan buot biergasiid maid oskkáldasmeahttun gonagas Ahas hilggui ráđđenáiggistis. Dat leat dál Hearrá áltára ovddas.”

₂₀Árrat iđedis gonagas Hiskia rávkkai čoahkkái gávpoga oaivámuččaid ja manai singuin tempelii. ₂₁Sii bukte čieža vuovssá, čieža viercca, čieža lábbá ja čieža bohká suddooaffarin riikka, tempela ja Juda álbmoga ovddas. Gonagas gohčui báhpaid, Arona bártniid, oaffaruššat daid Hearrá áltára alde. ₂₂Báhpat njuvve vuovssáid, válde vara ja riškkuhedje dan áltára ala, de sii njuvve vierccaid ja riškkuhedje vara áltára ala ja maŋimuš sii njuvve lábbáid ja riškkuhedje vara áltára ala. ₂₃Dasto sii bukte suddooaffarbohkáid gonagasa ja searvegotti ovdii, ja buohkat geigejedje gieđaid daid ala. ₂₄Báhpat njuvve bohkáid ja oaffarušše daid vara áltára alde suddooaffarin ja nu doaimmahedje soabahusa oppa Israelii. Gonagas lei oainnat gohččon oaffaruššat boaldinoaffara ja suddooaffara oppa álbmoga ovddas.

₂₅Gonagas gohčui levilaččaid čuoččastit Hearrá vissui symbálat, hárppat ja lyrat gieđas, nugo David, gonagasa oaidni Gad ja profehta Natan ledje gohččon; gohččun bođii Hearrás su profehtaid bokte. ₂₆Levilaččat čužžo sajisteaset ja sis ledje gieđas Davida duddjohan čuojanasat, ja báhpain ledje gieđas trompehtat. ₂₇Hiskia gohčui oaffaruššat boaldinoaffara áltára alde. Seammás go oaffaruššan álggii, de lávlut lávlugohte Hearrái ja trompehtat ja čuojanasat maid Israela gonagas David lei duddjohan, čuodjagohte. ₂₈Oppa searvegoddi luoitádii rohkadallat, ja lávlut lávlo ja trompehtat čudje nu guhká go oaffaruššan bisttii. ₂₉Go oaffaruššan lei nohkan, de gonagas ja dat geat ledje suinna, luoitádedje rohkadallat. ₃₀Gonagas Hiskia ja oaivámuččat gohččo levilaččaid máidnut Hearrá Davida ja oaidni Asafa sániiguin, ja sii máidno Hearrá illudemiin ja luoitádedje dasto rohkadallat.

₃₁Hiskia sárdnugođii ja dajai: “Dii lehpet buktán valjis attáldagaid Hearrái. Loaiddastehket dál ovdan ja buktet njuovvanoaffariiddádet ja giittusoaffariiddádet Hearrá tempelii.” Ja searvegoddi buvttii njuovvanoaffariid ja giittusoaffariid, ja máŋgasat bukte eaktodáhtolaš boaldinoaffariid. ₃₂Searvegoddi buvttii boaldinoaffarin čiežalogi vuovssá, čuođi viercca ja guoktelogi lábbá. Buot dát ledje boaldinoaffarin Hearrái. ₃₃Bassi attáldahkan buktojuvvojedje guhttačuođi vuovssá ja golbmaduhát sávzza. ₃₄Muhto báhpat ledje beare hárvát njuovvat buot oaffarelliid, ja dan dihte sin vieljat levilaččat veahkehedje sin dassážii go bargu lei dahkkojuvvon ja dassážii go eará báhpat ledje basuhan iežaset; levilaččat oainnat ledje leamaš miehtáseappot basuhit iežaset go báhpat. ₃₅Daid ollu boaldinoaffariid lassin bohte maiddái searvevuođaoaffariid buoidebihtát ja juhkamušoaffarat mat gulle boaldinoaffariidda.

Nu Hearrá tempela bálvalus ásahuvvui ođđasis. ₃₆Buot dáhpáhuvai fáhkkestaga, ja Hiskia ja oppa álbmot illudedje das maid Hearrá lei addán sidjiide.