Matteus 18

₁Forgâ tastmaŋa máttááttâspárnááh pottii Jeesus kuuvl já koijâdii: »Kii lii stuárráámus oolmij väldikoddeest?»

₂Talle Jeesus kočoi jieijâs kuuvl párnáá, piejâi suu sii kooskân ₃já eeđâi:

»Tuođâi, jis tij eppeđ jorgeet Immeel piälán já šoodâ párnái nálásâžžân, te tij eppeđ peesâ oolmij väldikoodán. ₄Tot, kote jieijâs vyeleed taam párnáá nálásâžžân, lii stuárráámus oolmij väldikoddeest. ₅Já kote muu noomâst váldá jieijâs kuuvl oovtâgin tággáár párnáá, tot váldá jieijâs kuuvl muu. ₆Mut jis kiinii čájádit oovtâgin täin ucemusâin, kiäh oskoh munjin, te sunjin ličij pyereeb, et suu čiäpáttân heŋgâstuuččij millokeđgi já sun vuájuttuuččij meerâ kieŋŋâlvuotân.

₇»Vuoi taan maailm já ton viettâlâsâid! Viettâlâsah kalgeh kale puáttiđ, mut vuoi ton ulmuu, kiän peht toh puátih! ₈Jis kiettâd teikâ juálgád viettâl tuu, te časke tom rasta já leggist meddâl. Liihân pyereeb, et tun kietâpeelijn teikâ jyelgipeelijn peesah siisâ elimân, ko tot et tun anah kuohtuid kieđâid já juolgijd já leggistuuh nuvâhánnáá tuulân. ₉Já jis čaalmad viettâl tuu, te kiškeet tom luovâs já leggist meddâl. Liihân pyereeb, et tun čalmepeelijn peesah siisâ elimân ko et kuohtui čolmijguin leggistuuh helvit tuulân.

₁₀»Keččâđ, et eppeđ háálbáš oovtâgin täin ucemuin. Tastko mun eeđâm tijjân: sii eŋgâleh almeest kejâdeh ovttuu muu almalii Eeji muáđuid. [ ₁₁Eidu tom, mii lii lappum, Ulmuu Alge lii puáttám uuccâđ já piäluštiđ.]

₁₂»Maid arvâlvetteđ: jis kiästnii láá čyeti savzâd já ohtâ tain čááijád, te ij-uv sun kyeđe taid ohcelovoovce vaarij oolâ já vyelgi uuccâđ tom čájádâm saavzâ? ₁₃Já jis sun tom kávná – tuođâi: sun illood tast eenâb ko toin ohcelovoovcest, moh iä lamaš čájádâm. ₁₄Siämmáánáál tii almalâš Eeči ij haalijd, et ohtâgin täin ucemuin šodâččij huukán.

₁₅»Jis viljâd suddod, te savâstâl suin kuávttáá koskân. Jis sun kulá tuu, te lah vuáittám suu maassâd. ₁₆Mut jis sun ij kuulâ tuu, vääldi miäldásâd oovtâ teikâ kyehti iärrás, tastko ’jyehi ääši kalga nonniđ kyevti teikâ kuulmâ tuođâšteijee saanijn.’ ₁₇Jis sun ij kuulâ siigin, te almoot servikoodán. Já jis sun ij tottâl servikodegin, te sun liävus tunjin tego päähin teikâ publikaan. ₁₈Tuođâi: puoh, maid tij čonâvetteđ eennâm alne, lii čonnum almeest, já puoh, maid tij čuávdivetteđ eennâm alne, lii meiddei oolmijn čovdum.

₁₉»Mun eeđâm tijjân: maid aašijd ihenis kyevtis tist sooppâv oovtâst já eennâm alne ruhâdâllâv, te tom suoi uážžuv muu Eejist, kote lii oolmijn. ₂₀Tastko kost kyevtis teikâ kuulmâš láá čokkânâm muu noomâst, tobbeen mun lam sii kooskâst.»

₂₁Talle Piättár poođij Jeesus kuuvl já eeđâi: »Hiärrá, jis viljâm ain uđđâsist taha puástud muu vuástá, te kollii mun ferttiim adeliđ sunjin addâgâs? Aaibâs-uv čiččii?»

₂₂»Ij čiččii, mut čiččâmlovčiččâm kerdid», Jeesus västidij.

₂₃»Oolmij väldikodde lii tego kunâgâs, kote vaađâi palvâleijein čielgiittâs ruuđâin. ₂₄Ko sun täärhistškuođij tom, te suu oovdân puohtui palvâleijee, kote lâi sunjin velgus lovetuhháát talenttid. ₂₅Almast ij lamaš moin mäksiđ, já nuuvt kunâgâs meridij, et suu, suu káálgu já párnáid já suu ubâ omâduv koolgâi vyebdiđ já mäksiđ veelgi. ₂₆Talle palvâleijee leggistâđâi enâmân suu oovdân já áánui: ’Liččih kierdâvâš! Mun máávsám tunjin kale puoh.’ ₂₇Kunâgâs šallišij palvâleijes, já sun luoštij almaa já adelij veelgi addâgâs.

₂₈»Mut ko palvâleijee moonâi olgos, te sun teeivâi nube palvâleijee, kote lâi sunjin velgus čyeti denarid. Sun vaaldij almaa kiddâ, kähistij suu čuddust já eeđâi: ’Määvsi, maid lah velgus!’ ₂₉Almai leggistâđâi enâmân já eeđâi: ’Liččih kierdâvâš! Kale mun máávsám tunjin.’ ₃₀Mut nubbe ij miettâm toos. Sun moonâi já toimâttij pargoskipáris faŋgâlân, tassaažân ko taat mávsáččij veelgis.

₃₁»Eres palvâleijeeh oinii, mii tábáhtui, já sij šoddii nievris mielân. Sij monnii kunâgâs kuuvl já muštâlii sunjin puoh. ₃₂Talle kunâgâs kočottij palvâleijee jieijâs kuuvl já eeđâi: ’Tun kiälbuttem! Mun adelim tunjin addâgâs ubâ veelgi, ko tun tom must tattuh. ₃₃Jieh-uv tun-uv liččii kolgâm ärmittiđ pargoskipárâd, tego mun ärmittim tuu?’ ₃₄Vajestis kunâgâs piejâi palvâleijes äŋgiris faŋgâvuotân, tassaažân ko taat mávsáččij ubâ veelgi.

₃₅»Näävt taha muu almalâš Eeči-uv tijjân, jis tij jieškote-uv eppeđ ubâ vááimust addel viljâsâd addâgâs.»