Matteus 16

₁Jeesus kuuvl pottii fariseuseh já saddukeuseh, kiäh halijdii keččâlâddâđ suu já tattuu suu čäittiđ meerhâ oolmijn. ₂Mut Jeesus västidij sijjân: »Ehidist tij etâvetteđ: ’Šiev šooŋâ taha, ko alme ruáđđid’, ₃já iđedist: ’Nievrisšooŋâ taha, tastko alme ruškoot sevŋâdin.’ Alme tij kal mättivetteđ luuhâđ, mut eppeđ aaigij meerhâid. ₄Taat paas já oskottes suhâpuolvâ váátá meerhâ, mut áinoo merkkâ, mii toos adeluvvoo, lii Joona merkkâ.» Sun kuođij sii toos já vuolgij meddâl.

₅Sij pottii nubebel jäävri, mut máttááttâspárnááh lijjii vájáldittâm väldiđ leeibi miäldásis. ₆Talle Jeesus eeđâi sijjân: Váruttiđ fariseusij já saddukeusij suvre.» ₇Mut sij tuše sárnudii koskânis: »Mist vájáldui leibi.» ₈Jeesus huámášij tom já eeđâi sijjân: »Tij uccáá oskovááh! Tij sárnuvetteđ tuše tast, et tist ij lah leibi. ₉Eppeđ-uv tij valagin ibbeerd? Eppeđ-uv tij mušte taid vittâ leeibi, moh lijjii tuárvi viiđâtuhháttân? Já kalle veddilite tij nuurâid? ₁₀Teikâ toh čiččâm leibid, moh lijjii tuárvi neeljituhháttân? Já kalle veddilite tij nuurâid? ₁₁Maht tij eppeđ ibbeerd, et jiem mun sárnum tijjân leeibijn? Váruttiđ fariseusij já saddukeusij suvreest.» ₁₂Talle sij iberdii, et sun ij koččom váruttiđ leibitääigi suvreest, mut fariseusij já saddukeusij máttááttâsâst.

₁₃Ko Jeesus lâi puáttám Filippos Kesarea kuávlun, te sun koijâdij jieijâs máttááttâspárnáin: »Kii Ulmuu Alge lii? Maid ulmuuh sust eteh?» ₁₄Sij västidii: »Nubij mielâst sun lii Juhánâs Kästee, nubij mielâst Elia, motomij mielâst Jeremia teikâ mottoom eres proofeet.» ₁₅»Nabai tij?» koijâdij Jeesus. »Kii mun tii mielâst lam?» ₁₆Simmoon Piättár västidij: »Tun lah Messias, ellee Immeel alge.»

₁₇Jeesus eeđâi sunjin: »Avdâgâs lah tun, Simmoon, Joona alge. Taam ij lah tunjin almottâm uážži ige vorrâ, mut muu Eeči, kote lii oolmijn. ₁₈Já mun eeđâm tunjin: Tun lah Piättár, já taan källee oolâ mun rááhtám jieččân kirho. Tom iä helvit poortah vyeiti. ₁₉Mun adelâm tunjin oolmij väldikode čovduid. Maid tun čoonah eennâm alne, tot lii čonnum oolmijn, já maid tun čuávdáh eennâm alne, tot lii meiddei oolmijn čovdum.» ₂₀Talle sun kieldij máttááttâspárnáidis sárnumist kiässán, et sun lâi Messias.

₂₁Taan ääigi rääjist Jeesus sárnuškuođij máttááttâspárnáidis, et sun kalga moonnâđ Jerusalemân já kierdâđ ennuv aalmug puárásumosij, ollâpaapâi já laavâmáttáátteijei kieđâin. Sun kudduuččij, mut kuálmád peeivi sun pajaničij jämimist.

₂₂Piättár vaaldij Jeesus sierâ já nuttâlškuođij suu: »Immeel varjâlus tuu! Tot ij uážu tábáhtuđ tunjin, Hiärrá!» ₂₃Mut sun jorgettij meddâl já eeđâi Piätárân: »Moonâ meddâl muu oovdâst, Sáttán! Tun halijdah et mun jurâlâm. Tuu jurduuh iä lah Imelist, pic ulmust!»

₂₄Jeesus eeđâi máttááttâspárnáidis: »Jis kiinii táttu jotteeđ muu maajeeld, sun kiäldus jieijâs, vááldus riistâs já čuávus muu. ₂₅Tastko tot, kote táttu piäluštiđ elimis, láppá tom, mut kote elimis muu tiet láppá, kávná tom. ₂₆Mii aavhijd ulmui lii, jis sun vuáittá olssis ubâ maailm mut moonât siälus? Moin olmooš puáhtá uástiđ siälus maassâd? ₂₇Ulmuu Alge šadda puáttiđ Eejis kirkkâdvuođâst eŋgâlijdiskuin, já talle sun máksá juáhážân taan tavoi mield. ₂₈Tuođâi: taan juávhust láá motomeh, kiäh iä kuáhtáá jäämmim ovdilgo sij uáinih Ulmuu Alge puátimin väldikoddees kunâgâssân.»