Jeesus šoddâm já pärnivuotâ
Jeesus suhâluvâttâllâm
1Jeesus Kristus, Taavvid alge já Áábráhâm alge, suhâluvâttâllâm:
2Áábráhâmân šoodâi Issáák, Issáákân Jáákkup, Jáákkupân Juuda já taan viiljah, 3Juudan Peres já Serah, kiäi enni lâi Tamar, Peresân Hesron, Hesronân Ram, 4Ramân Amminadab, Amminadabân Nahson, Nahsonân Salma, 5Salman Boas, kiän enni lâi Rahab, Boasân Obed, kiän enni lâi Ruut, Obedân Iisai 6já Iisaiân Taavvid, kunâgâs.
Taavvidân šoodâi Salomo, kiän enni lâi Uria kálgu, 7Salomon Rehabeam, Rehabeamân Abia, Abian Asaf, 8Asafân Josafat, Josafatân Joram, Joramân Ussia, 9Ussian Jotam, Jotamân Ahas, Ahasân Hiskia, 10Hiskian Manasse, Manassen Amos, Amosân Josia 11já Josian Jekonja já taan viiljah Babylon pággusirdem ääigi.
12Aalmug pággusirdem maŋa Jekonjan šoodâi Sealtiel, Sealtielân Serubbabel, 13Serubbabelân Abihud, Abihudân Eljakim, Eljakimân Asur, 14Asurân Sadok, Sadokân Jakin, Jakinân Elihud, 15Elihudân Eleasar, Eleasarân Mattan, Mattanân Jáákkup 16já Jáákkupân Joovsep, Máárjá almai. Máárjá šoddâdij Jeesus, kiäm kočodeh Kristusân.
17Suhâpuolvah láá näävt Áábráhâmist Taavvidân ohtsis neljinubáloh, Taavvidist Babylonân sirdemân neljinubáloh, já tast vist neljinubáloh kiddâ Kristus räi.
Jeesus šoddâm
18Jeesus Kristus šoddâm tábáhtui näävt.
Máárjá, Jeesus enni, lâi kihlum Joovsepân. Ovdilgo sunnuu litto lâi nanosmittum, huámášui, et Máárjá, Pase Jiegâ vaiguttâsâst, lâi párnáá vuástá. 19Joovsep lâi laavâ kunnijâttee almai ige halijdâm hepâšuttiđ myersses julgâlávt. Sun ááigui syele rikkođ näimisopâmâš.
20Ko Joovsep jurdâččij taam, te sunjin almostui iho naharist Hiärá eŋgâl, kote eeđâi: »Joovsep, Taavvid alge, ele poolâ Máárjá väldimist kálgun olssâd. Tot, mii sust lii šohânâm, lii vuálgám Pase Jiegâst. 21Sun šoddâd alge, já tun koolgah adeliđ aalgan noomâ Jeesus, tastko sun piästá almugis ton suddoin.»
22Puoh taat tábáhtui, vâi olášuuččij tot, maid Hiärrá lii proofeet njalmijn almottâm:
23– Keejâ, nieidâ šadda párnáá vuástá já šoddâd alge,
já sunjin adeluvvoo nommâ Immanuel –
tot meerhâš: Immeel lii miiguin.
24Ko Joovsep koccái nahhaarstis, sun poorgâi tego Hiärá eŋgâl lâi koččom já vaaldij Máárjá olssis kálgun. 25Sun ij kuittâg kuoskâm kálgusis ovdilgo taat lâi šoddâdâm alge. Joovsep adelij aalgan noomâ Jeesus.
