Luukas 3

_1-2Immeel sääni poođij Juhánâsân, Sakarias aalgan, kote iälustij tuárispel kuávlust. Tot tábáhtui kiäisár Tiberius vitnubálovváád haldâšemive. Pontius Pilatus lâi Juudea eennâmhiärrán. Niäljádâshaldâšeijen haldâšij Galileast Herodes; Itureast já Trakonitis enâmist haldâšij suu viljâ Filippos, já Abilenest haldâšij Lysanias. Ollâpappân vuod láin Hannas já Kaifas. ₃Jeđe Juhánâs vuolgij joton já juuđij jyehi saajeest Jordan kuávlust já särnidij já avžui ulmuid jorgettiđ Immeel piälán já väldiđ kaastâ, nuuvt et sudoh adeluuččii sijjân addâgâs. ₄Tábáhtui tego lii čallum proofeet Jesaja kirjeest:

₇Ko olmoošjuávhuh pottii kästim várás, te Juhánâs eeđâi sijjân: »Tij kyevdišohânâsah! Kii tijjân lii ettâm, et tij pyehtivetteđ velttiđ puáttee vaje? ₈Šoddâdiđ heđâlmijd, kost tii jorgettem Immeel piälán uáinoo! Elleđ riemâ jurdâččiđ: ’Lephân mij Áábráhâm párnááh.’ Mun eeđâm tijjân: Immeel pasta cuvnâđ Áábráhâmân párnáid veik täin keeđgijn. ₉Tääl lii ákšu pieijum muorâmaddui. Jyehi muorâ, mii ij šoddâd šiev heeđâlm, njiäidoo já leggistuvvoo tuulân.»

₁₀Ulmuuh koijâdii sust: »Maid mij talle kolgâp porgâđ?» ₁₁Sun västidij sijjân: »Tot, kiäst láá kyehti pääiđi, adelus nube toos, kiäst ij lah ohtâgin. Kiäst lii purrâmâš, tavos siämmáánáál.» ₁₂Meiddei motomeh publikaaneh pottii kaastân, já sij koijâdii Juhánâsâst: »Máttáátteijee, maid mij kolgâp porgâđ?» ₁₃Sun eeđâi sijjân: »Elleđ vaađâ eenâb ko lii asâttum.» ₁₄Suáldátteh-uv koijâdii sust: »Nabai mij, maid mij kolgâp porgâđ?» Sun eeđâi sijjân: »Elleđ rieveed elleđge čovgii kiästen, pic tuuttâđ pálkkásâd.»

₁₅Ulmuuh lijjii vuordâšmin. Puohah hundâruššii, lâi-uv Juhánâs máhđulávt Messias. ₁₆Sij ožžuu Juhánâsâst vástádâs: »Mun káástám tii čassijn, mut must kievrâb lii puátimin. Mun jiem tuhhii čuávdiđ ubâ suu kamuvvuodduidgin. Sun kástá tii Pase Jieggáin já tuuláin. ₁₇Sust lii kieđâstis leggistemniävvu, já toin sun putteest riihâšiljoos valje. Jiivijd sun norá áittásis, mut rumânijd sun puáldá časkâmettum tuulâst.»

₁₈Maaŋgâ eres-uv náál Juhánâs avžui ulmuid, ko sun kulluuttij sijjân evangelium. ₁₉Mut ko sun nuttâlij niäljádâshaldâšeijee Herodes taan viiljâ káálgu Herodias tiet já mooitij suu meiddei eres paas tavoin, ₂₀Herodes poorgâi vala tom-uv, et toimâttij Juhánâs kiddâgâsân.

₂₁Ennuv ulmuuh lijjii kastum. Ko meiddei Jeesus lâi kastum, te almeh lekkâsii suu ruhâdâldijn ₂₂já Pase Jieggâ luáštádâdâi suu oolâ, tuvváá hámásâžžân. Já oolmijn kullui jienâ: »Tun lah muu rähis Alge, tunjin mun lam mielâstum.»

₂₃Jeesus lâi nyevt kulmâlovihásâš ko sun algâttij pargoos. Sun lâi – näävt jurdâččui – Joovsep alge. Joovsep eeči lâi Eeli, ₂₄taan eeči Mattat, taan Leevi, taan Melki, taan Jannai, taan Joovsep, ₂₅taan Mattitja, taan Amos, taan Nahum, taan Hesli, taan Naggai, ₂₆taan Mahat, taan Mattitja, taan Simei, taan Josek, taan Joda, ₂₇taan Johanan, taan Resa, taan Serubbabel, taan Sealtiel, taan Ner, ₂₈taan Melki, taan Addi, taan Kosam, taan Elmadam, taan Er, ₂₉taan Joosua, taan Elieser, taan Jorim, taan Mattat, taan Leevi, ₃₀taan Simeon, taan Juuda, taan Joovsep, taan Jonam, taan Eljakim, ₃₁taan Melea, taan Menna, taan Mattata, taan Natan, taan Taavvid ₃₂taan Iisai, taan Obed, taan Boas, taan Salma, taan Nahson, ₃₃taan Amminadab, taan Admin, taan Arni, taan Hesron, taan Peres, taan Juuda, ₃₄taan Jáákkup, taan Issáák, taan Áábráhâm, taan Terah, taan Nahor, ₃₅taan Serug, taan Reu, taan Peleg, taan Eber, taan Salma, ₃₆taan Kenan, taan Arpaksad, taan Seem, taan Nooa, taan Lemek, ₃₇taan Metuselah, taan Henok, taan Jered, taan Mahalalel, taan Kenan, ₃₈taan Enos, taan Set, taan Ááddám, taan Immeel.