Luukas 20

₁Ko Jeesus mottoom peeivi oppeet lâi máttáátmin ulmuid temppâlist já kulluuttij šiev saavâ, te pottii ollâpaapah já laavâmáttáátteijeeh oovtâst puárásumosijguin suu kuuvl ₂já ettii sunjin: »Muštâl mijjân, moin valdijn tun poorgah tágárijd. Kii lii adelâm tunjin taas vääldi?» ₃Jeesus västidij sijjân: »Mun meiddei koijâdâm tist. Ettâđ munjin, ₄lâi-uv Johannes kaastâ vuálgus almeest vâi ulmuin.» ₅Sij ráđádellii koskânis: »Jis mij ettâp: ’Almeest’, sun iätá: ’Mondiet tij talle eppeđ oskom sunjin?’ ₆Jis mij vuod ettâp: ’Ulmuin’, te aalmug keđgee mii, tondiet ko tot osko nanosávt, et Juhánâs lâi proofeet.» ₇Talle sij västidii, et sij iä tiättám tom. ₈Talle Jeesus eeđâi: »Jiem mungin talle eeđâ tijjân, moin valdijn mun taam puoh poorgâm.»

₉Jeesus sáárnui oppeet aalmugân já muštâlij taam viärdádâs:

»Almai ištâdij viinikäärdi, laiguuttij tom viljâleijeid já varrij kuhes ááigán meddâl enâmist.

₁₀»Ko äigi poođij, sun vuolgâttij palvâleijee viinikäärdi viljâleijei kuuvl, vâi taah adeliččii sunjin uási šaddoost. Mut vijâleijeeh caimii palvâleijee já vuolgâttii suu meddâl kuárus kieđâi. ₁₁Talle omâsteijee vuolgâttij nube palvâleijeegis. Viljâleijeeh caimii suu-uv, hepâšuttii suu já vuolgâttii meddâl kuárus kieđâi. ₁₂Almai vuolgâttij vala kuálmád palvâleijee, mut suu-uv sij háváduttii já vuájálittii kiäinusis.

₁₃»Maid mun poorgâm? smietâi viinikäärdi omâsteijee. ’Mun vuolgâttâm toho rähis algaam. Sunjin sij iä vissâ tuostâ kuoskâđ.’ ₁₄Mut ko láiguliih oinii alge, sij smietâdii oovtâst: ’Sun lii árbálâš. Mij koddep suu, te uážžup suu äärbi.’ ₁₅Sij viešidii alge olgos viinikäärdist já kuddii suu. – Maid viinikäärdi omâsteijee tääl parga sijjân? ₁₆Sun puátá já koddá taid viljâleijeid já addel viinikäärdis iärásáid.»

»Ij, ij!» páárgui aalmug. ₁₇Jeesus keejâi ulmuid já eeđâi: »Maid talle uáivild taat čallui saje:

₁₉Laavâmáttáátteijei já ollâpaapâi mielâ toovâi väldiđ Jeesus kiddâ siämmást, mut sij pollii aalmugist. Sij iberdii, et Jeesus lâi viärdádâsâstis sárnum sist.

₂₀Laavâmáttáátteijeeh já ollâpaapah onnii Jeesus čalmeest já vuolgâttii suu kuuvl syelivákšojeijeid, kiäh tohâluddii hurskesin. Sij keččâlii fattiđ suu sanijdis vuáđuld kiddâ, vâi pesâččii luovâttiđ suu virgevääldi haaldun, eennâmhiärá tuommimnáál. ₂₁Almaah ettii sunjin: »Máttáátteijee, mij tiettip, et tun sáárnuh já máttááttah olmânáál. Tun jieh iäruttâl ulmuid koskânis, pic máttááttah Immeel kiäinu tuotâvuođâ mield. ₂₂Lii-uv olmânáál, et mij mäksip kiäisárân viäru, vâi ij?» ₂₃Jeesus huámášij sii juonâ já eeđâi: ₂₄»Čäittiđ munjin deenaar ruuđâ. Kiän kove já nommâ tast lii?» »Kiäisár», sij västidii. ₂₅Talle Jeesus eeđâi sijjân: »Nuuvtpa adeliđ kiäisárân, mii kiäisárân kulá já Imelân, mii Imelân kulá.» ₂₆Nuuvtpa sij iä aalmug kulâdijn fattim Jeesus kiddâ suu sárnumijn. Jeesus vástádâs hiämáskitij sii, já sij jávuttuvvii.

₂₇Jeesus kuuvl pottii talle motomeh saddukeuseh, toh, kiäh kieldih pajaspajanem. Sij koijâdii sust: ₂₈»Máttáátteijee, Mooses lii asâttâm näävt: ’Jis almaa viljâ jáámá já täst páácá kálgu mut ij páárnáš, almai kalga väldiđ viiljâs káálgu já adeliđ maajeeldpuáttee viljâsis.’ ₂₉Lijjii čiččâm viljâžid. Puárrásumos sist vaaldij káálgu já jaamij pärnitteemmin. ₃₀Talle nubbe vaaldij suu, ₃₁tastmaŋa kuálmád, já vuárustis puoh čiččâmâs. Puohah sij jammii kyeđehánnáá maajeeldsis párnáid. ₃₂Loopâst nissoon-uv jaamij. ₃₃Kiän kálgu taat nissoon kalga leđe pajaspaijaanmist? Sunhân lii lamaš puohâi čiččâmâs kálgun.»

₃₄Jeesus västidij sijjân: »Taan maailmist almaah väldiđ káálgu já nisoneh maneh kálgun. ₃₅Mut puáttee maailmist toh, kiäh láá keččum pajaspajanem árvusâžžân, iä innig vääldi káálgu iäge moonâ kálgun. ₃₆Sij iä innig pyevti jäämmiđ, tastko sij láá eŋgâlij nálásiih. Sij láá Immeel párnááh, pajaspaijaanmist uásáliih. ₃₇Já tom, et uámikkâsah pajaspajaneh, lii Mooses-uv čáittám mainâsistis pyellee miestust. Sunhân iätá, et Hiärrá lii Áábráhâm Immeel, Issáák Immeel já Jáákkup Immeel. ₃₈Ij sun lah uámikkâsâi Immeel, pic ellee ulmui immeel. Sunjin puohah láá elimin.»

₃₉Motomeh laavâmáttáátteijeeh ettii taas: »Pyereest västidih, máttáátteijee.» ₄₀Talle kihheen ij innig tuostâm koijâdiđ sust maiden.

₄₁Jeesus koijâdij sist: »Maht puáhtá ettâđ, et Messias lii Taavvid alge? ₄₂Taavvid jieš iätá Psaalmij kirjeest:

₄₅Ubâ aalmug kulâdijn Jeesus eeđâi máttááttâspárnáidis. ₄₆»Váruttiđ laavâmáttáátteijein! Sij joteh mielâstis kuhes olgomáccuhijguin já navdâšeh tast, et ulmuuh tiervâtteh sii toorijn, sij čokkájeh synagogast mielâstubbooht ovdemuin peeŋkâin já tuáluin kunneesaajeest, ₄₇mut sij tuálvuh leeskâin tááluid já luvâtteleh kuhes rukosijdis tuše uáinim tiet. Tađe korrâsub lii sii tuámu.