Viiniponnjoos uávsih
1Mun lam tuotâ viiniponjos, já Iäččám lii viinikärdialmai. 2Sun čuáppá must jyehi uávsi, mii ij šoddâd heeđâlm, mut jyehi heeđâlm šoddâdeijee uávsi sun putteest, vâi tot šoddâdičij heeđâlm ain eenâb. 3Tij leppeđ jo puttáh, tastko tot sääni, mon lam tijjân sárnum, lii putestâm tii. 4Cuápcuđ must, te mun cuápcum tist. Ijhân uáksi pyevti šoddâdiđ heeđâlm, jis tot ij cuápcu muorâst, já siämmáánáál eppeđ tijgin pyevti šoddâdiđ heeđâlm, jis eppeđ cuápcu must.
5»Mun lam viinimuorâ, tij leppeđ uávsih. Tot, kote cuápcu must já kiäst mun cuápcum, šoddâd ennuv heeđâlm. Muuttáá tij eppeđ uážu maiden ááigán. 6Kote ij cuápcu must, lii tego luovânâm uáksi: tot leggistuvvoo meddâl, já tot košká. Kuškâm uávsih norrojeh já leggistuvvojeh tuulân, já toh pyelih kunnân.
7»Jis tij cuápcuvetteđ must já muu säänih cuápcuh tist, pyehtivetteđ áánnuđ maid ihenis haalijdvetteđ, já tij uážžuvetteđ tom. 8Tast muu Eeji kirkkâdvuotâ puátá almolâžžân, vâi tij šoddâdvetteđ ennuv heđâlmijd já nuuvt čäittivetteđ, et tij leppeđ muu máttááttâspárnááh. 9Nuuvtko Eeči lii rähistâm muu, nuuvt lam mun rähistâm tii. Cuápcuđ muu rähisvuođâst. 10Jis tij nuávditvetteđ muu pákkumijd, tij cuápcuvetteđ muu rähisvuođâst, tego mun lam nuávdittâm Iäččám pákkumijd já mun ain cuápcum suu rähisvuođâst.
11»Lam sárnum tijjân taam, nuuvt et tist ličij muu ilo váimustâd já tii ilo šodâččij olesin. 12Muu pákkum lii taat: rähistiđ kuoimijdâd, tego mun lam rähistâm tii. 13Stuárráb rähisvuođâ ij kihheen pyevti čäittiđ, ko et addel jiegâs ustevijdis peeleest. 14Tij leppeđ muu usteveh, ko porgâvetteđ tom, maid mun kočom tii porgâđ. 15Jiem mun kočo tii innig palvâleijen, tastko palvâleijee ij tieđe, maid suu iššeed áigu. Mun kočom tii jieččân ustevin, lamhân mun puáhtám tii tiättun puoh, maid mun lam Ejistân kuullâm. 16Eppeđ tij valjim muu, pic mun väljejim tii, já muu táttu lii, et tij jotevetteđ já šoddâdvetteđ heeđâlm, tom heeđâlm, mii piso. Ko tij nuuvt porgâvetteđ, Eeči addel tijjân puoh, maid muu noomâst sust ánuvetteđ. 17Taam pákkum mun tijjân adelâm: rähistiđ kuoimijdâd.
Maailm vaijeed Jeesus oomijd
18»Jis maailm vaijeed tii, mušteđ, et tot lii vajedâm muu ovdil ko tii. 19Jis tij kulâččijd taan maailmân, tot rähističij tii, jieijâs oomijd. Mut tij eppeđ kuulâ maailmân, tastko mun lam tii tast jieččân uámmin valjim, já tondiet maailm vaijeed tii.
20»Mušteđ, maid mun tijjân ettim: ij palvâleijee lah stuárráb ko suu hiärrá. Jis ulmuuh láá váinudâm muu, te sij váinudeh tii-uv. Jis sij láá nuávdittâm muu sääni, te sij meiddei nuávditteh tii sääni. 21Puoh taam ulmuuh taheh tijjân muu noomâ tiet, tondiet et sij iä tuubdâ suu, kote lii muu vuolgâttâm. 22Jis mun jiem liččii puáttám já sárnum sijjân, sij iä liččii sujâliih, mut tääl sist ij lah aggâ piäluštâllâđ suddoos. 23Kote vaijeed muu, vaijeed meiddei Iäččán. 24Jis mun jiem liččii toohâm sii koskâvuođâst tavoid, maid kihheen eres ij lah toohâm, sij iä liččii sujâliih. Mut tääl sij láá uáinám muu tavoid já vajedeh sehe muu já Iäččán. 25Näävt koolgâi keevvâđ, vâi šodâččij tuottân sii čalluu sääni: ’Sij láá sujâttáá vajedâm muu.’
26»Tij uážžuvetteđ piälušteijee; mun vuolgâttâm suu Eeji kulen. Sun, Tuotâvuođâ Jieggâ, vuálgá Eeji kulen já tuođâšt must. 27Meiddei tij leppeđ muu tuođâšteijeeh, leppeđhân tij lamaš muin aalgâ rääjist.
