Sálmmaid girji 121

Mun bajidan čalmmiidan váriid guvlui.

Gos boahtá munnje veahkki?

₂Mu veahkki boahtá Hearrás,

almmi ja eatnama sivdnideaddjis.

₃Hearrá ii luoitte du juolggi suoibut,

du várjaleaddji ii váibba.

₄Ii son oađestuva iige nohka,

son gii lea Israela goziheaddji.

₅Hearrá lea du goziheaddji,

Hearrá lea du suoivvan

du olgeš gieđa bealde.

₆Beaivváš ii vahágahte du beaivet

iige mánnu ihkku.

₇Hearrá várjala du buot bahás,

son suodjala du eallima.

₈Hearrá várjala du vuolgima ja boahtima

dálážis gitta agálaš áigái.