4. Mosesgirji 25

₁Go israellaččat ledje orron Šittimii, de Israela olbmát furrošišgohte moablaš nissoniiguin. ₂Nissonat bovdejedje sin ipmileaset oaffarmállásiidda, ja olbmát borre oaffarbierggu ja rohkadalle sin ipmila. ₃Nu israellaččat serve Baal-Peorii, ja danin Hearrá moaráhuvai sidjiide. ₄Hearrá celkkii Mosesii: “Váldde álbmoga oaivámuččaid ja harce sin Hearrá muođuid ovddas beaivváža čuovgasis, vai mu buolli moarri jorgalivččii eret Israelis.” ₅Moses dajai Israela duopmáriidda: “Goddet čearddaineattet buot olbmáid geat leat searvan Baal-Peorii.”

₆Muhtun israellaš olmmái bođii midjanlaš nissoniin čearddas gaskii Mosesa ja oppa israellaččaid searvegotti oaidnut, go sii ledje čierrumin almmustusgoađi uksanjálmmis. ₇Go Pinehas gii lei báhppa Arona bártni Elasara bárdni, oinnii sudno, de son loaiddastii ovdan olbmuid gaskkas. Son válddii sáitti gihtii, ₈manai olbmá maŋis goahteboššui ja rehttii sáittiin goappašagaid, israellaš olbmá ja midjanlaš nissona. Dalle israellaččaid giksi nogai, ₉muhto dasa ledje juo jápmán guokteloginjealljeduhát olbmo.

₁₀Hearrá sártnui Mosesii:

₁₁Pinehas, báhppa Arona bártni Elasara bárdni, lea soažžudan mu moari. Son lea áŋgirvuođain bealuštan mu gudni, ja danin mun in áŋgirvuođastan loahpahan israellaččaid. ₁₂Cealkke sutnje ahte mun dagan suinna ráfilihtu ₁₃ja attán sutnje ja su nállái vuoigatvuođa leat báhppan agálaččat, danin go son áŋgirušai Ipmila beales ja doaimmahii soabahusa israellaččaide.

₁₄Israellaš olmmái gii goddojuvvui oktan midjanlaš nissoniin, lei Simri, Salu bárdni, Simeona čeardda bearašoaivámuš. ₁₅Dan goddojuvvon midjanlaš nissona namma lei Kosbi. Su áhčči lei midjanlaš čeardaoaivámuš Sur.

₁₆Hearrá sártnui Mosesii:

₁₇Fallehehket midjanlaččaid ja časket sin, ₁₈dasgo sii leat iskan gávvilvuođain vahágahttit din. Sii fillejedje din bálvalit Baal-Peora ja atne das ávkin Kosbi, midjanlaš oaivámučča nieidda, gii goddojuvvui go giksi deaividii álbmoga Peora bálvaleami dihte.

₁₉Go giksi lei vássán,