Mika 7

₁Vuoi mu!

Munnje lea geavvan nugo dalle

go šaddosat lea ráddjojuvvon

ja maŋimus viidnemuorjjit čoakkilduvvon:

Eai leat viidnemuorjjit borrat,

eai varas fiikonat njálbmái.

₂Oskkáldas olbmot leat jávkan eatnamis,

ii leat oktage vuoiggalaš olbmuid gaskkas.

Buohkat vuđgŋet varaid,

juohkehaš dáhttu bivdit firpmiin vieljas.

₃Sii leat čeahpit dahkat dan mii lea bahá.

Oaivámuš gáibida duolgguid,

duopmár dubme mávssus,

fámolaš buktá ovdan iežas anistumiid;

de sii jorahit ášši nugo dáhttot.

₄Buoremus sis lea dego bastilislátnjá,

reháleamos vearrát go bastilislátnjágárdi.

Dat beaivi maid du várdájeaddjit

gulahedje, lea boahtán.

Ráŋggáštusbeaivi lea joavdan,

visot lea dušše moivi.

₅Ale jáhke lagamužžii,

ale dorvvas ustibii.

Várut ságaidat nissonis

gii veallá du salas.

₆Dasgo bárdni badjelgeahččá áhčis,

nieida ceakkasta eadnásis,

mannji vuotnámasas.

Olbmá vašálaččat

leat su iežas dálu olbmot.

₇Muhto mun várdán Hearrá,

vuorddán iežan bestojumi Ipmila.

Mu Ipmil gullá mu!

₈Ale illut mu dihte, vašálažžan!

Vaikko mun gahččen,

de mun čuožžilan fas,

vaikko mun čohkkán seavdnjadasas,

de Hearrá lea mu čuovga.

₉Mun lean suddudan Hearrá vuostá,

danin mun ferten gierdat su moari,

dassážii go son jođiha mu ášši

ja addá munnje vuoigatvuođa.

Son doalvu mu čuovgasii,

ja mun beasan oaidnit

su vanhurskkisvuođa.

₁₀Mu vašálaš oaidná dan ja heahpana,

son gii jearai mus:

“Gos lea Hearrá, du Ipmil?”

Mun beasan geahččat

go son dulbmojuvvo dego gáhta durdi.

₁₁Boahtá beaivi

goas du muvrrat huksejuvvojit,

goas du rájit gáidet.

₁₂Dalle du olbmot máhccet Assyrias,

bohtet Egypta gávpogiin

– Egypta rájes gitta Eufrateanu rádjái –

mearas merrii, váris várrái.

₁₃Duot eatnamat šaddet ávdimin

ássiideaset dihte,

dan dihte maid sii leat dahkan.

₁₄Gozit soppiinat iežat álbmoga,

ealu mii lea du opmodat

ja ássá sierranassii gasku mehciid,

guhkkin gilvvaeatnamiin.

Doalvvo dan Bašana ja Gileada ealabáikkiide

nugo dološ áiggiid.

₁₅Divtte min oaidnit oavdudaguid,

dego dalle go don vulget Egyptas.

₁₆Álbmogat oidnet dan ja heahpanaddet,

vaikko leatge fámolaččat.

Sii fertejit bidjat gieđa njálmmi ovdii

ja čuožžut bealjeheapmin.

₁₇Sii njollot muoldda nugo gearpmaš,

dego eatnama njoammuspiret.

Sii bohtet čiehkádansajiineaset

doarggistemiin Hearrá, min Ipmila, ovdii.

Dus, Hearrá, sii suorganit ja ballet!

₁₈Gii lea dakkár Ipmil go don,

guhte válddát eret vearredagu

ja attát suttu ándagassii

iežat álbmoga bázahassii?

Don it leat moaris agálaččat,

don dáhtut leat árbmugas.

₁₉Don árpmihat min fasttain

ja sihkut min rihkkumiid.

Don bálkestat buot min suttuid

ábi čiekŋalassii.

₂₀Don čájehat oskkáldasvuođa Jakobii

ja árpmu Abrahamii,

nugo don vurdnot

min áhčiide don dološ áiggi.