Job 37

₁Dás mu váibmu suorgana,

dat julká mu rattis.

₂Gullet su jiena juma,

gullet dan jura mii boahtá su njálmmis!

₃Son luoitá álddagasaidis

mannat miehtá almmi,

son vuolggaha daid

gitta eatnama ravddaide.

₄Daid maŋis gullo čeargun,

su gorges jietna jupmá.

Son ii seastte álddagasaidis,

ja su jietna jullá.

₅Ipmil dahká oavdudaguid

jubmi jienainis.

Son dahká stuorra daguid

maid mii eat ádde.

₆Son gohčču muohttaga gahččat,

ráššoarvvi šoallat eatnamii.

₇Son bisseha olbmuid barggu,

vai buohkat dovdet su daguid.

₈Meahcispiret mannet hoaluidasaset

ja bissot biejuineaset.

₉Ramadat vuolgá gámmáristtis

ja buolaš rájustis.

₁₀Ipmila vuoiŋŋanasas šaddá jiekŋa,

ja govda čázitge stirdot.

₁₁Son deavdá balvvaid lávttadasain,

balvvain vulget su álddagasat.

₁₂Dat johtet juohke guvlui

nu mo son dáhttu,

dat dahket buot maid son gohčču

miehtá eatnama jorbadasa.

₁₃Muhtumin son vuolggaha daid

bagadussan, muhtumin ávkin eatnamii.

₁₄Guldal dán, Job,

orus guorahallat Ipmila oavdduid!

₁₅Dieđátgo mo Ipmil bargá,

mo son diktá balvvaidis

álddagasaid šleađgut?

₁₆Áddetgo mo balvvat sattáhallet,

fihttetgo Buotdiehtti ovddolaš daguid?

₁₇Don gean biktasat báhkistit

liikki vuostá

go lullibiegga viessada eatnama,

₁₈dongo leat veahkehan su

lebbet gomuvuođa,

nannosa dego leikejuvvon speadjala?

₁₉Oahpat min!

Maid mii galgat vástidit sutnje?

Miihan leat seavdnjadis,

eat mii máhte sárdnut maidege.

₂₀Galgágo sutnje muitaluvvot

ahte mun dáhtun sárdnut suinna?

Gii sávašii šaddat duššaduvvot?

₂₁Ii oktage máhte geahččat beaivvážii

mii báitá šearradit,

go biegga lea ráidnen almmi.

₂₂Davvin boahtá gollečuovga,

suorggahahtti báitin birastahttá Ipmila.

₂₃Mii eat olat Buotveagalačča.

Su fápmu ja vuoiggalašvuohta lea stuoris

ja su vanhurskkisvuohta allat,

ii son áŧes ovttage.

₂₄Dan dihte olbmot ballet sus,

muhto viissástalliin son ii ane ávvira.