Jeremia 7

₁Dát Hearrá sátni bođii Jeremiai: ₂Mana čuožžut Hearrá tempela portii ja gulat doppe ná:

Gullet Hearrá sáni, buot dii Juda ássit geat mannabehtet dáid poarttaid ráigge rohkadallat Hearrá! ₃Ná cealká Hearrá, Almmiveagaid Ipmil, Israela Ipmil: Hilgot vearregeainnuideattet ja dahket buriid, de mun divttán din ássat dán báikkis. ₄Allet dorvvas dákkár gielis sániide: “Dát lea Hearrá tempel, Hearrá tempel, Hearrá tempel!” ₅Muhto jos dii duođaid buoridehpet vádjolusadet ja daguideattet, jos dahkabehtet rievttuid guhtet guimmiidasadet, ₆jos ehpet soardde vierrásiid, oarbásiid ehpetge leaskkaid, ehpet golggat vigihis vara dán báikkis ehpetge vádjol eará ipmiliid maŋis alcceseattet vahágin, ₇de mun divttán din ássat dán báikkis, dán eatnamis maid mun dolin adden din áhčiide agálaš áigái. ₈Muhto dii dorvvastehpet gielis sániide mat eai leat maninge ávkin. ₉Dii suoládehpet, goddibehtet, rihkkubehtet náittosdili, vuordnubehtet vearrut, cahkkehehpet oaffardola Baalii ja vádjolehpet eará ipmiliid maŋis maid ehpet dovdda. ₁₀Ja de dii loaiddastehpet mu ovdii dán vissui man badjel mu namma lea celkojuvvon, ja dadjabehtet: “Mii leat bestojuvvon!” muhto dahkabehtet ain buot hirbmatlaš daguideattet. ₁₁Rievvárbiedjungo dii atnibehtet dán viesu man badjel mu namma lea celkojuvvon? Dakkáražžan munge lean dan gávnnahan, cealká Hearrá.

₁₂Mannet mu bassibáikái Šilos, gos mun ovdal dikten iežan nama ássat. Gehččet maid mun dahken dasa álbmogan Israela bahávuođa dihte! ₁₃Ja dál dii lehpet dahkan buot seammá daguid, cealká Hearrá. Dii ehpet gullan vaikko mun árrat ja oktilassii sárdnon didjiide, dii ehpet vástidan vaikko mun rávken din. ₁₄Dán vissui man badjel mu namma lea celkojuvvon ja masa dii dorvvastehpet, ja dán báikái maid mun adden didjiide ja din áhčiide, mun dagan nugo dahken Šiloi. ₁₅Mun suhppen din eret muođuidan ovddas, seammá láhkái go mun suhppejin eret buot din vieljaid, oppa Efraima náli.

₁₆Ale rohkadala dán álbmoga ovddas. Ale bajit dan ovddas váidalusa dahje rohkosa, ale vuorjja mu, dasgo mun in guldal du. ₁₇Itgo don oainne maid sii dahket Juda gávpogiin ja Jerusalema gáhtain? ₁₈Mánát čogget muoraid, áhčit cahkkehit dola ja nissonat duhppejit dáiggi vai besset láibut oaffargáhkuid Almmi dronnegii. Sii golggahit juhkamušoaffariid eará ipmiliidda ja nu rihkkot mu vuostá. ₁₉Muhto mun, Hearrá, jearan: Mugo vuostá sii rihkkot? Eaigo sii baicce rihko iežaset vuostá? Iežaset sii heahppášuhttet! ₂₀Dan dihte cealká Hearrá Ipmil: Mun golggahan suhtton ja moarrán dán báikki badjelii, olbmuid ja spiriid badjelii, meahci muoraid ja eatnama šattuid badjelii, ja dat buollá iige čáskka.

₂₁Ná cealká Hearrá, Almmiveagaid Ipmil, Israela Ipmil: Lasihehket boaldinoaffariid iežadet njuovvanoaffariidda ja borret bierggu! ₂₂Go mun bukten din áhčiid Egyptas, de mun in addán sidjiide mearrádusaid boaldinoaffariid ja njuovvanoaffariid birra. ₂₃Muhto mun gohččon sin ná: “Gullet mu jiena, de mun lean din Ipmil ja dii lehpet mu álbmot. Vádjolehket álo dan geainnu man mun gohčun din vádjolit, vai didjiide geavvá bures.” ₂₄Muhto sii eai gullan mu eaige bivdán bealjige, muhto vádjoledje iežaset jurdagiid mielde, iežaset bahás ja buššon váimmu mielde. Sii jorgaledje munnje sealggi eaige muođuid. ₂₅Dan beaivvi rájes go sin áhčit vulge Egyptas gitta dán beaivvi rádjái, mun lean vuolggahan bálvaleddjiidan profehtaid sin lusa. ₂₆Muhto sii eai dáhtton guldalit mu, eai dáhtton dahkat oppa gullinge. Sii dušše buoššudedje iežaset ja dahke vearrábut go sin áhčit.

₂₇Ja go don, Jeremia, sártnut sidjiide buot dán, de sii eai guldal du, ja go don rávkkat sin, de sii eai vástit dutnje. ₂₈Cealkke dalle sidjiide: Dát lea álbmot mii ii dáhtton gullat Hearrá, Ipmilis, jiena iige váldit vuostá bagadusa. Duohtavuohta lea nohkan, dat ii gullo šat sin njálmmis.

₃₀Juda álbmot lea dahkan dan mii lea bahá mu čalmmiin, cealká Hearrá. Sii leat ceggen fasttes ipmilgovaideaset dan vissui man badjel mu namma lea celkojuvvon, sii leat dahkan dan buhtismeahttumin. ₃₁Sii leat huksen Tofeta oaffarbáikki Ben-Hinnoma leahkái vai besset boaldit das bártniideaset ja nieiddaideaset. Dan mun in leat gohččon sin dahkat iige dat leat badjánan mu millii.

₃₂Dan dihte bohtet beaivvit, cealká Hearrá, go dan namma ii šat leat Tofet iige Ben-Himmonleahki, muhto Sorbmenleahki. Dán álbmoga rupmašat hávdáduvvojit Tofetii dassážii go ii leat šat sadji. ₃₃Dat šaddet almmi lottiid ja eatnama elliid biebmun, iige oktage gavdnje daid eret. ₃₄Mun loahpahan Juda gávpogiin ja Jerusalema gáhtain ávvučuorvasiid ja illučuorvasiid, mun divttán irggi ja moarsi jiena jaskkodit. Dasgo eanan šaddá ávdimin.