Duopmáriid girji 10

₁Abimeleka jápmima maŋŋil Israela gáddjun čuožžilii isaskarlaš Tola, Pua bárdni ja Dodo áddjut. Son ásai Šamiris Efraima várreeatnamis. ₂Son lei duopmárin Israelis guoktelogigolbma jagi. De son jámii ja hávdáduvvui Šamirii. ₃Su maŋŋil Israela duopmárin šattai gileadlaš Jair gii lei duopmárin guoktelogiguokte jagi. ₄Sus ledje golbmalogi bártni geat riidejedje golmmainlogiin ásenoriin, ja sis ledje Gileadis golbmalogi gávpoga maid vel odnenai gohčodit Jaira siidan. ₅Jair jámii, ja son hávdáduvvui Kamonii.

₆Israellaččat dahke vuot dan mii lea bahá Hearrá čalmmiin. Sii bálvaledje Baal-ipmiliid ja Astarte-ipmiliid ja velá aramealaččaid, sidonlaččaid, moablaččaid, ammonlaččaid ja filistalaččaid ipmiliid. Sii hilgo Hearrá eaige šat bálvalan su. ₇Dalle Hearrá moaráhuvai Israelii ja attii sin filistalaččaid ja ammonlaččaid gihtii.

₈Ammonlaččat áŧestedje ja sorde gávccinuppelohkái jagi daid israellaččaid geat ásse Jordana don bealde Gileadis, amorlaččaid eatnamis. ₉De sii bohte Jordana rastá ja fallehedje Juda, Benjamina ja Efraima čearddaid olbmuid. Israel lei stuorra áŧestusas. ₁₀Dalle israellaččat čurvo Hearrái ja dadje: “Mii leat suddudan du vuostá, mii leat hilgon Ipmileamet ja bálvalan Baal-ipmiliid.” ₁₁Hearrá celkkii sidjiide: “Go egyptalaččat, amorlaččat, ammonlaččat, filistalaččat, ₁₂sidonlaččat, amaleklaččat ja midjanlaččat sorde din, de dii čuorvvuidet munnje, ja mun gádjon din sin gieđas. ₁₃Muhto dii hilgguidet mu ja bálvališgođiidet eará ipmiliid. Dan dihte mun in šat gájo din. ₁₄Čurvot dal daidda ipmiliidda maid lehpet válljen. Gádjoset dat din go lehpet heađis.” ₁₅Israellaččat dadje Hearrái: “Mii leat suddudan. Daga midjiide maid anát buorrin, go fal dán háve gájut min.” ₁₆Sii jávkadedje vieris ipmiliiddiset ja bálvaledje fas Hearrá. Dalle Hearrá ii šat gierdan oaidnit israellaččaid gillámuša.

₁₇Ammonlaččat rávkojuvvojedje čoahkkái, ja sii dahke soahtesiidda Gileadii. Dalle israellaččatnai čoahkkanedje, ja sii dahke soahtesiidda Mispai. ₁₈Gileadlaččat ja sin oaivámuččat dadje guhtet guoibmáseaset: “Dat gii ovddimustá vuolgá soahtat ammonlaččaiguin, šaddá Gileada ássiid oaivámužžan.”