Esekiel 5

₁Olmmoš, váldde bastilis miehki, ane dan ráhkenniibin ja ráhke dainna iežat vuovttaid ja skávžžáid. Váldde dasto veavtta ja juogat vuovttaid ja skávžžáid. ₂Boaldde goalmmádasa guovdu gávpoga go birastahttinbeaivvit leat dievvan, goalmmádasa čuola mihkiin muvrraid olggobealde, goalmmádasa biđge biekka fárrui. Mun doarridan sin rohttejuvvon mihkiin. ₃Váldde vel veahá vuoktačalmmiid ja giesa daid bivttashealmmi sisa. ₄Váldde dain vel muhtumiid, bálkes dollii ja boaldde. Das dolla leavvá oppa Israela álbmogii.

₅Ná cealká Hearrá Ipmil: Vuoi Jerusalema! Mun bidjen dan álbmogiid guovddážin, buot eará eatnamiid mun bidjen dan birra. ₆Dat nággárušai mu báhkkomiid ja lágaid vuostá. Dat suddudii vearrábut go eará álbmogat, nággárušai eambbo go eatnamat mat leat dan birra. Dat hilggui mu báhkkomiid iige doallan mu lágaid. ₇Dan dihte cealká Hearrá Ipmil: Dii lehpet stuibmidan vearrábut go vieris álbmogat mat leat din birra, dasgo dii ehpet leat eallán mu báhkkomiid mielde ehpetge leat doallan mu lágaid. Dii ehpet leat doallan birasálbmogiid lágaidge. ₈Dan dihte cealká Hearrá Ipmil: Dál mun jorgalan du vuostá, Jerusalem! Du siste mun doalan duomu vierroálbmogiid oaidnut. ₉Mun ráŋggáštan du du eartnjehas daguid dihte ja dagan juoidá maid in leat goassege ovdal dahkan inge goassege šat áiggo dahkat. ₁₀Du siste vánhemat šaddet borrat mánáideaset ja mánát vánhemiiddiset. Mun ollašuhtán du duomu, ja mun biđgen buot biekkaide dan mii dus báhcá. ₁₁Nu duohta go mun ealán, cealká Hearrá Ipmil, dan dihte go don leat dahkan mu bassibáikki buhtismeahttumin buot eartnjehas govaidatguin ja buot fasttes vieruidatguin, de mun áiggun atnit ráhkenniibbi, in seastte inge árkkáš. ₁₂Goalmmádas du álbmogis jápmá rohttudávdii ja roahppána nealgái du siste, goalmmádas gahččá miehkkái du muvrraid olggobealde ja goalmmádasa mun biđgen buot biekkaide ja doarridan rohttejuvvon mihkiin. ₁₃Mun golggahan iežan suhtu, mun gurren iežan moari dutnje, mun mávssahan dutnje. Go mun lean golggahan iežan moari du olbmuide, de dalle sii ipmirdit ahte mun, Hearrá, lean sárdnon áŋgirvuođastan. ₁₄Mun dagan du čievračopman ja birasálbmogiid bilkun buot meaddelmanniid oaidnut. ₁₅Birasálbmogat bilkidit ja hiddjidit du, ja don šattat daidda cuiggodussan ja suorggahussan, go mun garra moaristan ollašuhtán du duomu ja ráŋggáštan du. Mun, Hearrá, lean sárdnon. ₁₆Mun vuolggahan din vuostá nealggi bahás njuolaid, ja dat duššadit din. Mun nealgudan din ja divttán láibbi nohkat. ₁₇Mun vuolggahan din vuostá nealggi ja boraspiriid mat dahket din mánáheapmin. Rohttudávda ja jápmin njeaidá din, go mun geaigguhan miehki din vuostá. Mun, Hearrá, lean sárdnon.