2. Mosesgirji 39

₁Ruksesalit, purpurrukses ja karmosinrukses ulloláiggis gođđojuvvojedje bassibáikki bálvalusa várás virgebiktasat ja maiddái Arona bassi biktasat daid rávvagiid mielde maid Hearrá lei addán Mosesii.

₂Efod duddjojuvvui gollis ja ruksesalit, purpurrukses ja karmosinrukses ulloláiggis ja fiinna gerdojuvvon beallemasas. ₃Golli derpojuvvui asehis duolbbusin. Dain dahkkojuvvojedje árpput mat gođđojuvvojedje oktii ruksesalit, purpurrukses ja karmosinrukses ulloláiggiiguin ja beallemasláiggiiguin čáppa hearvaduodjin. ₄Efodii duddjojuvvojedje guokte oalgebihtá mat ledje gitta gežiin ja dolle dan oktii. ₅Boagán mainna efod giddejuvvui, lei oktan bihttán dainna ja duddjojuvvon seammá láhkái go dat: datge lei gollis ja ruksesalit, purpurrukses ja karmosinrukses ullus ja fiinna gerdojuvvon beallemasas, dan gohččuma mielde maid Hearrá lei addán Mosesii. ₆Sii giddejedje onyksgeđggiid gollebotnosiidda. Daidda ledje gohppojuvvon Israela bártniid namat nugo signehttii. ₇Sii bidje daid efoda oalgebihtáide muittuhit Israela bártniin, dan gohččuma mielde maid Hearrá lei addán Mosesii. ₈Sii duddjojedje maiddái raddeleahpi. Dat lei gođđojuvvon efoda láhkái čáppa hearvaduodjin gollis ja ruksesalit, purpurrukses ja karmosinrukses ullus ja fiinna gerdojuvvon beallemasas. ₉Dat lei njealječiegat ja guovttegeardásaš, ovtta vuovssi guhku ja ovtta vuovssi govddu. ₁₀Sii giddejedje dasa geđggiid njealji ráidui: vuosttaš ráidui rubiinna, topása ja smarágda, ₁₁nuppi ráidui turkosa, safira ja kalsedona, ₁₂goalmmát ráidui opala, agahta ja ametystta, ₁₃ja njealját ráidui krysolihta, onyksa ja jaspisa. Dat giddejuvvojedje gollebotnosiidda. ₁₄Geađggit ledje guoktenuppelohkái Israela bártniid namaid mielde, okta guđege bártni nammii. Guđege geađgái lei gohppojuvvon okta guoktenuppelohkái čeardda namain nugo signehttageađgi gohppojuvvo. ₁₅Raddeleahppái sii ruvdejedje čielga gollis bárggešiid lágán viđjjiid. ₁₆Sii duddjojedje raddeleahppái guokte gollebotnosa ja guokte gollerieggá, maid sii giddejedje raddeleahpi guovtti čihkii. ₁₇Golleviđjjiid sii giddejedje rieggáide mat ledje raddeleahpi čiegain, ₁₈ja viđjjiid nuppiid gežiid gollebotnosiidda, maid sii giddejedje efoda oalgebihtáide ovddabeallái. ₁₉Sii duddjojedje vel guokte gollerieggá ja bidje daid raddeleahpi guovtti eará čihkii, dan siskkobeallái efoda vuostá. ₂₀Sii duddjojedje vel guokte gollerieggá ja giddejedje daid efoda ovddabeallái goappáge oalgebihtá vuolleravdda sávnnji buohta, boahkána bajábeallái. ₂₁Raddeleahpi ja efoda rieggát čadnojuvvojedje oktii ruksesalit ullogarccain, nu ahte raddeleahppi bisui sajistis efoda alde boahkána bajábealde. Sii dahke visot dan gohččuma mielde maid Hearrá lei addán Mosesii.

₂₂Sii gođđe efoda olgguldasbiktasa ollásit ruksesalit ullus. ₂₃Sii buddestedje olgguldasbiktasa oza seammalágán gođđosiin go lea náhkkegárvvu ozas, amas gaikásit. ₂₄Olgguldasbiktasa healbmái sii duddjojedje hearvan granáhtaehpeliid gerdojuvvon ruksesalit, purpurrukses ja karmosinrukses ulloláiggis. ₂₅Sii duddjojedje čielga gollis divggaid, maid sii giddejedje granáhtaehpeliid gaskii, ₂₆vurrolagaid ain golledivgga ja granáhtaehpela oppa healmmi birra. Olgguldasbivttas lei duddjojuvvon ipmilbálvalusanu várás dan gohččuma mielde maid Hearrá lei addán Mosesii.

₂₇Sii gođđe fiinna beallemasas báiddiid Aronii ja su bártniide ₂₈ja duddjojedje turbána ja eará gahpiriid fiinna beallemasas, buvssaid fiinna gerdojuvvon beallemasas ₂₉ja čábbát gođđojuvvon boahkána fiinna gerdojuvvon beallemasas ja ruksesalit, purpurrukses ja karmosinrukses ullus dan gohččuma mielde maid Hearrá lei addán Mosesii.

₃₀Sii duddjojedje čielga gollis lieđi, bassi oaivečiŋa, ja gohpe dasa nugo signehttii sániid “Hearrái basuhuvvon”. ₃₁Sii giddejedje dasa ruksesalit ullogarcca ja čatne dan bajás turbánii dan gohččuma mielde maid Hearrá lei addán Mosesii.

₃₂Nu šattai gárvvisin buot bargu mii dahkkojuvvui goađi, almmustusgoađi, huksema várás. Israellaččat dahke buot dárkilit dan gohččuma mielde maid Hearrá lei addán Mosesii. ₃₃Sii bukte Mosesa lusa goađi ja buot dan dárbašiid, rohkiid, fielluid, doaresmuoraid, stoalppuid ja daid julggiid, ₃₄ruoksadin báidnojuvvon vierccanáhkkegokčasa ja delfiinnanáhkiin duddjojuvvon gokčasa ja gokči ovdaloavdaga, ₃₅lihtumearkka árkka ja dan guoddinstákkuid ja soabahussaji, ₃₆beavddi oktan dan dárbašiiguin ja oaffarláibbiiguin, ₃₇lámpájuolggi mii lei duddjojuvvon čielga gollis, lámppáid mat gullet dasa ja dan eará dárbašiid, lámpáoljju, ₃₈golleáltára, vuoidanoljju, njálggahájat suovvasiid, goađi uvssa gokčasa, ₃₉bronsaáltára oktan dan bronsabilddain, guoddinstákkuiguin ja buot eará dárbašiiguin, čáhceáldása ja dan juolggi, ₄₀ovdašilju loavdagiid oktan stoalppuiguin ja julggiiguin, ovdašilju poartta gokčasa, báttiid, giddennávlliid ja buot biergasiid mat adnojuvvojedje bálvalussii goađis, almmustusgoađis, ₄₁virgebiktasiid bálvalusa várás bassibáikkis, báhppa Arona bassi biktasiid ja su bártniid báhpabiktasiid. ₄₂Israellaččat dahke dán buot aiddo dan gohččuma mielde maid Hearrá lei addán Mosesii. ₄₃Moses geahčadii buot maid sii ledje duddjon, ja oinnii ahte sii ledje dahkan buot aiddo nugo Hearrá lei gohččon. Ja Moses buressivdnidii sin.