1Besalel, Oholiab ja buot duojárat geaidda Hearrá lea addán viisodaga ja ipmárdusa duddjot buot mii bassibáikkis adnojuvvo ipmilbálvalusa várás, galget dahkat visot aiddo nugo Hearrá lea gohččon.”
2Moses rávkkai Besalela, Oholiaba ja buot duojáriid geaidda Hearrá lei addán dáiddu, juohkehačča gii lei mieđis bargat dán barggu. 3Sii ožžo Mosesis buot attáldagaid maid israellaččat ledje buktán bassibáikki huksema várás. Muhto israellaččat bukte ain juohke iđida eaktodáhtolaš attáldagaid. 4Dalle bohte buot duojárat geat ledje duddjomin buotlágán dujiid bassibáikkis, 5ja dadje Mosesii: “Álbmot buktá eambbo go adnojuvvo daidda dujiide maid Hearrá lea gohččon duddjot.” 6Moses gohčui gulahit miehtá siidda: “Ii oktage olmmái dahje nisson oaččo šat ráhkadit maidege attáldahkan bassibáikki várás.” De álbmot heittii buktimis attáldagaid, 7danne go buot dujiid duddjoma várás lei juo čohkkejuvvon doarvái ja velá liiggásge.
8De čeahpes duojárat duddjojedje goađi logi loavddabihtás. Dat ledje gođđojuvvon fiinna gerdojuvvon beallemasláiggis ja ruksesalit, purpurrukses ja karmosinrukses ullus, ja hervejuvvon čábbát kerubagovaiguin. 9Guhtege loavddabihttá lei guoktelogigávcci állana guhku ja njeallje állana govddu. Buot loavddabihtáin lei oktat mihttu. 10Sii njađđe vihtta loavddabihtá oktii, ja nu maiddái dan eará vihttage. 11Dasto sii duddjojedje fárffuid ruksesalit láiggis nuppi oktiigorrojuvvon loavdaga ravdii ja seammá ládje nuppi oktiigorrojuvvon loavdaga ravdii. 12Sii duddjojedje vihttalogi fárffu vuosttaš loavdaga ravdii ja vihttalogi fárffu nuppi loavdaga ravdii, nu ahte fárffut šadde buohtalagaid. 13Sii duddjojedje vihttalogi golleroahki ja roahkohedje daiguin loavdagiid oktii, nu ahte šattai olles goahteloavdda.
14Dasto sii duddjojedje gáiccaguolggain oktanuppelohkái loavdaga govččasin goađi ala. 15Juohke loavdda lei golbmalogi állana guhku ja njeallje állana govddu, ja buot loavdagiin lei oktat mihttu. 16Vihtta loavdaga sii njađđe oktan bihttán, ja seammá láhkái guhtta eará loavdaga oktan bihttán. 17Sii duddjojedje vihttalogi fárffu nuppi loavdaga olggumuš bihtá ravdii ja vihttalogi fárffu nuppi loavdaga ravdii. 18Sii duddjojedje vihttalogi bronsaroahki ja roahkohedje daid oktii, nu ahte goahteloavdda šattai ollisin. 19Sii duddjojedje goahtái gokčasa ruoksadin báidnojuvvon vierccanáhkiin ja dan ala vel gokčasa delfiinnanáhkiin.
20Sii duddjojedje akasiamuoras goađi seaidnefielluid maid galggai bidjat ceaggut. 21Juohke fiellu lei logi állana guhku ja beannot állana govddu. 22Juohke fiellus ledje guokte návlli bálddalagaid; nu sii duddjojedje buot goađi fielluid. 23Sii duddjojedje guoktelogi fiellu goađi lulábeale seainni várás, lulás guvlui, 24ja njealljelogi silbajuolggi dan guovttelogi fiellu vuollái, guđege fiellu vuollái guokte juolggi maidda návllit heivejedje. 25Maiddái goađi nuppi seaidnái, davás guvlui, sii duddjojedje guoktelogi fiellu 26ja njealljelogi silbajuolggi, guokte juolggi guđege fiellu vuollái. 27Goađi duogábeallái, oarjjás guvlui, sii duddjojedje guhtta fiellu 28ja guokte fiellu goađi čiegaide, duogábeallái. 29Dát fiellut ledje guovttegeardásaččat bajil ja vuolil gitta vuosttaš rieggá rádjái. Dakkárin duddjojuvvojedje guktot čiehkafiellut. 30Oktiibuot ledje gávcci fiellu ja daidda guhttanuppelohkái silbajuolggi, guokte juolggi guđege fiellu vuolde.
31Sii duddjojedje doaresmuoraid akasiamuoras, vihtta doaresmuora goađi nuppi oalgeseainni fielluide, 32vihtta doaresmuora goađi nuppi oalgeseainni fielluide ja vihtta doaresmuora goađi duogábeallái, oarjjás guvlui. 33Gaskkamuš doaresmuorra lei fielluid gaskkamuttus, ja dat giddii fielluid miehtá seainni geažis geahčái. 34Sii skoađastedje fielluid golliin ja duddjojedje gollerieggáid maidda doaresmuorat nahkehuvvojedje, ja skoađastedje doaresmuoraidge golliin.
35Sii gođđe ovdaloavdaga ruksesalit, purpurrukses ja karmosinrukses ullus ja fiinna gerdojuvvon beallemasláiggis, ja hervejedje dan čábbát kerubagovaiguin. 36Sii duddjojedje dasa akasiamuoras njeallje stoalppu ja skoađastedje daid golliin. Stoalppuid roahkit ledje maid gollis. Stoalppuid várás sii leikejedje njeallje silbajuolggi. 37Goađi uksagokčasa sii gođđe čáppa hearvaduodjin ruksesalit, purpurrukses ja karmosinrukses ullus ja fiinna gerdojuvvon beallemasláiggis. 38Gokčasa várás sii duddjojedje vihtta stoalppu ja daidda rohkiid. Sii skoađastedje stoalpooivviid ja doaresmuoraid golliin ja leikejedje stoalppuid várás vihtta bronsajuolggi.
