1Amosa sánit. Amos lei sávzageahčči Tekoa guovllus. Dáid sániid Israela hárrái son oaččui guokte jagi ovdal eanandoarggástusa. Dalle Juda gonagassan lei Ussia ja Israela gonagassan Jeroboam, Joaša bárdni.
2Ná Amos sártnui:
Hearrá čeargu Sionis,
su jietna jupmá Jerusalemis.
Dalle guođoheddjiid
guohtuneatnamat moraštit,
Karmela aláš goiká.
Israela ja dan ránnjáálbmogiid duopmu
3Ná cealká Hearrá:
Danin go Damaskus lea dahkan
vearredagu vearredagu maŋŋil,
de dan duopmu ii rievdda.
Sii leat cuvken Gileada
ruovdegordnenreagaiguin.
4Mun vuolggahan dola Hasaela šlohttii,
ja dat duššada Ben-Hadada ladniid.
5Mun cuvken Damaskusa poartta smartti,
duššadan ráđđejeaddji Bikat-Avenis
ja dan gii guoddá ráđđensoappi Bet-Edenis.
Arama álbmot dolvojuvvo eatnamisttis Kirii,
cealká Hearrá.
6Ná cealká Hearrá:
Danin go Gaza lea dahkan
vearredagu vearredagu maŋŋil,
de dan duopmu ii rievdda.
Sii leat dolvon olles giliid fáŋgan
ja addán daid olbmuid Edoma gihtii.
7Mun vuolggahan dola Gaza muvrii,
ja dat duššada gávpoga ladniid.
8Mun duššadan ráđđejeaddji Ašdodis
ja dan gii guoddá Aškelona ráđđensoappi.
Mun lokten gieđa Ekrona vuostá,
ja filistalaččaid bázahas duššá,
cealká Hearrá Ipmil.
9Ná cealká Hearrá:
Danin go Tyros lea dahkan
vearredagu vearredagu maŋŋil,
de dan duopmu ii rievdda.
Sii leat addán Edoma gihtii olles giliid fáŋgan
eaige leat muitán vielljavuođalihtu.
10Mun vuolggahan dola Tyrosa muvrii,
ja dat duššada gávpoga ladniid.
11Ná cealká Hearrá:
Danin go Edom lea dahkan
vearredagu vearredagu maŋŋil,
de dan duopmu ii rievdda.
Sii leat doarrádallan vieljaideaset mihkiin
eaige leat dovdan váibmoláđisvuođa.
Sin moarri lea buollán čađat,
iige sin suhttu leat nohkan goassege.
12Mun vuolggahan dola Temanii,
dat duššada Bosra ladniid.
13Ná cealká Hearrá:
Danin go ammonlaččat leat dahkan
vearredagu vearredagu maŋŋil,
de sin duopmu ii rievdda.
Sii luddo Gileada áhpehis nissoniid
vai besse viiddidit rájiideaset.
14Mun cahkkehan dola Rabba muvrii,
ja dat duššada gávpoga ladniid
go soahtečuorvasat skádjet soađi beaivvi,
go riđđuda jorrebiekka beaivvi.
15Sin gonagas dolvojuvvo fáŋgavuhtii
oktan oaivámuččaidisguin,
cealká Hearrá.
