2. Gonagasaid girji 9

₁Profehta Eliša rávkkai muhtun profehtaoahppi ja dajai sutnje: “Boahkánastte alimiid ja vuolgge Ramotii Gileadis. Váldde mielde dán oljobohttala. ₂Go ollet dohko, de oza Jehu, Nimši bártni Jošafata bártni. Mana deaivvadit suinna, bivdde su sierra olbmáidis luhtte ja doalvvo su siskkimuš gámmárii. ₃Váldde dasto oljobohttala, golggat oljju su oaivái ja cealkke: ‘Ná cealká Hearrá: Mun lean vuoidan du Israela gonagassan.’ Rabas dasto uvssa ja viehkal dalán, ale ájahala.” ₄Dalle profehtaoahppi gii lei ain nuorra olmmái, vulggii Ramotii Gileadis. ₅Go son ollii dohko, de soahteveaga oaivámuččat ledje das čohkkámin. Profehtaoahppi dajai: “Mus lea juoga sárdnut dutnje, oaivámuš.” Jehu jearai: “Guđemužžii mis?” Son vástidii: “Dutnje alccesat, oaivámuš.” ₆Dalle Jehu čuožžilii, ja soai manaiga vissui. Doppe profehtaoahppi golggahii oljju Jehu oaivái ja dajai sutnje: “Ná cealká Hearrá, Israela Ipmil: ‘Mun lean vuoidan du Hearrá álbmoga Israela gonagassan. ₇Don duššadat hearrát Ahaba soga, dasgo mun dáhtun mávssahit Jesabelii profehtaid vara ja buot bálvaleddjiidan vara. ₈Oppa Ahaba sohka duššá, mun jávkadan Israelis buot Ahaba soga olbmábeale, sihke stuorráid ja smávváid. ₉Ja mun dagan Ahaba sohkii nugo dahken Jeroboama, Nebata bártni, sohkii ja Baša, Ahia bártni, sohkii. ₁₀Jesabela borret beatnagat Jisreela eatnamis, iige oktage hávdát su.’” Dasto profehtaoahppi rabastii uvssa ja viehkalii.

₁₁Go Jehu bođii olggos gonagasa oaivámuččaid lusa, de sii jerre sus: “Leago buot bures? Manne dat dáddju finai du luhtte?” Son vástidii sidjiide: “Diihan dovdabehtet olbmá ja su ságaid.” ₁₂Muhto sii dadje: “Ale mohkohala, muital njuolga!” De son dajai: “Dán láhkái son sártnui munnje ja dajai: ‘Nu cealká Hearrá: Mun lean vuoidan du Israela gonagassan.’” ₁₃Dalle oaivámuččat nulle hoahpus oalgebiktasiid ja bidje daid boardagii Jehu julggiid vuollái. Sii bosso dorvve ja čurvo: “Jehu lea gonagas!”

₁₄Jehu, Nimši bártni Jošafata bárdni, dagai suollemas lihtu Jorama vuostá. Gonagas Joram lei leamaš Ramotis Gileadis jođiheamen oppa Israela soahteveaga, go dat bealuštii gávpoga maŋŋil go Arama gonagas Hasael lei bahkken eatnamii. ₁₅Son lei goit máhccan Jisreelii dálkkodit háviidis maid aramealaččat ledje časkán sutnje dalle go son lei soahtan Hasaeliin, Arama gonagasain. Jehu dajai: “Jos dii lehpet mu beali, de allet luoitte gávpogis ovttage doalvut min doaimmain dieđu Jisreelii.” ₁₆Dasto Jehu goarkŋastii vovnnaidasas ja vulggii Jisreelii gos Joram veallái buohccin. Juda gonagas Ahasja lei maid boahtán dohko oahppaladdat Jorama. ₁₇Várdájeaddji gii čuoččui Jisreela toartnas, oinnii Jehu joavkku boahtimin. Go son muitalii ahte oinnii joavkku, de Joram dajai: “Vuolggat riidejeaddji sin ovddal jearrat, leago buot bures.” ₁₈Riidejeaddji manai sin ovddal ja dajai: “Gonagas jearrá, leago buot bures.” Jehu vástidii: “Maid dat dutnje guoská? Jorggit ja čuovo mu!” Várdájeaddji muitalii ahte áirras lei báhcán joavkku lusa iige vuolgán ruoktot. ₁₉Dalle gonagas vuolggahii nuppi riidejeaddji. Son bođii joavkku lusa ja dajai: “Gonagas jearrá, leago buot bures.” Jehu vástidii: “Maid dat dutnje guoská? Jorggit ja čuovo mu!” ₂₀Várdájeaddji muitalii gonagassii: “Son lea báhcán joavkku lusa iige vuolgge ruoktot. Dat ferte leat Jehu, Nimši bárdni, dasgo son vuodjá dego bieđđi.”

₂₁Dalle Joram dajai: “Geassastehket!” Su vovnnat geassastuvvojedje. De Israela gonagas Joram ja Juda gonagas Ahasja vulggiiga goabbáge vovnnainis ja manaiga Jehu ovddal. Soai fáhtiiga su jisreellaš Nabota eananbihtás. ₂₂Go Joram oinnii Jehu, de son jearai: “Leago buot bures, Jehu?” Son vástidii: “Mo sáhtášii leat, go eatnát Jesabela fuorrávuohta ja noaidemeanut ain bistet?” ₂₃Dalle Joram jorgalii vovnnaidis báhtarussii ja čurvii Ahasjai: “Beahtus, Ahasja!” ₂₄Muhto Jehu dohppii dávggi ja bážii Jorama hárdui. Njuolla ráiggai váimmu, ja Joram gahčai vovnnaidis sisa. ₂₅Jehu dajai Bidkarii, vovdnasoalddáhii: “Váldde su vovnnain ja bálkes jisreellaš Nabota eananbihttái! Almma don muittát Hearrá einnostusa? Go moai leimme riidemiin rattát su áhči Ahaba maŋis, de gonagassii celkojuvvui dát Hearrá sátni: ₂₆‘Duođaid, mun oidnen ikte Nabota ja su bártniid vara. Mun mávssahan dutnje aiddo dán seammá eananbihtás’. Ollašuhte dál Hearrá sáni ja bálkes su dán eananbihttái.”

₂₇Go Juda gonagas Ahasja oinnii mii dáhpáhuvai, de son báhtarii Bet-Gana guvlui. Muhto Jehu doarridišgođii su ja čuorvvui: “Goddet sunai!” Sii hávváduhtte Ahasja Jibleama buohta, go su vovnnat ledje goargŋumin Gura vieltti. Ahasja beasai báhtarit Megiddoi, muhto jámii dohko. ₂₈Gonagasa bálvaleaddjit dolvo su vovnnain Jerusalemii ja hávdádedje su Davida gávpogii iežas hávdái áhčiidis báldii. ₂₉Ahasja lei šaddan Juda gonagassan Jorama, Ahaba bártni, oktanuppelogát ráđđenjagi.

₃₀Jehu lei juo boahtimin Jisreelii, go Jesabel gulai mii lei dáhpáhuvvan. Son fávrrosmahttalii čalmmiidis, čiŋahii oaivvis ja manai geahčadit láseráiggi olggos. ₃₁Go Jehu bođii poarttas, de Jesabel jearai: “Leago buot bures, go leat goddán hearrát dego Simri?” ₃₂Jehu geahčastii bajás ihkkonii ja jearai: “Guhtemuš dis lea mu beali?” Dalle moadde hoavvaolbmá gopmirdedje su beallái. ₃₃“Norddastehket su vulos”, Jehu dajai, ja hoavvaolbmát norddastedje Jesabela láseráigge. Su varra rišai seaidnái ja heasttaid njeaiga, ja Jehu vujii vovnnaidisguin su cuovkkas. ₃₄Jehu manai sisa, borai ja jugai. De son gohčui: “Dolvot eret dan garruduvvon nissona ja hávdádehket su, dasgo son lea gonagasa nieida.” ₃₅Muhto go sii manne hávdádit Jesabela, de sii eai gávdnan sus eará go oaiveskálžžu, julggiid ja gieđaid. ₃₆Hávdádeaddjit máhcce Jehu lusa ja muitaledje dan sutnje. De son dajai: “Dál lea ollašuvvan Hearrá sátni maid son sártnui bálvaleaddjis tišbelaš Elia bokte: ‘Beatnagat borret Jesabela Jisreela eatnamis, ₃₇ja su rumaš lea dego dukta Jisreela eatnamii, iige oktage sáhte dadjat: Dát lea Jesabel.’”