2. Gonagasaid girji 8

₁Eliša dajai nissonii gean bártni son lei dahkan eallin: “Vuolgge eret dán eatnamis oktan bearrašiinnát ja ása vierisin gosa sáhtát. Dasgo Hearrá lea rávkan nealggi, ja dat bistá eatnamis čieža jagi.” ₂Nisson dagai nugo Ipmila olmmái lei nevvon. Son vulggii Israelis oktan bearrašiinnis ja ásai čieža jahkái filistalaččaid eatnamii.

₃Čieža jagi geažes nisson máhcai filistalaččaid eatnamis ja manai ánuhit gonagasas veahki, vai fidne iežas viesu ja eatnama ruoktot. ₄Gonagas lei aiddo dalle sártnodeamen Gehasiin, Ipmila olbmá bálvaleddjiin. Gonagas lei bivdán: “Muital munnje buot daid stuorra daguid maid Eliša lea dahkan.” ₅Ja go Gehasi bárrahis lei muitaleamen gonagassii mo Eliša lei dahkan jábmi eallin, de dasa bođii nisson gean bártni Eliša lei dahkan eallin, ja ánuhii gonagasas veahki, vai fidne iežas viesu ja eatnama ruoktot. Gehasi dajai: “Mu hearrá ja gonagas! Dát lea dat nisson ja duot lea su bárdni gean Eliša dagai eallin.” ₆Gonagas jearahii nissonis mo visot lei geavvan, ja nisson muitalii sutnje. De gonagas gohčui muhtun hoavvaolbmá vuolgit nissona fárrui ja dajai olbmái: “Veahket su vai oažžu ruoktot buot mii sutnje gullá ja buot dan vuoittu maid eanan lea addán dan beaivvi rájes go son vulggii eatnamis, gitta dán beaivvi rádjái.”

₇Oktii go Eliša manai Damaskusii, de Arama gonagas Ben-Hadad lei aiddo dalle buohcamin. Gonagassii muitaluvvui ahte gávpogii lei boahtán Ipmila olmmái. ₈Gonagas dajai Hasaelii: “Váldde fárrui attáldaga ja mana deaivvadit Ipmila olbmáin. Siđa su jearrat Hearrás, buorránango mun dán dávddas.” ₉Hasael vulggii deaivvadit Elišain ja válddii fárrui attáldahkan Damaskusa buoremus buktagiid nu ollu go njealljelogi kamela vedje guoddit. Son loaiddastii Eliša ovdii ja dajai: “Du bárdni Ben-Hadad, Arama gonagas, vuolggahii mu du lusa jearrat, buorránago son dávddastis.” ₁₀Eliša vástidii: “Cealkke sutnje ahte son buorrána. Muhto Hearrá lea almmuhan munnje ahte son jápmá.” ₁₁Ipmila olmmái gaivái ovdasis guhká, ja viimmat son čirrui. ₁₂Hasael jearai: “Mu hearrá, manin don čierut?” Eliša vástidii: “Dan dihte go mun dieđán man ollu bahá don dagat israellaččaide. Don buolláhat sin ladnegávpogiid ja gottát sin válljusoahteolbmáid, don cuvket sin uhca mánážiid ja luddet sin áhpehis nissoniid.” ₁₃Hasael dajai: “Mo mun, dákkár beana, sáhtášin dahkat nu stuorra daguid?” Eliša vástidii: “Hearrá lea almmuhan munnje ahte don šattat Arama gonagassan.” ₁₄Hasael vulggii Eliša luhtte ja manai hearrás lusa. Gonagas jearai sus: “Maid Eliša dajai dutnje?” Hasael vástidii: “Son dajai ahte don buorránat.” ₁₅Muhto maŋit beaivvi son válddii gokčasa, cokkadii dan čázis ja dettii dan gonagasa muođuid vuostá, ja nu son jámii. Hasael šattai gonagassan su maŋŋil.

₁₆Joram, Jošafata bárdni, šattai Juda gonagassan Israela gonagasa Jorama, Ahaba bártni, viđát ráđđenjagi. ₁₇Son lei golbmalogiguovttejahkásaš go šattai gonagassan, ja son ráđđii Jerusalemis gávcci jagi. ₁₈Joram vádjolii seammá geainnu go Israela gonagasat. Ahaba soga láhkái son dagai dan mii lea bahá Hearrá čalmmiin, sushan lei áhkkán Ahaba nieida. ₁₉Muhto bálvaleaddjis Davida dihte Hearrá ii goit dáhtton duššadit Juda, danin go son lei lohpidan addit Davidii ja su bártniide lámppá agálaš áigái.

₂₀Jorama áigge edomlaččat stuimmáskedje, čuoldásedje Judas ja bidje alcceseaset gonagasa. ₂₁Dalle Joram vulggii buot soahtevovnnaidisguin ráji rastá Sairii. Son fallehii ihkku, muhto edomlaččat geat ledje birastahttán su, časke su ja su soahtevovdnaoaivámuččaid, ja soahteolbmát báhtaredje gođiidasaset. ₂₂Dan rájes go Edom stuimmáskii, de dat ii šat goassege leat leamaš Juda válddis. Maiddái Libna čuoldásii Judas seammá áigge.

₂₃Mii muđui lea muitalit Joramis ja su daguin, lea čállojuvvon Juda gonagasaid muitalusaid girjái. ₂₄Joram manai vuoiŋŋadit áhčiidis lusa, ja son hávdáduvvui sin báldii Davida gávpogii. Su maŋŋil šattai gonagassan su bárdni Ahasja.

₂₅Ahasja, Juda gonagasa Jorama bárdni, šattai Juda gonagassan Jorama, Ahaba bártni, guoktenuppelogát ráđđenjagi. ₂₆Ahasja lei guoktelogiguovttejahkásaš go šattai gonagassan, ja son ráđđii Jerusalemis ovtta jagi. Su eadni lei Atalja, Israela gonagasa Omri nieida. ₂₇Ahasja vádjolii Ahaba soga geainnu ja dagai dan mii lea bahá Hearrá čalmmiin; dasgo son lei náitalan Ahaba bearrašii. ₂₈Ja son vulggii ovttas Joramiin, Ahaba bártniin, soahtat Arama gonagasain Hasaeliin. Ramotis Gileadis aramealaččat hávváduhtte Jorama. ₂₉Dalle gonagas Joram máhcai Jisreelii buorránit háviin maid aramealaččat ledje časkán sutnje Ramas, go son lei soahtan Arama gonagasain Hasaeliin. Juda gonagas Ahasja, Jorama bárdni, bođii Jisreelii geahččat Ahaba bártni Jorama, go son lei buohcamin.