2. Gonagasaid girji 17

₁Juda gonagasa Ahasa guoktenuppelogát ráđđenjagi šattai Israela gonagassan Hosea, Ela bárdni. Son ráđđii Samarias ovcci jagi. ₂Hosea dagai dan mii lea bahá Hearrá čalmmiin, ii dattetge nu ollu go ovddit Israela gonagasat ledje dahkan.

₃Assyria gonagas Salmanassar soahttái Hoseain, ja Hosea šattai bálvalit su ja máksit sutnje vearu. ₄Assyria gonagas bođii dasto diehtit ahte Hosea lei searvan suollemas lihttui su vuostá; son lei vuolggahan áirasiid Egypta gonagasa So lusa iige lean šat máksán jahkásaš vearu Assyria gonagassii nugo galggai. Danin Assyria gonagas válddii su gitta ja doalai su giddagasas.

₅Assyria gonagas bođii ja válddii oppa eatnama. De son manai Samariai ja birastahtii gávpoga, ja birastahttin bisttii golbma jagi. ₆Hosea ovccát ráđđenjagi Assyria gonagas válddii Samaria. Son doalvvui israellaččaid Assyriai ja bijai sin ássat Halahii, Gosanii Habora gáttiide ja Media gávpogiidda.

₇Nu geavai dan dihte go ahte israellaččat ledje suddudan Hearrá, Ipmileaset, vuostá. Vaikko Hearrá lei buktán sin Egypta eatnamis ja beastán sin farao, Egypta gonagasa, gieđas, de sii ledje bálvališgoahtán eará ipmiliid. ₈Sii ledje váldán daid álbmogiid vieruid maid Hearrá lei ádján israellaččaid ovddas, ja Israela gonagasaid meanuid. ₉Israellaččat ledje dahkan suoli dakkára mii ii lean riekta Hearrá, sin Ipmila, čalmmiin. Sii ledje huksen dieváide oaffarbáikkiid juohke gávpogii, lei dat dal uhca gávpogaš mas lei dušše fáktentoardna, dahje stuorra ladnegávpot. ₁₀Sii ledje ceggen bácciid ja ašeračuolddaid juohke alla dievvái ja juohke rudnes muora vuollái. ₁₁Juohke oaffarbáikkis sii ledje boaldán oaffariid daid álbmogiid láhkái maid Hearrá lei ádján sin ovddas, ja daiguin bahás daguideasetguin sii ledje moaráhuhttán Hearrá. ₁₂Sii ledje maid bálvalan eahpeipmiliid, vaikko Hearrá lei gieldán sin dahkamis nu.

₁₃Hearrá lei gohččon juohke profehta ja juohke oaidni dadjat Israelii ja Judai: “Jorgalehket bahás geainnuineattet ja dollet mu báhkkomiid ja njuolggadusaid, oppa dan lága maid mun adden din áhčiide ja maid mun vuolggahin bálvaleddjiidan profehtaid almmuhit didjiide.” ₁₄Muhto eai sii gullan, muhto ledje seammá ceaggát go sin áhčit geat eai oskon Hearrái, Ipmilasaset. ₁₅Sii hilgo su njuolggadusaid ja lihtu maid son lei dahkan sin áhčiiguin, ja duođaštusa maid son lei addán sidjiide. Sii vádjoledje duššálaš ipmiliid maŋis ja šadde iežanai duššálažžan. Sii dahke nugo sin birasálbmogat, vaikko Hearrá lei gieldán sin eallimis daid láhkái. ₁₆Sii hilgo visot Hearrá, Ipmileaset, báhkkomiid ja leikejedje alcceseaset guokte gálbebácci. Sii dahke alcceseaset maiddái ašeračuolddaid, gopmirdedje buot almmiveaga ja bálvaledje Baala. ₁₇Sii bidje bártniideaset ja nieiddaideaset mannat dola čađa, sii einnostedje ja noidošedje. Sii vuvde iežaset dahkat dan mii lea bahá Hearrá čalmmiin, ja nu moaráhuhtte su. ₁₈Dalle Hearrá moaráhuvai Israelii nu sakka ahte son ájii sin eret muođuidis ovddas. Dušše Juda čearda bázii.

₁₉Ii Juda čeardage doallan Hearrá, Ipmilis, báhkkomiid, muhto válddii daid vieruid maid israellaččat ledje váldán. ₂₀Dalle Hearrá hilggui sin buohkaid, oppa Israela náli. Son vuolidii sin, attii sin speadjáriid gihtii ja loahpas suhppii sin eret muođuidis ovddas.

₂₁Dalle go Hearrá lei gaikkihan Israela sierra Davida sogas, de israellaččat ledje dahkan gonagassan Jeroboama, Nebata bártni, ja Jeroboam lei gáidadan Israela Hearrás ja fillen dan stuorra suddui. ₂₂Israellaččat dahke buot suttuid maid Jeroboam lei dahkan, dain sii eai gáidan. ₂₃Maŋážassii Hearrá ájii sin eret muođuidis ovddas nugo son lei gohččon bálvaleddjiidis profehtaid sárdnut. Nu Israel dolvojuvvui iežas eatnamis Assyriai gos sii leat veláge.

₂₄Assyria gonagas sirddii Babylonis, Kutas, Avvas, Hamatis ja Sefarvajimis ođđa ássiid Samaria gávpogiidda israellaččaid sadjái. Sii válde Samaria oapmineaset ja ásse dan gávpogiidda. ₂₅Go sii álggus ásse dohko, de sii eai bálvalan Hearrá, ja dalle Hearrá vuolggahii sin gaskii ledjoniid mat godde muhtumiid sis. ₂₆Assyria gonagassii muitaluvvui: “Álbmogat maid don sirdet Samaria gávpogiidda, eai dieđe mo galgá bálvalit dan eatnama ipmila. Son lea vuolggahan ledjoniid sin gaskii, ja dat goddet sin, danin go sii eai dieđe man láhkái dan eatnama ipmila galgá bálvalit.” ₂₇Dalle Assyria gonagas gohčui: “Máhcahehket dohko muhtuma dain báhpain geat dolvojuvvojedje doppe eret. Son oažžu mannat dohko, ássat doppe ja oahpahit sidjiide mo dan eatnama ipmila galgá bálvalit.” ₂₈Dalle muhtun dain báhpain geat ledje sirdojuvvon Samarias eret, máhcai dohko ja ásai Betelii. Son oahpahii olbmuide mo Hearrá galggai bálvalit.

₂₉Liikká juohke álbmot ráhkadii iežas ipmilgovaid ja bijai daid tempeliidda maid samarialaččat ledje huksen oaffarbáikkiide, juohke álbmot daidda gávpogiidda main ásai. ₃₀Babylona olbmát dahke Sukkot-Benota gova, Kuta olbmát Nergala gova, Hamata olbmát Ašima gova, ₃₁avvalaččat Nibhasa ja Tartaka gova, ja sefarvajimlaččat bálvaledje Adrammeleka ja Annammeleka, Sefarvajima ipmiliid, nu ahte sii bolde bártniideaset dolas. ₃₂Muhto sii bálvaledje maiddái Hearrá. Sii válljejedje iežaset gaskkas báhpaid geat sin beales oaffarušše oaffarbáikkiid tempeliin. ₃₃Vaikko sii bálvaledje Hearrá, de sii bálvaledje maiddái iežaset ipmiliid seammá láhkái go dat álbmogat maid gaskkas sii ledje sirdojuvvon Samariai.

₃₄Vel otná beaivvige sii dahket dološ lágiset mielde. Sii eai bala Hearrás eaige doala daid njuolggadusaid ja mearrádusaid, dan lága ja daid báhkkomiid maid Hearrá gohčui Jakoba náli doallat, su geasa son bijai namman Israel. ₃₅Hearrá dagai singuin lihtu ja gohčui sin ná: “Allet bala eará ipmiliin. Allet rohkadala daid, allet bálval daid alletge oaffaruša daidda. ₃₆Dii galgabehtet bálvalit Hearrá guhte buvttii din Egypta eatnamis stuorra fámuin ja geigejuvvon gieđain. Su dii galgabehtet rohkadallat ja sutnje oaffaruššat. ₃₇Ja daid njuolggadusaid ja mearrádusaid, dan lága ja daid báhkkomiid maid son lea čállán din várás, dii galgabehtet álo doallat. Eará ipmiliid dii ehpet oaččo bálvalit. ₃₈Allet vajáldahte lihtu maid mun dahken dinguin, alletge bálval eará ipmiliid. ₃₉Duššefal Hearrá, Ipmileattet, dii galgabehtet bálvalit. Son gádju din buot din vašálaččaid gieđas.” ₄₀Samaria ássit eai goit leat dáhtton gullat, muhto dahket ain dološ lágiset mielde. ₄₁Duot álbmogat leat gal gudnejahttán Hearrá, muhto seammás dat leat bálvalan iežaset ipmilgovaid. Nugo áhčit leat dahkan, nu leat dahkan sin mánát ja mánáid mánát gitta dán beaivvi rádjái.