2. Muitalusaid girji 15

₁Ipmila vuoigŋa devddii Asarja, Odeda bártni. ₂Son manai Asa lusa ja dajai sutnje: “Asa ja buot Juda ja Benjamina olbmát, gullet mu! Hearrá lea dinguin, jos dii lehpet suinna. Jos dii ohcabehtet su, de dii gávdnabehtet su, muhto jos dii hilgubehtet su, de son hilgu din. ₃Guhká Israel lei almmá duohta Ipmila haga, báhpaid oahpahusa haga ja lága haga. ₄Muhto áŧestusastis dat jorgalii Hearrá, Israela Ipmila, beallái, ja ozai su, ja nu dat gávnnai su. ₅Dan áigge mátkkálaččat eai sáhttán johtit oadjebasat, danin go álbmogiid gaskkas lei stuorra moivi. ₆Álbmogat sohte álbmogiiguin ja gávpogat gávpogiiguin, danin go Ipmil dagahii moivvi ja buotlágáš lihkohisvuođaid daid gaskii. ₇Muhto lehket dii gievrrat alletge hearddohuva! Dii oažžubehtet daguineattet bálkká.”

₈Go Asa gulai profehta Asarja, Odeda bártni, sániid, de son roahkasmuvai jávkadit fasttes eahpeipmilgovaid oppa Judas ja Benjaminis ja dain gávpogiin maid son lei váldán Efraima várreeatnamis. Son divui Hearrá áltára mii lei tempela ovdahálla ovddas. ₉De son čohkkii Juda ja Benjamina čearddaid ja efraimlaččaid, manasselaččaid ja simeonlaččaid geat ledje ássan sin gaskii. Ollugat Israelis ledje oainnat mannan Asa beallái go sii oidne ahte Hearrá, su Ipmil, lei suinna. ₁₀Sii čoagganedje Jerusalemii Asa vihttanuppelogát ráđđenjagi goalmmát mánus. ₁₁Dan beaivvi sii oaffarušše Hearrái čiežačuođi vuovssá ja čiežaduhát sávzza dan sállašis maid ledje váldán. ₁₂Sii lohpidedje bálvalit Hearrá, áhčiideaset Ipmila, oppa váimmus ja oppa sielus, ₁₃ja ahte juohkehaš, lehkos dal boaris dahje nuorra, olmmái dahje nisson, gii ii bálvalan Hearrá, Israela Ipmila, goddojuvvošii. ₁₄Go trompehtat ja dorvvet čudje ja ávvučuorvasat gadje, de sii vurdno dan Hearrái jitnosii. ₁₅Buot Juda olbmot illudedje vuordnása dihte. Dan dihte go sii vurdno dan olles váimmus ja dáhtto ohcat Hearrá, de Hearrá gulai sin ja attii sidjiide ráfi juohke guovllus.

₁₆Áhčis eatnis Maakas gonagas Asa válddii gonagaseatni árvvu, danin go Maaka lei dahkan hirpmus bácci Ašerai. Asa njeiddii bácci, mollii dan ja bolddii dan Kedronleagis. ₁₇Muhto oaffarbáikkit eai goit jávkan Israelis. Asa dattetge lei olles váimmus oskkáldas Hearrái nu guhká go elii. ₁₈Áhčis ja iežas oaffarattáldagaid, silbba ja golli ja eará biergasiid, son bijai Ipmila tempelii.

₁₉Asa áigge lei ráfi su golbmalogiviđát ráđđenjagi rádjái.